باتىس قازاقستاندا ەكولوگيالىق كەلەڭسىزدىكتەرگە جول بەرىلگەن

ورال. 15 اقپان. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى باتىس قازاقستان وبلىسى بويىنشا ەكولوگيا دەپارتامەنتىنىڭ باسشىسى قابيجان قاپانوۆ پەن باس مەملەكەتتىك ەكولوگيالىق ينسپەكتور ەرلان ساپاروۆتى قىزمەتىنەن بوساتۋ تۋرالى ۇسىنىس جاسادى. بۇل تۋرالى egemen.kz ءتىلشىسى حابارلادى. باتىس قازاقستان وبلىستىق پروكۋراتۋراسى 2010-2012 جىلدارى «ورالويلەندگاز» كاسىپورنى بۇرعىلاعان جەردەن «مۇناياۆتوترانس» جانە «باتىستابيعات» جشس مۇناي قالدىقتارىن تاسىعانىن انىقتادى. وسى ارەكەتتەرى ارقىلى ولار زەلەنوۆ اۋدانى اۋماعىن لاستاعان. سونىڭ سالدارىنان ميلليارد تەڭگەگە تاياۋ زيان كەلتىرىلگەن. وسى ەكولوگيالىق قىلمىستى جاساعانى ءۇشىن العاشقى اتالعان كاسىپورىننىڭ ديرەكتورى اسلان مۇقانوۆ سوتتالعان. الايدا, وعان كەزىندە ەكولوگيا دەپارتامەنتى ەشقانداي شارا كورمەگەن. وسىعان ۇقساس وقيعالاردىڭ بۇدان كەيىن دە بىرنەشە رەت قايتالانعانى بەلگىلى بولعان. ايتسە دە ەكولوگيا دەپارتامەنتى ءجۇردىم-باردىم قاراعان. سودان كەيىن اۋا مەن قورشاعان ورتانى لاستاۋشىلار ويلارىنا كەلگەنىن ىستەپ, ەمىن-ەركىن تايراڭداي باستاعان. وسىنداي «جالپاقشەشەيلىكتىڭ» سالدارىنان وتكەن جىلى كپو ب.ۆ كەنىشىندە 1,2 ميلليون تەكشە مەتر كولەمىندەگى گازدى زاڭسىز جاعۋدىڭ 106 دەرەگى ورىن العان. تاعى ءبىر كوزجۇمبايلىقتىڭ سىرى تومەندەگىدەي. وتكەن 2014 جىلى قاراشانىڭ اياق كەزىندە قاراشىعاناق كەنىشىنە تاياۋ ورنالاسقان بەرەزوۆكا اۋىلى اۋماعىندا اۋاداعى كۇكىرتسۋتەگى مەن بەنزولدىڭ مولشەرى ءتيىستى نورمادان الدەقايدا كوپ بولعان. ونى «گانگ» اپپاراتى انىقتاعان. الايدا, سول تۇستا وسى كۇرت اۋىتقۋشىلىقتى ەكولوگيالىق مونيتورينگ ستانساسى كورسەتپەگەن. سول كۇندەرى بەرەزوۆكا تۇرعىندارىنىڭ جاپپاي ۋلانعانى بەلگىلى بولعان. ەكولوگيا دەپارتامەنتى جەتەكشىلەرى مۇنداي سالعىرتتىق ورىن العان وقيعاعا بايلانىستى قوزعالعان ءىستى تەرگەۋ مەن انىقتاۋعا كەدەرگى كەلتىرگەن. قىسقاسى, پروكۋراتۋرا ورگاندارى انىقتاعان دەرەكتەرگە سۇيەنسەك, زاڭدى تۇلعالار قورشاعان ورتاعا وراسان زور زيان تيگىزگەن. اتاپ ايتقاندا, ميلليردتاعان جانە ميليونداعان تەڭگە شىعىن كەلتىرگەن كاسىپورىنداردىڭ قاتارىندا كپو ب.ۆ شەتەلدىك كومپانياسى, «ورالويلەندگاز», «مۇناياۆتوترانس» جانە «باتىستابيعات» جشس بار. ايتسە دە, ەكولوگيا دەپارتامەنتى باسشىلارى وسى ورەسكەل جايتتەرگە وراي ەكولوگيالىق اۋديت جۇرگىزۋ تۋرالى شەشىم قابىلداماعان. سونىڭ سالدارىنان جەر قويناۋىن پايدالانۋشىلاردان بيۋدجەتكە ميللياردتاعان تەڭگە كولەمىندەگى سالىقتىق تولەمدەر تۇسپەي قالعان. تەمىر قۇسايىن. دەرەك: egemen.kz. سۋرەت: krasproc.ru.