ماعزۇمبەك ماشايىق ۇلى ءالى تۇعىردان تايعان جوق. جاسى 86-عا كەلسە دە, قولىنان قالامىن تاستاماي ەڭبەك ەتىپ ءجۇر. ونىڭ جۋرناليستيكا سالاسىندا قىزمەت ىستەپ كەلە جاتقانىنا 62 جىل.
ء«الى كۇنگە دەيىن جۇمىس ىستەپ ءجۇرمىن. ۇكىمەت قىزمەتىمدى ەلەگەن شىعار, «جۇمىس ىستەي بەرىڭىز» دەپ رۇقسات بەردى. ءومىرىمنىڭ باسىم بولىگىن وتكىزگەن گازەت مەنىڭ تاربيەشىم بولدى. حالىقتىڭ اراسىندا ەلدىڭ تىنىس-تىرشىلىگىن ءبىلىپ, ءوزىڭ دە ساباق الىپ, سودان ەسەيەدى ەكەنسىڭ. جۋرناليست – وتە قۇرمەتتى ماماندىق. 40 جىل « ۇلىتاۋ ءوڭىرى» گازەتىندە رەداكتور, 14 جىل رەداكتوردىڭ ورىنباسارى بولدىم. قازىر كەڭەسشى بولىپ جۇمىس ىستەيمىن ءارى ماقالا جازىپ تۇرامىن. گازەتتەگى قىزمەت مەنىڭ اتاعىمدى شىعارۋعا ىقپال ەتتى, كوپتەگەن اقىن-جازۋشى – مۇحامەدجان قاراتاەۆ, سىرباي ماۋلەنوۆ, عافۋ قايىربەكوۆ, قادىر ءمىرزاالى, زەيتىن اقىشەۆ, اقسەلەۋ سەيدىمبەكوۆ سياقتى قالامگەرلەرمەن بىرگە ءجۇردىم, دوس, سىرلاس بولدىم. مەنى الماتىعا الىپ كەتەمىز دەگەندەردەن باس تارتتىم. ولارعا ءوزىمنىڭ تۋعان جەرىمدە, ءوزىمنىڭ ءوسىپ-ونگەن ورتامدا, قاسيەتتى ۇلىتاۋىمنىڭ باۋىرىندا ەڭبەك ەتە بەرەمىن دەدىم. ەلىمىزدىڭ باس باسىلىمى «Egemen Qazaqstan» – مىقتى گازەت. ءالى كۇنگە دەيىن ماقالا جىبەرىپ تۇرامىن. «سوتسياليستىك قازاقستان» گازەتى بولىپ تۇرعاندا دا, ماقالا جازىپ تۇردىم. ەل گازەتى كوپتەگەن ازاماتتى تاربيەلەپ شىعاردى. حالىقتىڭ مۇڭ-مۇقتاجىن جوقتادى. سوندىقتان بارلىق قالامگەرگە شىعارماشىلىق تابىس تىلەيمىن», دەپ اق باتاسىن بەردى ابىز اقساقال.
بۇقارالىق اقپارات قۇرالدارى قىزمەتكەرلەرىنىڭ كۇنى قارساڭىندا جەزقازعان قالاسىندا ۇلىتاۋ وبلىسى اكىمى داستان رىسپەكوۆ «Ūlar» سىيلىعىن تابىستاپ, سول قاتاردا ۇلىتاۋ وبلىسى جۋرناليستيكاسىن دامىتۋعا قوسقان ۇلەسى ءۇشىن 1 ملن تەڭگە اقشالاي سىياقىمەن ماعزۇمبەك ماشايىق ۇلىن ماراپاتتادى.
ۇلىتاۋ وبلىسى
