استانا. 22 ماۋسىم. وبلىس اكىمى قىرىمبەك كوشەرباەۆ 23 ماۋسىم – «قازاقستان پوليتسياسى كۇنى» مەرەكەسىنە وراي ىشكى ىستەر سالاسىندا سان جىلدار بويى قىزمەت ەتكەن ارداگەرلەرىن قابىلداپ, الداعى مەرەكەلەرىمەن قۇتتىقتادى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
جيىندا ايماق باسشىسى: «سىزدەر ساناۋلى عۇمىرلارىڭىزدى ەلىمىزدىڭ تىنىشتىعىنا, قىلمىسپەن كۇرەسۋگە ارنادىڭىزدار. وبلىسىمىزدىڭ ءوسىپ-وركەندەۋىنە, الەۋمەتتىك تۇراقتىلىعىنا ۇلكەن ۇلەس قوستىڭىزدار. قازىردىڭ وزىندە ەڭبەك دەمالىسىندا جۇرگەندەرىڭىزگە قاراماستان, ءارتۇرلى شارالاردا قولدان كەلگەن كومەكتەرىڭىزدى جاساپ, اسىرەسە قوعامدىق ومىرگە بەلسەنە قاتىسىپ, وسكەلەڭ ۇرپاققا وزدەرىڭىزدىڭ اتالىق ءتالىم-تاربيەلەرىڭىزدى بەرىپ كەلە جاتىرسىزدار. وسى ءۇشىن سىزدەرگە ۇلكەن ريزاشىلىعىمدى ايتامىن», – دەپ لەبىزىن ءبىلدىردى.
سونىمەن قاتار, كەزدەسۋ بارىسىندا قىرىمبەك كوشەرباەۆ جاس پوليتسيا قىزمەتكەرلەرىنە ۇلگى-ونەگە كورسەتىپ, جاس كادرلاردى تاربيەلەۋگە ات سالىسقاندارى ءۇشىن ىشكى ىستەر ورگاندارىنىڭ ءبىر توپ ارداگەرىن قىزىلوردا وبلىسى اكىمىنىڭ «قۇرمەت گراموتاسىمەن» جانە «العىس حاتىمەن» ماراپاتتاپ, سىي-قۇرمەت كورسەتتى.
بۇگىندە وبلىستا ىشكى ىستەر دەپارتامەنتىنەن قۇرمەتتى ەڭبەك دەمالىسىنا شىققان 1436 ارداگەر بار.
ايتا كەتەيىك, ارداگەرلەردىڭ اتىنان ىشكى ىستەر ورگاندارى ارداگەرلەر كەڭەسىنىڭ توراعاسى مىلتىقباي پەيىسوۆ كورسەتىلگەن قۇرمەتكە ريزاشىلىعىن ءبىلدىردى.
تالعات رايىمبەك.
دەرەك, سۋرەت: وبلىس اكىمدىگىنىڭ ءباسپاسوز قىزمەتى.
