ۇلىتاۋ وبلىسى اكىمىنىڭ ورىنباسارى زينا جۇمانازارقىزى جاڭا مۋزەيدىڭ اشىلۋىن « ۇلىتاۋدىڭ مادەني-رۋحاني دامۋىنا قوسىلعان سۇبەلى ۇلەس» دەپ باعالادى. استاناداعى ۇلتتىق مۋزەي ديرەكتورى بەرىك ابدىعالي ۇلى مادەني نىساننىڭ ۇلتتىق سانا مەن تاريحي زەردەنى جاڭعىرتۋعا قوسار ماڭىزىن اتاپ ءوتتى. ۇلىتاۋ اۋدانىنىڭ قۇرمەتتى ازاماتى رىسقالي ابدىكەروۆ پەن قوعام قايراتكەرى الماز شارمانوۆ مۋزەيدىڭ بولاشاق ۇرپاققا بەرەر تاريحي-تانىمدىق تاعىلىمىن تىلگە تيەك ەتتى.
جاڭا مۋزەيدە اكادەميك تورەگەلدى شارمانوۆقا ارنالعان كابينەت بار. ول الماتى قالاسىنداعى ۇلتتىق تاعامتانۋ ينستيتۋتىنداعى كورنەكتى عالىمنىڭ ەڭبەك كابينەتىنىڭ كوشىرمەسى ىسپەتتى. اكە رۋحىنىڭ تۋعان جەرىمەن بايلانىسىن تەرەڭدەتە ءتۇسۋ ماقساتىندا – كابينەتتىڭ ۇلىتاۋ اۋداندىق تاريحي-ولكەتانۋ مۋزەيىنەن ورىن الۋىنا اكادەميكتىڭ ۇلى الماز شارمانوۆ ۇيىتقى بولىپتى.
مەيماندار العاشقى ەكسكۋرسياعا قاتىستى. مۋزەي باسشىسى راحات تاحان ۇلى ءوزى باستاپ ارالاتىپ, ءار زالداعى جادىگەر تاريحىنا توقتالدى.
«مۋزەي بىرنەشە ەكسپوزيتسيالىق زالدان تۇرادى: «كونە ۇلىتاۋ» زالى, «ولكە تاريحى» زالى, اكادەميك تورەگەلدى شارمانوۆ كابينەتى, «قازاقتىڭ ۇلتتىق اسپاپتارى» زالى. «قازاقتىڭ ۇلتتىق اسپاپتارى» زالى – ۇلتتىق مۋزىكالىق مۇراعا ارنالعان كەڭىستىك. بۇل زالدا ۇلىتاۋدىڭ ونەرپازى, قولونەر شەبەرى, ۇلتتىق مۋزىكا جاناشىرى ازامات باقيانىڭ قولىنان شىققان 70-كە جۋىق اسپاپ قويىلعان», دەيدى ۇلىتاۋ اۋداندىق تاريحي-ولكەتانۋ مۋزەيىنىڭ كىشى عىلىمي قىزمەتكەرى سۆەتلانا جۇسىپقىزى.
قولونەر شەبەرى, مۋزىكانت ازامات باقيا زالدا شەبەرلىك ساباعىن وتكىزىپ, قوناقتارعا اسپاپتاردىڭ شىعۋ تاريحى مەن ەرەكشەلىگىن تانىستىرسا, «جوشى» ەتنو-فولكلورلىق ءانسامبلى ۇلتتىق اۋەنمەن سالتاناتتى ءساتتىڭ ءسانىن
كىرگىزدى.
جاڭادان اشىلعان ۇلىتاۋ اۋداندىق تاريحي-ولكەتانۋ مۋزەيى – ەلدىڭ وتكەنى مەن بولاشاعىن جالعاپ, ۇرپاق ساناسىنا ۇلتتىق بولمىستى سىڭىرەتىن التىن كوپىر. الداعى ۋاقىتتا ۇلتتىڭ ۇلى مۇراتىن ۇلىقتايتىن ورتالىققا اينالادى دەگەن سەنىمدەمىز.
ۇلىتاۋ وبلىسى
