قانىش ساتباەۆتىڭ مۇراسىن جۇيەلەپ, جاڭا عىلىمي اينالىمعا ەنگىزۋ جولىندا م.اۋەزوۆ اتىنداعى ادەبيەت جانە ونەر ينستيتۋتىنىڭ عالىمدارى دايىنداعان بۇل ەڭبەك – اكادەميالىق دەڭگەيدەگى مازمۇندى, سالماقتى جيناق. وندا عالىمنىڭ گەولوگيا-مينەرالوگيا سالالارىنداعى زەرتتەۋلەرىمەن قاتار, پۋبليتسيستيكالىق جانە عىلىمي ماقالالارى, سيرەك كەزدەسەتىن سۋرەتتەرى مەن مۇراعاتتىق قۇجاتتارى توپتاستىرىلعان.
تۇساۋكەسەرگە ەلىمىزدىڭ عىلىم, ءبىلىم, مادەنيەت سالاسىنىڭ تانىمال وكىلدەرى, عالىمدار مەن زەرتتەۋشىلەر, قوعام قايراتكەرلەرى جانە باق وكىلدەرى قاتىستى. شارانى م.و. اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى, اكادەميك كەنجەحان ماتىجانوۆ جۇرگىزدى. كەنجەحان ىسلامجان ۇلى «ۇلتتىق رۋحتى ورلەتكەن ۇلى تۇلعا» اتتى كىرىسپە سوزىندە قانىش ساتباەۆتىڭ ۇلتتىق رۋحتى بيىكتەتكەن تۇلعالىق بولمىسىنا كەڭىنەن توقتالىپ, عالىمنىڭ قازاق ادەبيەتىنە, ادەبيەتتانۋ عىلىمىنا قوسقان ۇلەسى تۋرالى جان-جاقتى باياندادى. سونىمەن بىرگە اكادەميالىق جيناقتىڭ ەرەكشەلىگى مەن عىلىم ءۇشىن ماڭىزىن اتاپ ءوتتى. سالتاناتتى جيىندا بىرقاتار مازمۇندى باياندامالار وقىلىپ, ق.ساتباەۆتىڭ سان قىرلى ەڭبەگى جان-جاقتى تالقىلاندى.
اتاپ ايتقاندا, «قانىش – قازاق رۋحانياتىنىڭ قامقورشىسى» – پارلامەنت سەناتىنىڭ دەپۋتاتى, حيميا عىلىمدارىنىڭ دوكتورى, پروفەسسور, قر ۇعا اكادەميگى, «ق.ي.ساتباەۆ حالىقارالىق قورى» قوعامدىق قورىنىڭ قامقورشىلىق كەڭەسىنىڭ توراعاسى التىنبەك نۇح ۇلى, «ۇستاز ۇلاعاتى» – عالىم, تەحنيكا عىلىمدارىنىڭ دوكتورى, ۇعا اكادەميگى سۇلتانبەك قوجاحمەتوۆ, «قانىش يمانتاي ۇلىنىڭ گەولوگيا سالاسىنا قوسقان ۇلەسى» – مەملەكەت جانە قوعام قايراتكەرى, ۇعا اكادەميگى, گەولوگيا-مينەرالوگيا عىلىمدارىنىڭ دوكتورى سەرىكبەك داۋكەەۆ, «ينجەنەرلىك وي-سانا جانە ۇلتتىق رۋح» – قازاقستاننىڭ ەڭبەك سىڭىرگەن قايراتكەرى, ۇلتتىق جاراتىلىستانۋ عىلىمدارى اكادەمياسىنىڭ اكادەميگى, فيلوسوفيا عىلىمدارىنىڭ دوكتورى, پروفەسسور سىدىقوۆ ۇلىقپان, «قانىش ساتباەۆ جانە ۇلتتىق سانانىڭ جاڭعىرۋى» – گەولوگيا-مينەرالوگيا عىلىمدارىنىڭ دوكتورى, پروفەسسور ءادىلحان بايباتشا, «قانىش ساتباەۆ پلانەتاسى» – قر ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, «قانىش ساتباەۆ جانە قازاقتىڭ مۋزىكالىق مۇراسى» – قر ەڭبەك سىڭىرگەن قايراتكەرى, مۋزىكاتانۋشى, ءداستۇرلى انشى ەركىن شۇكىمان بايانداما جاسادى. قانىش يمانتاي ۇلىنىڭ قازاق عىلىمى مەن ۇلت رۋحانياتىن وركەندەتۋدەگى ەرەن ەڭبەگىنە توقتالىپ, عالىم جيناستىرعان بىرنەشە ءاندى ورىندادى.
شارانىڭ كەلەسى بولىمىندە «عىلىم ورداسى» رمك باس ديرەكتورى ۇلار مۇقاجانوۆ, بەلگىلى كومپوزيتور, پۋبليتسيست, قوعام قايراتكەرى ەرۋلان كاناپيانوۆ, قانىش يمانتاي ۇلىنىڭ تۋعان جەرىنەن ارنايى كەلگەن «اكادەميك ك.ي.ساتباەۆتىڭ باياناۋىل مەموريالدىق مۋزەيىنىڭ» باسشىسى قايىرگەلدى ابىلعازين قۇتتىقتاۋ ءسوز سويلەپ, بەس تومدىق جيناقتىڭ جارىققا شىعۋى – ەل رۋحانياتى ءۇشىن ۇلكەن ولجا ەكەنىنە نازار اۋداردى. كونفەرەنتسيادا “قازاقستان عىلىمىنىڭ تاريحى” مۋزەيى جانە ورتالىق عىلىمي كىتاپحانانىڭ ۇيىمداستىرۋىمەن قانىش ساتباەۆ ءومىرى مەن شىعارماشىلىعىنا ارنالعان كورمە كورسەتىلدى.
شارا اياسىندا سەنات دەپۋتاتى, اكادەميك التىنبەك نۇح ۇلى قانىش ساتباەۆتىڭ عىلىمي مۇراسىن زەردەلەۋگە ەلەۋلى ۇلەس قوسقان م.و. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ءىسلامجان ۇلىنا, اكادەميك سۇلتانبەك مىرزاحمەت ۇلىنا, فيلوسوف-عالىم ۇلىقپان ەسىلحان ۇلىنا جانە گەولوگيا عىلىمدارىنىڭ دوكتورى ءادىلحان بەكدىلدا ۇلىنا «قانىش ساتباەۆ مەدالىن» سالتاناتتى تۇردە تابىستادى.
جارىققا شىعىپ وتىرعان اكادەميالىق جيناقتى دايىنداۋ بارىسىندا عالىمدار تاراپىنان تەكستولوگيالىق زەرتتەۋلەرگە ايرىقشا ءمان بەرىلگەن. عالىمنىڭ بۇرىن جارىق كورگەن ەڭبەكتەرى العاشقى نۇسقالارىمەن سالىستىرىلىپ, ءتۇرلى باسىلىمداردا كەتكەن اۋىتقۋلار مەن بۇرمالانعان تۇستار مۇقيات سارالانىپ, قالپىنا كەلتىرىلدى. بۇل جيناقتا قانىش ساتباەۆتىڭ عىلىمي ءستيلى, اۆتورلىق بايانداۋى مەن ءتىلى بارىنشا ساقتالىپ, ۇسىنىلعان.
نۇر ماعازبەك,
م.اۋەزوۆ اتىنداعى ادەبيەت جانە ونەر
ينستيتۋتىنىڭ قىزمەتكەرى
