سەنات توراعاسى بايقاۋ لاۋرەاتتارىن قۇتتىقتاي كەلە, قوعامدىق پىكىر قالىپتاستىرۋ جانە ۇلتتى ورتاق مۇددەگە ۇيىستىرۋ جولىندا بۇقارالىق اقپارات قۇرالدارى ماڭىزدى ءرول اتقاراتىنىن ايتتى. سونداي-اق ول جۋرناليستەر مەملەكەت پەن ازاماتتار اراسىنداعى التىن كوپىر, الەۋمەتتىك احۋالدىڭ بارومەترى ەكەنىنە نازار اۋداردى. شىن مانىندە, باق وكىلدەرى ەلدە بولىپ جاتقان وزگەرىستەردىڭ ءمانىن حالىققا جەتكىزىپ, ءارتۇرلى كوزقاراستى كورسەتەدى. م.اشىمباەۆ ءوز سوزىندە ەلدىڭ الەۋمەتتىك-ەكونوميكالىق جانە ساياسي باعدارىنىڭ باسىم باعىتتارىنا توقتالىپ, كەزدەسۋگە قاتىسۋشىلارعا ادىلەتتى, قاۋىپسىز, تازا جانە قۋاتتى قازاقستاندى قۇرۋعا قوسىپ كەلە جاتقان بەلسەندى ۇلەستەرى ءۇشىن العىس ايتتى.
«پرەزيدەنت قاسىم-جومارت توقاەۆتىڭ باستاماسىمەن ەلىمىزدە كەشەندى رەفورمالار ىسكە اسىرىلىپ جاتىر. ولار ەكونوميكانى ءارتاراپتاندىرۋ, ءومىر ءسۇرۋ ساپاسىن جاقسارتۋ جانە ازاماتتاردىڭ ءال-اۋقاتىن ارتتىرۋدى كوزدەيدى. ساپالى بىلىممەن جانە مەديتسينالىق قىزمەتپەن قامتاماسىز ەتۋ ماسەلەلەرىنە باسا ءمان بەرىلىپ جاتىر. ازاماتتاردىڭ ەلىمىزدە بولىپ جاتقان وزگەرىستەر جونىندە تولىق جانە وبەكتيۆتى اقپارات الۋى سىزدەرگە تىكەلەي بايلانىستى. سوندىقتان جۋرناليستەردىڭ قىزمەتى قاشاندا قۇرمەتكە لايىق. وسى رەتتە جۋرناليستەردىڭ پارلامەنتتىك پۋلىنىڭ جۇمىسىنا دا ەرەكشە توقتالعىم كەلەدى. سىزدەر سەناتتىڭ مەملەكەت باسشىسىنىڭ رەفورمالارىن زاڭنامالىق تۇرعىدان قامتاماسىز ەتۋگە ارنالعان قىزمەتىن دايەكتى جانە جەدەل ناسيحاتتاپ, قابىلدانعان زاڭداردىڭ ءمانىن ءتۇسىندىرىپ, ادىلەتتى, قاۋىپسىز, تازا جانە قۋاتتى قازاقستان قۇرۋعا ەلەۋلى ۇلەس قوسىپ كەلەسىزدەر», دەدى سەنات توراعاسى.
سونىمەن قاتار م.اشىمباەۆ پالاتا جۇمىسىنىڭ قورىتىندىسىنا نازار اۋدارىپ, سەناتورلاردىڭ وڭىرلەردە وتكىزگەن كوشپەلى وتىرىستارىنان حابار تاراتۋ ارقىلى قوعامدى تولعاندىرعان وزەكتى ماسەلەلەردى وڭ شەشۋ ىسىندە باق-تىڭ ىقپالى زور ەكەنىن تىلگە تيەك ەتتى. دەپۋتاتتىق ساۋالداردى, تۇراقتى كوميتەتتەردىڭ قىزمەتىن جانە قارالاتىن زاڭداردى ۋاقتىلى ءارى وبەكتيۆتى جاريالاۋدىڭ ماڭىزدى ەكەنى دە ءسوز بولدى.
جالپى, بيىل سەنات ۇيىمداستىرعان «پاراسات» بايقاۋىنا 100-دەن اسا جۇمىس كەلىپ ءتۇستى. اۆتورلاردىڭ قاتارىندا تەلەارنالاردىڭ, ءباسپاسوزدىڭ, اقپارات پورتالدارىنىڭ جانە وزگە دە وتاندىق مەديانىڭ جۋرناليستەرى بار.
سونىمەن 2025 جىلعى «پاراسات» بايقاۋىنىڭ جەڭىمپازدارى مىنا اتالىمدار بويىنشا انىقتالدى: «ۇزدىك تەلەۆيزيالىق ماتەريال» – ازامات نۇعىمانوۆ («Qazaqstan» تەلەارناسى), بوتاگوز بازارباەۆا («24KZ» تەلەارناسى), اننا ابراموۆا («كتك» تەلەارناسى); «مەرزىمدى باسپاسوزدەگى ۇزدىك ماتەريال» – گۇلنار جولجان («Egemen Qazaqstan» گازەتى), گۇلجيعان تۇرسىنوۆا («جەتىسۋ» وبلىستىق گازەتى), راۋشانگۇل نۇرشاەۆا («ليتەر» گازەتى); «ينتەرنەت-باسىلىمداعى ۇزدىك جاريالانىم» – جانار سەردالينا («BestNews.kz» اقپارات اگەنتتىگى), نادەجدا اليشپاەۆا («Tengrinews.kz» اقپارات اگەنتتىگى); «الەۋمەتتىك جەلىلەردەگى ۇزدىك جازبا» – ەرجان جاۋباي (جۋرناليست); «جىلدىڭ ارنايى سىيلىعى – ۇزدىك اناليتيكالىق ماتەريال» – اقبوپە تاڭىربەرگەن جانە «ەۋرازيا ءبىرىنشى ارناسى» تەلەارناسى «زاڭ مەن ەل» باعدارلاماسىنىڭ ۇجىمى, پرەزيدەنت تەلەراديوكەشەنى «Jibek Joly» تەلەارناسىنىڭ ۇجىمى; «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» – سوۆەتحان جاعيەۆ («Qazaqstan» تەلەارناسىنىڭ ۆيدەووپەراتورى).
