سۋرەت: ult.kz
يلليۋزيا: باعا ارزان بولىپ كورىنەدى, شىن مانىندە...
ء«بولىپ تولەۋدىڭ تەتىكتەرى حالىققا عانا ەمەس, ۇلتتىق بانككە دە تۇسىنىكسىز. دۇكەندەردىڭ تاۋار قۇنىن پايىزسىز ءبولىپ تولەۋىنىڭ استارىندا نە جاتقانىن انىقتاۋ – ۇلتتىق بانك ەمەس, باسەكەلەستىكتى قورعاۋ اگەنتتىگىنىڭ ماسەلەسى. ولار كاسىپكەرلەردەن باعا بەلگىلەۋدىڭ اشىقتىعىن تالاپ ەتۋگە ءتيىس», دەيدى ۇلتتىق بانك توراعاسىنىڭ ورىنباسارى بەرىك شولپانقۇلوۆ.
ساراپشىلاردىڭ ايتۋىنشا, ءبولىپ تولەۋدى رەتتەۋ باستاماسى ەكى جىل بۇرىن پايدا بولسا دا ناقتى شەشىم شىقپادى. بۇل جاعدايدا تۇتىنۋشىدا شارتتىڭ بارلىق تالابى, قىزمەت قۇنى جانە ىقتيمال ارتىق تولەۋ مولشەرى تۋرالى اقپارات جوق. سونداي-اق ءبولىپ تولەۋ شارتى بويىنشا نەسيە العان ادام كەشىكتىرىلگەن ايىپپۇلدار تۋرالى بىلمەۋى مۇمكىن جانە قايتا قۇرىلىمداۋدى پايدالانا المايدى.
ءبولىپ تولەۋ – بانكتىڭ مايلى جىلىگى
ساراپشى ەرلان يبراگيمنىڭ ايتۋىنشا, بۇل ماسەلە بانكتەر تۋرالى زاڭدا مىندەتتى تۇردە كورىنىس تابۋعا ءتيىس. «قازىر ءبولىپ تولەۋدى راسىمدەگەن كەزدە كومپانيا نەسيەنىڭ تولىق قۇنىن الدىن الا اشۋعا مىندەتتى ەمەس, ال سەن بارلىعىنا ءبىر باتىرمانى باسۋ ارقىلى قول قوياسىڭ. بۇل جاعدايدا مولشەرلەمە جىلدىق 70%-عا دەيىن بولۋى مۇمكىن», دەيدى ساراپشى.
«دۇكەندەردە, ساۋدا جەلىلەرىندەگى باعا ونلاين دۇكەندەگى باعامەن سالىستىرعاندا ارزان بولىپ كورىنەدى. بىزگە نارىقتىق ەكونوميكادا ءومىر ءسۇرىپ جاتقانىمىزدى ءتۇسىنۋ كەرەك. وتاندىق نارىقتىڭ دامىعان نارىقتان ەرەكشەلىگى – ەكونونوميكالىق رەسۋرسىمىزعا دەيىن يمپورتقا تاۋەلدى. ەو ەلدەرىندە ءىرى ساۋدا جەلىلەرى مەن تاۋار وندىرۋشىلەر اراسىندا بايلانىس بار. بۇل تاۋاردى نارىقتاعى باعادان 20%-عا دەيىن تومەن باعادا ۇسىنۋعا مۇمكىندىك بەرەدى. ال بىزدەگى جاعدايدا قارىز الۋشىعا ءبولىپ تولەۋ تارتىمدى بولىپ كورىنگەنمەن, بانكتەردىڭ مارجاسى باعا ىشىندە جاسىرىنىپ تۇرادى. كولىك پەن پاتەردى ءبولىپ تولەۋ ارقىلى ساتۋدى قانداي شارتتارمەن جانە قانداي باعامەن بەلگىلەيتىنىن ءبىز بىلمەيمىز. ساراپشى رەتىندە مەن مۇنىڭ ءبارى ۇلتتىق بانك پەن قنردا باقىلاۋىندا بولۋعا ءتيىس دەپ سانايمىن», دەيدى ساراپشى.
اسىرا سىلتەۋدىڭ اقىرى نە بولماق؟
وسى ماتەريالدى دايىنداۋ بارىسىندا الماتىداعى «التىن بازارى» ساۋدا ۇيىنە بارىپ, قۇنى 320 مىڭ تەڭگە تۇراتىن التىن بۇيىمدى 1 جىلعا بولگەن كەزدەگى قۇنى
380 مىڭ تەڭگە بولاتىنىن, 60 مىڭ تەڭگەنى ۇستەمە اقى رەتىندە تولەيتىنىن انىقتادىق. ساتۋشىنىڭ ايتۋىنشا, 320 مىڭ تەڭگە جەكە شوتىنا, 60 مىڭ تەڭگە ءبولىپ تولەۋدى راسىمدەگەن بانكتىڭ شوتىنا تۇسەدى. بانك ءبىر عانا التىن بۇيىمنان
60 مىڭ تەڭگە پايدا كورىپ وتىر. ەدب مۇنداي استىرتىن ارەكەتكە ۇلتتىق بانكتىڭ كوزىن بايلاپ قويىپ بارىپ وتىر دەگەنگە كوڭىل سەنبەيدى.
قىسقاشا ايتقاندا, ءبولىپ تولەۋ – تاۋاردىڭ بانكتىڭ پايىزدىق كىرىسىنىڭ كولەمىنە ۇلعايتىلعان قۇنى. كەي دۇكەندەر ءبولىپ تولەۋسىز العاندار ءۇشىن باعانى ءتۇرلى سىيلىق جانە بونۋسپەن وتەپ جاتادى. الايدا مۇنداي سىيلىقتاردىڭ كىمدەردىڭ ەسەبىنەن تولەنىپ جاتقانى بەلگىسىز. مىسالى, 500 مىڭ تەڭگە تۇراتىن تەلەديداردى سورەگە 750 مىڭ تەڭگە دەپ بەلگىلەپ, ونى 12 ايعا ءبولىپ تولەۋدى ۇسىنادى. سوندا بانك پەن كاسىپكەردىڭ پايداسى – 250 مىڭ تەڭگە.
بۇعان بانك كوزىمەن قاراساق, وتە پايدالى قۇرال. بىراق ۇب باسشىلارى ايتىپ وتكەندەي, تاۋار باعاسىندا ساتۋشى مەن بانكتىڭ بارلىق پايىزى مەن مارجاسى كىرىكتىرىلگەن. ءىس جۇزىندە قۇنى 320 مىڭ تەڭگەگە باعالانعان التىن بۇيىمنىڭ شىن باعاسى 290 نەمەسە 270 مىڭ تەڭگە بولۋى ابدەن مۇمكىن.
الماتى
