«قازرەەستر» مەملەكەتتىك اقپاراتتىق جۇيەسى ۇلەسكەرلىكپەن قاتىسۋ شارتتارى مەن ولار بويىنشا تالاپ ەتۋ قۇقىقتارىن قايتا تابىستاۋ تۋرالى كەلىسىمدەردىڭ ورتالىقتاندىرىلعان ەسەبىن جۇرگىزەدى. جۇيە ۇلەستىك قۇرىلىس نارىعىندا تۇرعىن ءۇيدى «قوس» ساتۋ مۇمكىندىگىن بولدىرماۋ ءۇشىن ازىرلەنگەن. بىلتىرعى مامىردان باستاپ Qazreestr 2.0 جاڭا نۇسقاسى ىسكە قوسىلدى. ونداعى نەگىزگى وزگەرىس – eGov Mobile قوسىمشاسىندا ەلەكتروندىق تسيفرلىق قولتاڭبانى نەمەسە QR كودىن پايدالانا وتىرىپ, ەلەكتروندىق ۇلەسكەرلىكپەن قاتىسۋ شارتتارىن جاساسۋ, سونداي-اق ولاردى كەيىننەن اقپاراتتىق جۇيەدە اۆتوماتتى تۇردە تەكسەرۋ جانە تىركەۋ فۋنكتسيالارى ەنگىزىلدى. قازىر ورتاق قۇرىلىس جوبالارىن تەكسەرۋ قىزمەتى ەلىمىزدەگى بىرنەشە بانكتىڭ ءموبيلدى قوسىمشالارىندا, سونداي-اق ەلەكتروندىق ۇكىمەتتىڭ eGov Mobile ءموبيلدى قوسىمشاسىندا بار.
بۇل شەشىم ۇلەسكەرلىكپەن قاتىسۋ شارتتارىن بۇرمالاۋ تاۋەكەلدەرىن بارىنشا ازايتىپ, مەملەكەتتىك قىزمەتتى الۋدى ىڭعايلى ەتەدى. مىسالى, ەلەكتروندىق ۇلەسكەرلىكپەن قاتىسۋ شارتتارى ءۇشىن تىركەلۋ مەرزىمى 3 كۇننەن بىرنەشە ساعاتقا دەيىن قىسقاردى. وتكەن جىلدىڭ قورىتىندىسى بويىنشا جۇيەدە 10 مىڭنان استام ەلەكتروندى ۇلەسكەرلىكپەن قاتىسۋ شارتتارى تىركەلدى, بۇل قازرەەستردە تىركەلگەن كەلىسىمشارتتاردىڭ جالپى سانىنىڭ شامامەن 35%-ى.
بۇعان دەيىن تۇرعىن ءۇي-قۇرىلىس كووپەراتيۆتەرىنە قاتىسۋ شارتتارىن تىركەۋ تەك وففلاين رەجىمىندە كورسەتىلىپ كەلدى. شارتتاردى تىركەۋدى دە اكىمدىكتەر قاعاز جۇزىندە – تىركەۋ جۋرنالىندا جۇرگىزدى. مىسالى, تۇرعىن ءۇي كووپەراتيۆتەرى ۇلەسكەرلەرمەن قاعاز جۇزىندە كەلىسىمشارت جاساسىپ, ولاردى كەيىننەن تىركەۋ ءۇشىن اكىمدىكتەرگە تاپسىرسا, قازىر بۇل مەملەكەتتىك قىزمەت تولىعىمەن تسيفرلاندىرىلدى. بيىلدان باستاپ بارلىق تۇرعىن ءۇي-قۇرىلىس كووپەراتيۆتەرى قاتىسۋ شارتتارىن قازرەەستر جۇيەسى ارقىلى ونلاين تىركەۋى كەرەك. جۇيەدەگى جاڭاشىلدىق مەملەكەتتىك قىزمەتتەردى الۋ مەرزىمىن وڭتايلاندىرادى, قاتەلىكتەر جىبەرۋ تاۋەكەلىن بولدىرمايدى, سونىمەن بىرگە سىرتقى جۇيەلەرمەن ىڭعايلى اقپاراتتىق ءوزارا ارەكەتتەسۋ قۇرالدارىن ۇسىنادى.
