جاقسىلىق ۇشكەمپىروۆ اتىنداعى جەكپە-جەك سارايىندا الدىمەن اشىلۋ سالتاناتى ءراسىمى ءوتتى. راسىمدە قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ ءسوز سويلەدى.
«پرەزيدەنتىمىز قاسىم-جومارت توقاەۆ سپورت – ەلدەردى بىرىكتىرەتىن التىن كوپىر دەگەن. بۇنداي اۋقىمدى ءىس-شارا بۇقارالىق جانە كاسىبي سپورتتى دامىتۋعا ارنالعان باستى باعداردىڭ ءبىرى. بارشا سپورتشىلارعا ساتتىلىك پەن جەڭىس تىلەيمىن!», دەدى مينيستر ءوز قۇتتىقتاۋىندا.
جارىستى ءبىزدىڭ ايەلدەر قۇراماسىنان نازىم قىزايباي باستاپ بەردى. 48 كگ سالماقتا ونەر كورسەتەتىن ول العاشقى جارىس جولىندا قارسىلاسى كانادالىق پريانكا ديللوندى ايقىن باسىمدىقپەن جەڭدى. قارسىلاسىن تىقسىرعان نازىمنىڭ جەڭىسىنە تورەشىلەر شەك كەلتىرگەن جوق.
ودان 54 كگ سالماقتا انەل ساقىش تا گەرمانيالىق تاتيانا وبەرمايەردى وڭدىرماي 3 رەت نوكداۋنعا ءتۇسىرۋ ارقىلى ايقىن باسىمدىقپەن جەڭىپ كەلەسى كەزەڭگە شىقتى. ونىڭ ەندىگى قارسىلاسى ازۋلى ازيا چەمپيونى فەرۋزا كازاكوۆا بولماق.
سودان سوڭ 60 كگ سالماقتا ۆيكتوريا گرافەەۆا قۋانىشىمىزدى ەسەلەي ءتۇستى. ول ءوز كەزەگىندە جاپونيالىق قارسىلاسىن جارىس جولىنان شىعارىپ جىبەردى. كەلەسى قارسىلاسى – ەۋروپا ويىندارىنىڭ قولا جۇلدەگەرى, تۇرىك بوكسشىسى وزەر گيززەم.
رينگكە بىزدەن ءتورتىنشى بولىپ ناتاليا بوگدانوۆا كوتەرىلىپ, ول دا جارىستى ءساتتى باستاي الدى. 70 كگ-دا سىنعا تۇسكەن ناتاليا ءۇش راۋند قورىتىندىسى بويىنشا قارسىلاسى ءۇندى بوكسشىسى ساناما چانۋدەن ۇستەم بولدى. ەندى كەلەسى كەزەڭدە برازيليالىق ارۋ ماريا دوس سانتوسپەن كەزدەسەدى. ال ەرلەر اراسىندا وكىنىشكە وراي ابىلايحان ءجۇسىپوۆ جاراقات الىپ قالدى. نەگىزى, كەزدەسۋ قورىتىندىسى بويىنشا ەكى راۋند باسىم تۇسكەن. الايدا, جاراقاتىن تەكسەرگەن دارىگەرلەر 3 راۋندتا جەكپە-جەكتى توقتاتتى.
ال بۇگىن ەكىنشى جارىس كۇنىندە انەل ساقىش, ماحمۇد سابىرحان, نۇربەك, ايبەك ورالبايلار ونەر كورسەتەدى.
نۇراسىل مۇراتبەك,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2 كۋرس ستۋدەنتى
