قازىرگى كەزدە كوپشىلىك «OpenAI» كومپانياسىنىڭ «ChatGPT» مودەلىن ەڭ الدىڭعى قاتاردا دەپ بىلەدى. مودەل قولدانۋعا ىڭعايلى, جىلدام جاۋاپ بەرەدى ءارى تانىمال. الايدا «Google»-دىڭ «DeepMind» جۇيەسى باسەكەگە شىنداپ كىرىسكەن. ونىڭ ستراتەگياسى جاي عانا اقىلدى مودەل جاساۋمەن شەكتەلمەيدى. كومپانيا جاساندى ينتەللەكت سالاسىنداعى تۇتاس ينفراقۇرىلىمدى, مالىمەت وڭدەۋ قۋاتى, الگوريتمدەر, بۇلتتى سەرۆەرلەر, ارنايى چيپتەر, قولدانبالار مەن دەرەككوزدەردى ءبىر جۇيەگە توعىستىرۋدى قولعا العان. «DeepMind» جاساعان «Gemini» مودەلى ماتىنمەن عانا ەمەس, اۋديو, سۋرەت, ۆيدەو سياقتى مۋلتيمودالدى دەرەكتەرمەن دە جۇمىس ىستەي الادى. سونىمەن قاتار «YouTube», «Android», «Google Search» سياقتى الپاۋىت پلاتفورمالاردان دەرەك الا الاتىندىعى مودەلدەردىڭ ساپاسىن ارتتىرىپ, وقىتۋ بارىسىن ۇنەمى جەتىلدىرۋگە مۇمكىندىك بەرەدى. سالىستىرا ايتقاندا, «OpenAI» ءوز تەحنولوگيالارىن كوبىنە «Microsoft»-تىڭ «Azure» ينفراقۇرىلىمىنا سۇيەنە وتىرىپ دامىتادى. ال «Google» بارلىق قۇرالداردى ءوز ىشىندە دامىتا الاتىن ۆەرتيكالدى ينتەگراتسياعا يە. بۇل دەگەنىمىز – ولار جاساندى ينتەللەكتىنى ءوز بەتىمەن قۇرىپ, باسقارا الادى جانە تاۋەلدى بولمايدى.
سالا مامانى اسقار احمەدوۆتىڭ ايتۋىنشا, بۇگىنگى تاڭدا كىمنىڭ مودەلى اقىلدى دەگەن ساۋالدان گورى, كىم وسى تەحنولوگيانى ۇزاقمەرزىمدى, تۇراقتى جانە ءتيىمدى تۇردە دامىتا الادى دەگەن سۇراق الدەقايدا ماڭىزدىراق. «جاساندى ينتەللەكت نارىعى بۇگىندە جەتى الپاۋىت كومپانيانىڭ اينالاسىندا قۇرىلىپ وتىر. «OpenAI» («o3 Pro»), «Google DeepMind» («Gemini 2.5 Pro»), «DeepSeek» («r1»), «xAI» («Grok 3»), «Anthropic» («Claude Opus 4»), «Alibaba»(«Qwen 3»), «Meta» («Llama 4 Maverick»). رەيتينگ بويىنشا ينتەللەكتى ەڭ جوعارى ءۇش مودەل – «o3 Pro», «Gemini 2.5 Pro», «r1». بىراق جي ءونىمىن تاڭداۋدا تەك ينتەللەكت ماڭىزدى ەمەس. مودەل باعاسى, جىلدامدىعى, جاۋاپتىڭ دالدىگى مەن كونتەكست سىيىمدىلىعى سەكىلدى فاكتورلار دا شەشۋشى ءرول اتقارادى «OpenAI» اقىلدىراق شىعار, بىراق «Google» مودەلى الدەقايدا ارزان ءارى جىلدام. «Gemini 2.5 Pro» – ۇلكەن كولەمدەگى ءماتىندى بىردەن وڭدەي الاتىن, جىلدام, سەنىمدى جۇيە. «Google DeepMind»-تىڭ «YouTube», «Android», «Google Books» سياقتى دەرەكتەر كوزدەرىنە قولجەتىمدىلىگى ولاردى باسىم ەتەدى», دەيدى ول.
ناقتى دەرەكتەرگە سۇيەنسەك, «Artificial Analysis» كومپانياسىنىڭ باعالاۋى بويىنشا «OpenAI»-دىڭ «o3 Pro» مودەلى 71 ۇپاي جيناسا, «Google Gemini 2.5 Pro» – 70, «DeepSeek r1» 68 ۇپاي جيناعان. بىراق «OpenAI» مودەلى باسقا جۇيەلەردەن الدەقايدا قىمبات. ونىڭ ۇستىنە, «DeepSeek r1» جاۋابىن شامامەن 2 مينۋت كۇتۋ كەرەك بولسا, «Gemini 2.5 Pro» نەبارى 40 سەكۋندتا جاۋاپ بەرەدى. ال «ChatGPT» الدەقايدا ۇزاعىراق ويلانادى. كونتەكست سىيىمدىلىعى بويىنشا دا «Google» الدا. ول 800 مىڭ سوزگە دەيىنگى اقپاراتتى ءبىر جولدا وڭدەي الادى.
«كومپانيا تەك جي مودەلىن جاساپ قانا قويماي, ونى قايدا قولداناتىنىن, قانداي قۇرىلعىلار مەن سەرۆەرلەردە جۇمىس ىستەيتىنىن, دەرەكتەردى قايدان الاتىنىن جانە قانداي چيپتەرمەن ەسەپتەيتىنىن تولىق شەشىپ, ءوز قولىندا ۇستاۋى قاجەت. قازىرگى تاڭدا وسى تالاپقا تەك «Google» كومپانياسى ساي كەلەدى. مىسالى, «Meta»-دا بۇلتتىق ينفراقۇرىلىم جوق, ال «OpenAI» ءالى ءوز چيپتەرىن جاساپ بىتىرمەگەن. وسى سەبەپتى جي نارىعىندا تەك «Google» مەن «OpenAI» باستى باسەكەلەس رەتىندە قالادى. باسقالار ءۇشىن بۇل جارىس تىم قىمبات ءارى قيىن.
تاعى ءبىر ماڭىزدى باعىت – مۋلتيمودالدىلىق. بۇل دەگەنىمىز جي تەك ماتىنمەن عانا ەمەس, سۋرەتپەن, دىبىسپەن, بەينەمەن جانە ءتىپتى ۆيزۋالدى كورۋ ارقىلى دا جۇمىس ىستەي الۋى كەرەك. «Google» بۇل جاعىنان كوش باستاپ تۇر. ونىڭ «Veo 3» جۇيەسى بەينە جانە دىبىستى گەنەراتسيالايدى, «Imagen 4» ساپاسى جوعارى سۋرەت جاسايدى, «Project Astra» كامەرا ارقىلى كورىپ زاتتاردى تاني الادى, «AI Overviews» ىزدەۋ جۇيەسى كەز كەلگەن سۇراققا جىلدام ءارى ناقتى جاۋاپ بەرەدى. «OpenAI» دا ءماتىن, بەينە, سۋرەت جانە دىبىسپەن جۇمىس ىستەي الاتىن قۋاتتى مودەلدەر جاساپ جاتىر. بىراق «xAI» ۆيدەو جاساي المايدى. ال «DeepSeek»-تا دىبىس وڭدەۋ مۇمكىندىگى جوق, «Anthropic» بولسا ءالى دۇرىس سۋرەت تە جاساي المايدى», دەيدى اسقار احمەدوۆ.
قازىرگى تاڭدا جاساندى ينتەللەكت سالاسىنداعى دامۋدىڭ نەگىزگى كەدەرگىسى – ينفراقۇرىلىم شىعىندارىنىڭ شەكتەن تىس ءوسۋى. 2025 جىلى «Google», «Microsoft», «Meta», «Amazon» كومپانيالارى جاساندى ينتەللەكتىنى دامىتۋ ءۇشىن 315 ميلليارد دوللار كولەمىندە ينۆەستيتسيا سالماق. بۇل اقشا دەرەك ورتالىقتار سالۋعا, قۋاتتى سەرۆەرلەر ورناتۋعا, جۇيەلەردى سالقىنداتۋعا, ەلەكتر ەنەرگياسىن تولەۋگە جۇمسالادى. مىسالى, «Google» بيىل 12 جاڭا دەرەك ورتالىق اشۋدى جوسپارلاپ وتىر. ال «Microsoft» كومپانياسى «OpenAI»-مەن بىرىگىپ, تەك «GPT» ۇلگىلەرىنە ارناپ دەربەس ينفراقۇرىلىم سالۋعا 100 ميلليارد دوللاردان استام قارجى بولۋگە دايىن ەكەنىن مالىمدەدى.
ىزدەۋ جۇيەسى «Google»-عا بۇرىنعىداي تابىس اكەلمەيدى. سەبەبى «سۇراق-جاۋاپ» فورماتىنداعى اقپاراتتىق ىزدەۋ سۇرانىستارى «ChatGPT» مەن باسقا جي-بوتتارعا اۋىسىپ بارادى. سوندىقتان «Google Gemini» جۇيەسىن ىزدەۋ ينتەرفەيسىنە بىرىكتىرىپ, قولدانۋشىلاردى ءوز پلاتفورماسىندا ساقتاپ قالۋعا تىرىسىپ وتىر. بۇل تالپىنىس ونى باسەكەدە ءبىرىنشى ورىنعا شىعارىپ, ءوز ورنىن بەكىتۋىنە عانا ەمەس, نارىقتىڭ وزگەرۋىنە دە اسەرىن كۇشەيتە ءتۇستى. ساراپشىلاردىڭ پىكىرىنشە, الداعى بىرنەشە جىلدا جي نارىعىندا تەك «OpenAI», «Google DeepMind», «DeepSeek», «Alibaba» كومپانيالارى قالادى. سەبەبى جي دامۋىنا قاجەت رەسۋرستار, دەرەك, ەنەرگيا, چيپ, كادر, ينفراقۇرىلىم, كۇن ساناپ قىمباتتاپ, قولجەتىمسىز بولىپ بارادى.
