كەيىنگى جىلدارى وڭىردە دەنساۋلىق ساقتاۋ نىساندارىن جوندەۋ, جابدىقتاۋ, جاڭادان سالۋ جۇمىستارى قارقىندى جۇرگىزىلىپ كەلەدى. «اۋىل – ەل بەسىگى» مەملەكەتتىك باعدارلاماسى مەن «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ۇلان اۋدانىندا 5 جاڭا مەديتسينالىق پۋنكت سالىندى, 4 امبۋلاتوريا جوندەۋدەن ءوتتى. جاڭا ەمحانا عيماراتى زاماناۋي ستاندارتتار مەن تەحنولوگيالارعا ساي جابدىقتالعان.
– زاماناۋي ەمحانا تۇرعىنداردىڭ ءومىر ساپاسىن جاقسارتۋعا وڭ اسەر ەتەتىنى ءسوزسىز. وبلىس باسشىلىعى حالىقتىڭ دەنساۋلىعىن ساقتاۋ ماقساتىندا بارىنشا جۇمىس اتقارامىز, – دەدى سالتاناتتى شاراعا ارنايى كەلگەن وبلىس باسشىسى نۇرىمبەت ساقتاعانوۆ.
ەمحانادا دياگنوستيكا جۇرگىزۋ ءۇشىن ميكروبيولوگيالىق, سەرولوگيالىق زەرتتەۋلەر جۇرگىزۋگە مۇمكىندىك بەرەتىن باكتەريولوگيالىق زەرتحانا قاراستىرىلعان. فگدس, كولونو, ۆيدەوكولونوسكوپيا, رەنتگەن, مامموگرافيا, فليۋروگرافيا, ۋدز, فيزيوتەراپيا كابينەتتەرى جۇمىس ىستەيدى. مەكەمە قۇرامىنا قىسقامەرزىمدى ەمدەلۋگە ارنالعان كۇندىزگى ستاتسيونار, جوسپارلى, شۇعىل وپەراتسيالار جاسالاتىن وپەراتسيا بلوگى, ستوماتولوگيالىق, حيرۋرگيالىق كابينەتتەر كىرەدى.
سونىمەن قاتار تەراپەۆت كابينەتى مەن ءتورت شاقىرۋ ساناتى بويىنشا شۇعىل مەديتسينالىق كومەك ءبولىمى جۇمىس ىستەي باستادى. جاقىن ارادا جەدەل جاردەم ستانساسىن دا جاڭا ەمحانا عيماراتىنا كوشىرۋ جوسپارلانىپ وتىر.
شىعىس قازاقستان وبلىسى,
ۇلان اۋدانى
