قاراعاندى وبلىسىندا پوليتسەيدى ءولتىرۋشى قولعا ءتۇستى

استانا. 22 ماۋسىم. قاراعاندى وبلىسىنداعى ساتباەۆ قالاسىندا زورلىقپەن ولتىرىلگەن پوليتسەيگە قاتىستى قىلمىس اشىلدى. بۇل تۋرالى وبلىستىق ىشكى ىستەر دەپارتامەنتىنىڭ مالىمەتىنە سۇيەنگەن Tengrinews.kz حابارلادى. ءباسپاسوز قىزمەتىنىڭ مالىمەتىنشە, ساتباەۆ قالاسىنىڭ بۇل قىلمىستى جاسادى دەگەن كۇدىكپەن ۇستالعان 30 جاستاعى تۇرعىنى ەكەۋارا كەلىسپەۋشىلىكتىڭ سالدارىنان جابىرلەنۋشىنىڭ ۇيىنە تەرەزە ارقىلى كىرىپ, ادامنىڭ ولىمىنە سەبەپ بولاتىن دەنە جاراقاتتارىن كەلتىرگەنى تۋرالى مويىندادى. قازىرگى تاڭدا ۇستالعان ازامات ۋاقىتشا وقشاۋلاعىشىنا قامالدى, سوتقا دەيىنگى تەرگەپ-تەكسەرۋ امالدارى ءجۇرىپ جاتىر. «كريمينالدىق پوليتسيا دەپارتامەنتى مەن قاراعاندى وبلىستىق ىشكى ىستەر دەپارتامەنتىنىڭ قىزمەتكەرلەرى قوعامدىق دۇربەلەڭ تۋدىرعان اسا اۋىر قىلمىستى اشتى. ساتباەۆ قالاسىندا بولعان جول پاترۋلدىك-پوليتسيا باتالونى قىزمەتكەرىنىڭ ولىمىنە سەبەپ بولعان قىلمىستى جەدەل تۇردە اشۋ ماقساتىندا جۇرگىزىلگەن جەدەل-ىزدەستىرۋ ءىس-شارالارى بارىسىندا بۇل قىلمىسقا قاتىسى بار دەگەن كۇدىكتىنىڭ تۇلعاسى انىقتالىپ, ۇستالدى», - دەدى ءباسپاسوز قىزمەتىندەگىلەر. ەسكە سالا كەتەيىك, بۇعان دەيىن قاراعاندى وبلىسىندا زورلانعان پوليتسەي دەنەسىنىڭ تابىلعانى حابارلانعان بولاتىن. وبلىستىق ىشكى ىستەر ورگاندارىنىڭ ماماندارى 46 جاستاعى جول-پاترۋل پوليتسياسى قىزمەتكەرىنىڭ ءمايىتىن ساتباەۆ قالاسىنداعى پاتەرىنەن تاپقان. ونىڭ دەنەسىندە زورلىق بەلگىلەرى بولدى. تالعات رايىمبەك. دەرەك: Tengrinews.kz.