پاۆلودار تاس جولدارىندا كولىك اپاتى جيىلەي تۇسكەن

وڭىرلىك پوليتسيا دەپارتامەنتى جەرگىلىكتى پوليتسيا قىزمەتىنىڭ مالىمەتىنشە, ايماقتا جول-كولىك اپاتتارى ازايماي تۇر.

– جىل باسىنان بەرى وبلىس اۋماعىندا 384 جول-كولىك وقيعاسى تىركەلىپ, 529 ادام زارداپ شەكتى, ونىڭ ىشىندە 99-ى كامەلەتكە تولماعاندار. وكىنىشكە قاراي, 25 ازامات قايتىس بولدى. موتوكولىك قاتىسقان 19 جول اپاتى تىركەلىپ, ولاردىڭ سالدارىنان 1 ادام كوز جۇمدى. تاعى 16-سى جاراقات الدى, – دەپ حابارلادى باسقارمادان.

جول اپاتتارىنىڭ كوبەيۋىنە بايلانىستى 585 جول ۋچاسكەسىنە تالداۋ جاسالىپ, تەكسەرىس جۇرگىزىلگەن. ناتيجەسىندە بارلىق انىقتالعان كەمشىلىكتەردى جويۋ بويىنشا ءتيىستى نۇسقامالار بەرىلىپ, 103 لاۋازىمدى جانە زاڭدى تۇلعا جاۋاپكەرشىلىككە تارتىلعان. ولارعا 4 ملن تەڭگەدەن استام سوماعا ايىپپۇل سالىنعان.

جىلدامدىق رەجيمىن بۇزۋ دەرەكتەرىنىڭ الدىن الۋ ماقساتىندا وبلىستا كۇن سايىن 10 «كيبەر-شەريف» ءموبيلدى اپپاراتتىق-باعدارلامالىق كەشەنى جۇمىس ىستەيدى. ولاردىڭ تورتەۋى رەسپۋبليكالىق جانە حالىقارالىق ماڭىزعا يە اۆتوجولداردا قىزمەت اتقارادى. سونىمەن قاتار, بارلىق ەراپ پلانشەتتەرىمەن ينتەگراتسيالانعان «وراكۋل-س» جۇيەسىنىڭ 10 اپپاراتتىق كەشەنىندە «قورعاۋ» باعدارلاماسى ەنگىزىلگەن.

بۇدان بولەك, رەسپۋبليكالىق ماڭىزدى اۆتوجولداردا («پاۆلودار-استانا», «پاۆلودار – اباي وبلىسى», «پاۆلودار – رف شەكاراسى») ورناتىلعان «زەرەك» كەشەندەرىنىڭ كومەگىمەن 3408 قۇقىقبۇزۋشىلىق انىقتالعان.

 پاۆلودار وبلىسى