كاسىپورىنداردىڭ اشىلۋ سالتاناتىندا ءسوز سويلەگەن قالا اكىمى عابيت سىزدىقبەكوۆ مەگاپوليس ەكونوميكاسى مەن ءوندىرىس سالاسى ءۇشىن بۇل ايتۋلى كۇن ەكەنىن جەتكىزدى. سونداي-اق جوبانى جۇزەگە اسىرۋعا اتسالىسقان بارشا ازاماتتارعا العىسىن ءبىلدىرىپ, كاسىپورىندى ىسكە قوسقان كومپانيالاردىڭ الداعى جۇمىسىنا ساتتىلىك تىلەدى.
ايتا كەتۋ كەرەك «وڭتۇستىك» ارنايى ەكونوميكالىق ايماعىندا ىسكە قوسىلعان ءوندىرىس وشاعىنىڭ ءبىرى «BIK Kanc» جشس. وندا ا4 جانە ا3 فورماتتاعى كەڭسە قاعازىنىڭ ءوندىرىسى باستالدى. جوبانىڭ جالپى قۇنى 500 ميلليون تەڭگەنى قۇرايدى. زاۋىت جىلىنا 3,5 ميلليون دانا قاعاز قاپتاماسىن شىعارىپ, 35 تۇراقتى جۇمىس ورنىن قامتاماسىز ەتەدى.
ەكىنشى كاسىپورىن جك «ZeineP» فيرماسى. كاسىپورىن بۇگىننەن باستاپ جىلىنا 10 مىڭ تونناعا دەيىن دەزينفەكتسيالىق قۇرالدار وندىرۋگە كىرىستى. مۇندا 80 ادام ەڭبەك ەتەدى. ونىمدەر ىشكى نارىقپەن قاتار, تمد ەلدەرىنە دە ەكسپورتتالاتىن بولادى.
ءۇشىنشى كاسىپورىن تۋرالى ايتساق, «جۇلدىز» يندۋستريالىق ايماعىندا ورنالاسقان «Sauran Bricks» جشس-ءنىڭ اۆتوكلاۆتى گازدى بەتون شىعاراتىن زاۋىتى پايدالانۋعا بەرىلدى. بۇل جوبا – وڭتۇستىك ءوڭىردى ساپالى ءارى قولجەتىمدى قۇرىلىس ماتەريالدارىمەن قامتاماسىز ەتۋ ماقساتىندا جۇزەگە اسىرىلىپ وتىر. جوبانىڭ جالپى ينۆەستيتسيالىق قۇنى – 7,8 ميلليارد تەڭگە. زاۋىت تولىق قۋاتتىلىققا شىققاننان كەيىن ءۇش اۋىسىمدا 150 ادامدى تۇراقتى جۇمىسپەن قامتۋ كوزدەلىپ وتىر. كاسىپورىننىڭ وندىرىستىك قۋاتى جىلىنا 200 مىڭ م³ كولەمدە (كۇنىنە 555 م³ نەمەسە ايىنا 16 500 م³) ءونىم شىعارۋعا قاۋقارلى.
جوبانى ىسكە اسىرۋ ءۇشىن «جۇلدىز» يندۋستريالىق ايماعىنان 5,2 گەكتار جەر تەلىمى بولىنگەن. قۇرىلىس-مونتاج جۇمىستارى تولىق اياقتالىپ, وندىرىستىك كەشەنگە قىتايدىڭ KEDA كومپانياسىنان جەتكىزىلگەن زاماناۋي, اۆتوماتتاندىرىلعان قۇرال-جابدىقتار ورناتىلعان. بۇل ءوندىرىس تيىمدىلىگىن ارتتىرىپ, شىعارىلاتىن ءونىمنىڭ ساپاسىن قامتاماسىز ەتۋگە مۇمكىندىك بەرەدى.
اتالعان كاسىپورىنداردىڭ ىسكە قوسىلۋى وڭىرلىك ەكونوميكانىڭ دامۋىنا, قۇرىلىس يندۋسترياسىنىڭ جاندانۋىنا, يمپورتتى الماستىرۋعا جانە جاڭا جۇمىس ورىندارىنىڭ اشىلۋىنا ەلەۋلى ۇلەس قوسادى دەيدى ماماندار.
ايتا كەتۋ كەرەك, ماڭىزدى ءۇش ءوندىرىس ورنىنىڭ اشىلۋ سالتاناتى 19 ماۋسىم – قالا كۇنىنە قاراي ورايلاستىرىپ وتكىزىلدى.
شىمكەنت
