ساپار اياسىندا دەپۋتات تالعار قالاسىنداعى « ۇلى دالا» دەمالىس ايماعىنا بارىپ, جەرگىلىكتى كاسىپكەرلەرمەن كەزدەستى. كەزدەسۋدە تۋريزم ينفراقۇرىلىمىنا قاتىستى وتكىر ماسەلەلەر كوتەرىلدى.
كاسىپكەرلەر جولداردىڭ ساپاسىزدىعىنا, ەلەكتر جارىعىنىڭ, اۋىز سۋدىڭ, گاز جانە ينتەرنەت جەلىسىنىڭ دۇرىس جۇمىس ىستەمەۋىنە شاعىمداندى. سونىمەن قاتار جولدىڭ جەكە مەنشىك جەر تەلىمدەرى ارقىلى وتەتىندىگى سەبەپتى كوپتەگەن نىسانعا قاتىناۋ قيىنداعان. جەر يەلەرى ءوز اۋماقتارىنا كىرۋگە رۇقسات بەرمەي وتىر, بۇل بيزنەس دامۋىنا ايتارلىقتاي كەدەرگى كەلتىرۋدە.
قوناەۆ قالاسىندا دەپۋتات جاعاجاي ايماعىن ارالاپ, تۋريزم سالاسىندا ەڭبەك ەتىپ جۇرگەن كاسىپكەرلەرمەن كەزدەستى. مۇندا دا وزەكتى ماسەلە كوتەرىلدى. اكىمدىك جاعالاۋ بويىنداعى نىسانداردى بىرىڭعاي ارحيتەكتۋرالىق ستيلگە كەلتىرۋدى ۇسىنۋدا. الايدا كاسىپكەرلەر جوبانىڭ جۇزەگە اسۋىنا ناقتى كەپىلدىك بولمايىنشا, قارجى سالۋعا دايىن ەمەستىكتەرىن ايتتى.
ەكى تاراپ ءبىر مامىلەگە كەلىپ, 14 تامىزعا دەيىن ۋاقىت بەرىلدى. سول ۋاقىتقا دەيىن مەملەكەتتىك ساراپتامانىڭ قورىتىندىسى دايىن بولادى. ەگەر بيزنەس يەلەرى جاڭا تالاپتاردى قابىلداماسا, جەر تەلىمدەرى كونكۋرس ارقىلى باسقا ينۆەستورلارعا ۇسىنىلماق.
– تۋريزم – جاي عانا دەمالىس ەمەس. بۇل – ەلدىڭ بەت-بەينەسى, جاڭا جۇمىس ورىندارى مەن ينۆەستيتسيا تارتۋدىڭ كوزى, وڭىرلەردى دامىتۋدىڭ درايۆەرى. ەگەر ءبىز بۇل سالادا ناقتى ناتيجە كۇتسەك, ەڭ الدىمەن كاسىپكەرلەر ءۇشىن قولايلى جاعداي جاساۋىمىز قاجەت, – دەدى ءماجىلىس دەپۋتاتى ەكاتەرينا سمولياكوۆا.
ايتا كەتەيىك, بۇعان دەيىن دەپۋتات پرەمەر-مينيستر ولجاس بەكتەنوۆتىڭ اتىنا دەپۋتاتتىق ساۋال جولداپ, ىشكى ءتۋريزمدى دامىتۋ, زاڭسىز باسەكەلەستىكتى بولدىرماۋ جانە سالالىق زاڭنامانى جەتىلدىرۋ قاجەتتىلىگى جونىندە باستاما كوتەرگەن بولاتىن.
