فوتو: اشىق دەرەككوز
باعدارلاما وتە قاراپايىم. دۇكەننەن نەمەسە قىزمەت كورسەتۋشىدەن كەيىن فيسكالدى چەك الاسىز, سول چەكتەگى QR-كودتى Amian قوسىمشاسى ارقىلى سكانەرلەيسىز. سودان سوڭ 2% سوما كارتاڭىزعا نەمەسە تەلەفون ءنومىرىڭىزدىڭ بالانسىنا قايتارىلادى. ول ءۇشىن تەك Amian ءموبيلدى قوسىمشاسىن App Store نەمەسە Google Play دۇكەنىنەن جۇكتەۋ جەتكىلىكتى.
2025 جىلدىڭ ماۋسىمىنان باستاپ كەشبەك باعدارلاماسى جامبىل وبلىسىنىڭ جامبىل جانە مويىنقۇم اۋداندارىندا, تۇركىستان وبلىسىنىڭ تولەبي اۋدانىندا, قاراعاندى وبلىسىنىڭ بالقاش قالاسىندا, سونداي-اق ماڭعىستاۋ وبلىسىنىڭ مۇنايلى جانە قاراقيا اۋداندارىندا قولجەتىمدى بولدى. بۇل تىزىمگە دەيىن قاراعاندى, شىعىس قازاقستان, تۇركىستان, اقمولا, قوستاناي, سولتۇستىك جانە باتىس قازاقستان وبلىستارىنىڭ بىرقاتار ايماقتارى ەنگىزىلگەن بولاتىن.
جوبانىڭ باستى ماقساتى – كولەڭكەلى ەكونوميكانى ازايتىپ, سالىقتىق اشىقتىقتى ارتتىرۋ. كاسىپكەرلەر فيسكالدى چەك بەرۋگە مىندەتتى بولسا, تۇتىنۋشىلار ءۇشىن چەك الۋ از دا بولسا قارجىلاي پايدا اكەلەدى. ءارى زاڭدى بيزنەسكە قولداۋ ءبىلدىرۋدىڭ ءبىر جولى رەتىندە قاراستىرىلادى.
