ماڭدايالدى مەحانيزاتور

تاۋداي تراكتوردىڭ گۇرىل­دەپ وتالعانىن, جۇرگەنىن قى­زىقتايدى. جۇرگىزىپ كور­گىسى كەلەدى. مەيىر­بان اكە ماڭ­دايىنان سيپاپ وتىرىپ, ء«الى ەرتە» دەيدى. اقىرى دەگەنىنە جەتتى. جاس كوكىرەگىندەگى جاسامپاز ارمان ورىندالدى. قازىر الەكساندر «ايدوس» اۋىل شارۋاشىلىعى كاسىپورنى» سە­رىك­­تەستىگىنىڭ ماڭدايالدى مەحا­ني­زاتورلارىنىڭ ءبىرى.

– اكەم دە وسى شارۋاشىلىقتا مەحانيزاتور بولىپ ىستەگەن, – دەيدى الەكساندر. – ولاردىڭ جۇ­مىسىمەن سالىستىرعاندا ءبىزدىڭ بۇگىنگى تىرلىگىمىز الدەقايدا جاقسى, جەڭىل. «Case Puma» تەحنيكاسى ءونىمدى جۇمىس ىستەيدى. شەتەلدىك قۋاتتى تراكتوردىڭ ءىشى دە جايلى, بارلىق جۇمىس كومپيۋتەر ارقىلى اتقارىلادى. تىركەمەنىڭ قانداي تەرەڭدىكتە كەلە جاتقاندىعىن كورسەتىپ تۇرادى. جەردى وڭدەگەن كەزدە اتجالدار دا قالمايدى. سول سەبەپتى القاپقا سىڭىرىلگەن ءدان بىركەلكى, قويۋ بولىپ وسەدى. تراكتوردىڭ ىشىندە كونديتسيونەرى بار. بار جۇمىس اۆتوماتتى تۇردە اتقارىلاتىندىقتان, بىزدىكى باقىلاۋ عانا. سولاي بولا تۇرا, ەڭبەكتىڭ ءلاززاتىن كورۋ دەگەن ءوز الدىنا ءبىر بولەك دۇنيە. قارا توپىراققا سىڭىرىلگەن ءدان كوگەرىپ, كوكتەپ شىققان كەزدە بويىڭدى قۋانىش سەزىمى بيلەيدى. القاپقا قاراپ تۇرىپ سۇيسىنەسىڭ. اقىق ءدان سامال جەلمەن تەربەلگەندە كادىمگى تەڭىزگە ۇقسايدى. وسىنىڭ بار­­لىعى جەر ەمشەگىن ەمگەن مەحا­نيزاتورلاردىڭ ادال ەڭبەگى. ءوزىم مەكتەپتەن كەيىن ششۋچە قالاسىنداعى كوللەدجدە وقىپ, گازەلەكتردانەكەرلەۋشى مامان­دىعىن العان بولاتىنمىن. ودان كەيىن ەلىمىزدىڭ قارۋلى كۇشتەرى قاتارىندا اسكەري بورىشىمدى وتەپ كەلدىم.

سولدات كيىمىن شەشكەننەن كەيىن اكەسى بالاسىنىڭ  بولاشاعىن ويلاي كەلە, وزدەرى ءتۇتىن تۇتەتىپ جاتقان اتامەكەن اۋىلىندا قالىپ, مەحانيزاتور بول دەپ كەڭەس بەرگەن. توسىرقايتىنداي توسىن شارۋا ەمەس, بالا كەزىنەن  اۋىل تىرشىلىگىنە كوز قانىقتىرعان. كەيىپكەرىمىزدىڭ ايتۋىنا قارا­­عاندا, شارۋاشىلىقتىڭ جاع­دايى مىعىم, جالاقىلارىن ۋاقىتىندا تولەيدى. الەۋمەتتىك-تۇرمىستىق جاعدايلارىنا دا كومەك قولىن سوزادى. ناۋقاندىق جۇمىس كەزىندە ۋاقىتپەن ساناس­پاي ەڭبەك ەتۋگە تۋرا كەلەدى. ەتكەن ەڭبەگىنە وراي جالاقى كولەمى دە وسە تۇسەدى. اۋىلدا قالىپ ەل مەرەيىن وسىرەمىن دەيتىن جاسقا بۇدان ارتىق نە كەرەك؟

جاس جىگىتتىڭ تىندىرىم­دى­لىعىن كورگەن سەرىكتەستىك باس­شىلارى ءۇي دە ساتىپ الىپ بەرىپتى. تابىستى بولعان سوڭ جاس شاڭىراقتىڭ ءتۇتىنى ءتۇزۋ ۇشا باستاعان.

– ادام ءۇشىن ەڭ باستىسى باس­پانا عوي, – دەيدى الەكساندر, – ءۇيلى بولعاندا توبەم كوككە جەتكەندەي قۋاندىم. ەندى ءوزىم­نىڭ شاعىن وتانىم – وتباسىم بار, قالعانى بولا جاتار.

ەلدەگى جاستار وزدەرىنىڭ تۋعان جەرىندە تۋ تىگىپ, ادال ەڭبەك ەتسە دەپ ارماندايدى الەكساندر. سول كەزدە اتامەكەن ءتارىزدى تالاي اۋىلدىڭ ىرگەسى بەكي تۇسەر ەدى.

اقمولا وبلىسى,

بۋراباي اۋدانى