اتاپ ايتقاندا, ينۆەستيتسيالىق قۇنى 20,7 ملرد تەڭگەلىك, 2000 جۇمىس ورنى قۇرىلاتىن «Global Textile Turkistan» جشس-نىڭ ماقتا تالشىعىن, سۇر جانە بويالعان ماتا, تريكوتاج ءوندىرىسىن, «TST Jetisay Textile» جشس ءيىرۋ, توقۋ جانە تىگىن فابريكالارىن (ينۆەستيتسيا – شامامەن 41,5 ملن اقش دوللارى, 250 جۇمىس ورنى) 2025 – 2027 جىلدارى ىسكە قوسۋ جوسپارلانىپ وتىر.
«Kazakhstan LIHUA» جشس-ى ماقتانى وسىرۋدەن باستاپ دايىن ءونىم شىعارۋعا دەيىنگى تولىق تسيكلدى جوبانى ىسكە اسىرۋدى كوزدەپ وتىر, ونىڭ شەڭبەرىندە 2000-نان استام جۇمىس ورنىن قۇرىلماق.
ۇكىمەت باسشىسى ولجاس بەكتەنوۆتىڭ سەناتورلار ساۋالىنا بەرگەن جاۋابىنا سۇيەنسەك, سالانى ودان ءارى دامىتۋ ءۇشىن كلاستەرلىك ءتاسىلدى جانە تەحنولوگيالىق جاڭعىرتۋ شارالارىن كۇشەيتە وتىرىپ, جاڭا توقىما ونەركاسىبىن دامىتۋ جونىندەگى 2026 – 2030 جىلدارعا ارنالعان جول كارتاسىن ازىرلەۋ كوزدەلۋدە.
«ماقتا سالاسىنىڭ تيىمدىلىگىن ارتتىرۋ ماقساتىندا «سەلەكتسيا جانە تۇقىم شارۋاشىلىعىن دامىتۋ جونىندەگى 2024–2028 جىلدارعا ارنالعان كەشەندى جوسپار» اياسىندا سەلەكتسيالىق باعدارلامالاردى قارجىلاندىرۋدى 1,5-تەن 7,5 ملرد تەڭگەگە دەيىن ۇلعايتۋ, 9 عىلىمي-تەحنيكالىق جوبانى ىسكە اسىرۋ, ونىڭ ىشىندە ماقتا سەلەكتسياسىن جانە باستاپقى تۇقىم شارۋاشىلىعىن, جابدىقتى جاڭارتۋ جانە شەتەلدىك ۇيىمداردى تارتا وتىرىپ, ماماندار دايارلاۋ, تۇركىستان وبلىسىندا ماقتا تۇقىمى زاۋىتىن جاڭعىرتۋ (قۋاتى–جىلىنا 1,5 مىڭ توننا, پايدالانۋعا بەرۋ–2025 جىلدىڭ سوڭى) شارالارى كوزدەلگەن», دەلىنگەن پرەمەر-ءمينيستردىڭ جاۋابىندا.
وسىلايشا, قابىلدانىپ جاتقان شارالار نورماتيۆتىك قۇقىقتىق قامتاماسىز ەتۋدى, ينۆەستيتسيالىق قولداۋدى, كلاستەرلىك ينفراقۇرىلىم قۇرۋدى جانە تۇقىم شارۋاشىلىعىن دامىتۋدى قوسا العاندا, ماقتا سالاسىن كەشەندى دامىتۋعا باعىتتالىپ وتىر.
