نۇراي دۇيسەنعاليەۆا, «جاسىل ەل» جوباسىنىڭ قاتىسۋشىسى:
– وتكەن جىلى اپكەم «جاسىل ەل» جوباسىنا قاتىسىپ, جاز بويى جۇمىس ىستەپ, جاقسى اقشا تاپتى. ونى كورىپ, مەن دە جازعى دەمالىسىمدى پايدالى ىسكە ارناعىم كەلدى. بىراق بۇل باعدارلاماعا تەك 14 جاستان باستاپ قابىلدايدى. سوندىقتان جاسىم تولعانىن اسىعا كۇتتىم. بيىل Instagram-داعى رەسمي پاراقشاسىنا جازىپ, قۇجاتتارىمدى تاپسىردىم. اتا-انام دا شەشىمىمدى قولداپ: «وزىڭە ۇناسا, جۇمىس ىستەي بەر», دەپ دەم بەرىپ قويدى. كوپ ۇزاماي, ماۋسىمنىڭ 2-سىنەن باستاپ جۇمىسقا كىرىسىپ كەتتىم. بۇل مەن ءۇشىن ەڭبەككە العاش ارالاسقان, جاڭا تاجىريبە مەن سەنىمدىلىك سىيلاعان قادام بولدى.
ءبىز ەكى توپقا ءبولىنىپ, قالاداعى ساياباقتاردا ارام ءشوپ ج ۇلىپ, گۇلدەر مەن اعاشتارعا سۋ قۇيىپ, قوقىس جيناپ, تازالاپ ءجۇرمىز. توپتا شامامەن ءجۇز شاقتى جاس بار. ءبارىن ەكى جەتەكشى قاداعالاپ وتىرادى.
قىدىرالى تىلەكقابىلوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى:
– شەت ءتىلى فيلولوگياسى ماماندىعىنىڭ تۇرىك ءتىلى باعىتىندا 3-كۋرستا وقيمىن. بيىلعى جاز – مەن ءۇشىن ەرەكشە. ويتكەنى ءبىلىمىمدى جەتىلدىرىپ, حالىقارالىق تاجىريبە جيناۋعا جولداما ۇتىپ الدىم. يۋنۋس ەمرە ينستيتۋتى ۇيىمداستىراتىن جازعى مەكتەپ باعدارلاماسى اياسىندا تۇركيانىڭ استاناسى انكارا قالاسىنا جول تارتقالى وتىرمىن.
باعدارلاما جايلى العاش ۇستازدارىم ايتقاندا, بىردەن قىزىعۋشىلىق تانىتىپ, قاجەتتى قۇجاتتاردى جيناپ, قاتىسۋعا ءوتىنىش بىلدىرگەنمىن. ءساتتى وتكەنىمدە ەرەكشە قۋاندىم. وقۋ ءۇش اپتاعا سوزىلادى. وسى ۋاقىت ىشىندە بىزگە تۇرىك ءتىلىن تەرەڭىرەك مەڭگەرۋگە ارنالعان ارنايى كۋرستار, ەلدىڭ مادەنيەتىنەن سىر شەرتەتىن ءىس-شارالار, تاريحي ورىندارعا ەكسكۋرسيالار ۇيىمداستىرىلادى. ەڭ كەرەمەتى – بارلىق شىعىنداردى (جول اقىسى, تۇرۋ, وقۋ) ينستيتۋت تولىقتاي ءوزى وتەيدى.
شەتەلگە العاش رەت بارا جاتىرمىن. سوندىقتان بۇل ساپار – مەن ءۇشىن تەك ءتىل ۇيرەنۋ عانا ەمەس, ءوزىمدى جاڭا ورتادا سىناپ كورۋ, باسقا مادەنيەتتى تانۋ جانە تۇلعالىق تۇرعىدا ءوسۋ مۇمكىندىگى. ەندى مىنە, شىلدە ايىن تاعاتسىزدانا كۇتىپ ءجۇرمىن.
نۇرگۇل تۇردالى, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى:
– وقۋىمنان بولەك, قوعامدىق جۇمىستارمەن تۇراقتى اينالىسامىن. سوندىقتان وسى جازدى قالاي وتكىزەمىن دەپ باس قاتىرمادىم. «جاستار رۋحى» جاستار قاناتىنىڭ بەلسەندىسى رەتىندە ءۇش ايدا بىرنەشە جوباعا قاتىسامىن. ونىڭ ءبىرى – «چەمپيوندىق رۋح» باستاماسى. جوبا اياسىندا ەلىمىزدىڭ تانىمال سپورتشىلارىمەن تاڭعى جاتتىعۋ جاساپ, ديالوگتىق الاڭداردا كەزدەسۋ وتكىزىپ, سپورتتىق تۋرنيرلەر ۇيىمداستىرامىز. مۇنداعى ماقسات – ەل ازاماتتارىن, اسىرەسە قاتارلاستارىمدى سالاماتتى ءومىر سالتىنا بەيىمدەۋ.
ودان بولەك, «ارداگەرلەردى ارداقتايىق» جوباسى اياسىندا ءار ايدا ەكى رەت ءىس-شارا وتكىزۋدى جوسپارلاپ وتىرمىز. بيىل جەڭىستىڭ 80 جىلدىعىنا وراي ءارى قاتارى سيرەگەن قاريالارىمىزدى ارداقتاۋ ماقساتىندا ۇيلەرىنە بارىپ, شارۋاشىلىقتارىنا كومەكتەسەمىز. وتانداستارىمىزدىڭ قازاق ءتىلىن ۇيرەنۋىنە سەپ بولاتىن «سويلە» تىلدەسۋ كلۋبىنىڭ جۇمىسىنا دا اتسالىسامىن.
قازىر رەسپۋبليكا كولەمىندە پرەزيدەنتتىڭ باستاماسىمەن «تازا قازاقستان» ەكولوگيالىق اكتسياسى ءوتىپ جاتىر. الماتى شاھارىنىڭ بەلسەندىلەرى جيىلىپ, ءار اپتانىڭ بەيسەنبىسى قالا ىشىندەگى نە سىرتىنداعى ساياباقتار مەن دەمالىس ورىندارىنا بارىپ, تازالىق جۇمىستارىن جۇرگىزەمىز.
ايدار ساعىمباي, تاراز گۋمانيتارلىق-تەحنيكالىق كوللەدجىنىڭ ستۋدەنتى:
– ماعان وقۋدا 2-3 كۇندىك دەمالىس بەرسە بولدى, باسقا جاققا مويىن بۇرماي, اۋىلعا تارتىپ كەتەمىن. بىلمەيمىن, اۋىل, ونداعى ءومىر سالتى, ءبىر تىنبايتىن تىرشىلىك ءبارىبىر جانىما جاقىن. قالانىڭ ءبىر ءسات دامىل تاپپايتىن تۇرمىسى, قۇجىناعان كولىك تىنىسىمدى تارىلتادى. ال اۋىل – ناعىز تىنىسىڭدى اشار كەڭىستىكتىڭ, ۇشى-قيىرى كورىنبەيتىن ەركىندىكتىڭ, مولشىلىقتىڭ مەكەنى.
بيىل جازعى دەمالىسىمدى ەش ويلانباستان اۋىلدا وتكىزەمىن دەپ شەشتىم. اكە-شەشەمە قولعابىس بولىپ, ءۇي شارۋاسىنا كومەكتەسەمىن. اۋىلدىڭ ساف اۋاسى دا كوڭىلىڭدى سەرپىلتىپ, ەڭبەككە دەگەن قۇلشىنىسىڭدى اشاتىنداي. الا تاڭمەن تالاسىپ, مالدى ورىسكە شىعارىپ, كولەڭكەدە اينالاڭا كوز تاستاپ قويىپ جاتۋدىڭ ءوزى دەمالىس ەمەس پە؟
«جازدىڭ ءبىر كۇنى جىلعا ازىق» دەگەندەي, قىسقى جەمشوپ دايىنداۋ دا بوس ۋاقىت قالدىرمايدى. اۋىل تىرشىلىگىنەن ءبىر جاعىنان دەنەڭ شىنىعادى, ىشكى ءتوزىمىڭ, جاۋاپكەرشىلىگىڭ قالىپتاسادى. اراسىندا بالالارمەن كوكپار تارتىپ, ساۋىق-سايران قۇرىپ تۇرامىز.
سامال بايدۋللا, استانا مەديتسينا ۋنيۆەرسيتەتىنىڭ ستۋدەنتى:
– بيىل جازدا كوپتەن كۇتكەن ارمانىم ورىندالىپ, «Work and travel» باعدارلاماسىمەن اقش-تا جۇمىس ىستەپ, ساياحاتتاۋعا مۇمكىندىك الدىم. جوبا تۋرالى العاش رەت مەكتەپتە جۇرگەندە ەستىگەن ەدىم. مەديتسينا سالاسىنا وقۋعا تۇسكەن سوڭ, ساباعىما باسىمدىق بەرىپ, بۇل ارماندى ءبىر شەتكە ىسىرۋعا تۋرا كەلدى. اراعا ۋاقىت سالىپ, جاقىن تانىستارىمنىڭ تاجىريبەسىن ەستىپ, «نەگە مەن دە بايقاپ كورمەيمىن؟» دەگەن وي تۋدى.
باعدارلاماعا قاتىسۋداعى باستى ماقساتىم اقشا تابۋ ەمەس-ءتىن. امەريكا – اۋزىن ايعا بىلەگەن, الەمدىك دەڭگەيدە ءوزىن دالەلدەگەن, عىلىم مەن مادەنيەت, تەحنولوگيادا كوش باستاپ تۇرعان مەملەكەتتىڭ ءبىرى. سودان بولار, بالا كۇنىمنەن بۇل ەلگە بارۋ ءبىر ماقسات بولدى. جەرگىلىكتى حالىقتىڭ ويلاۋ جۇيەسى, تۇرمىس-تىرشىلىگى قاتتى قىزىقتىراتىن. جالپى, اقش-تا ءومىر ءسۇرۋ, قىدىرۋ قوماقتى قاراجاتتى قاجەت ەتەدى. سوندىقتان وڭتايلى جولىن ىزدەپ, ءبىراز شەتەلدىك باعدارلامالاردى زەرتتەپ كوردىم. بىراق ءدال وسى «Work and travel» ستۋدەنت ءۇشىن ەڭ قولجەتىمدى ءارى ءتيىمدى مۇمكىندىك ەكەنىنە كوزىم جەتتى. ويتكەنى بەلگىلى ءبىر ۋاقىتتا جۇمىس ىستەي وتىرىپ, كۇنكورىس شىعىندارىڭدى جاباسىڭ, قاجەتتى زاتتارىڭدى ءوز ەڭبەگىڭمەن الاسىڭ. تاعى ءبىر وڭتايلى تۇسى – كادىمگى تۋريست سەزىنە المايتىن شىنايى امەريكانى كورەسىڭ.
قازىر مەن اقش-تىڭ ميچيگان شتاتى سەنت-يگناس قالاسىنداعى جەرگىلىكتى دۇكەندەر جەلىسىنىڭ بىرىندە كاسسير رەتىندە جۇمىس ىستەپ جاتىرمىن. مۇندا قىزمەتكەرلەر بىرنەشە فيليال اراسىندا اۋىسىپ ەڭبەك ەتەدى, بۇل ءوز كەزەگىندە امەريكالىقتارمەن تىكەلەي ارالاسۋعا, مادەني الماسۋعا مۇمكىندىك بەرەدى.
جالپى, ۋاقىتىمدى بارىنشا ءتيىمدى پايدالانۋعا تىرىسامىن. بۇعان دەيىن وقۋمەن قاتار قوسىمشا جۇمىس ىستەپ, ونلاين كۋرستار مەن YouTube ارقىلى جاڭا ءبىلىم ۇيرەنۋگە قۇشتار بولدىم. ءتۇرلى كوميۋنيتيلەردە ءوزىن-ءوزى دامىتۋعا ۇمتىلعان, ۇزدىكسىز قوزعالىستاعى ادامدار ورتاسىندا بولعان ۇنايتىن. قازىر دە شەتەلدە ءجۇرىپ, كوزقاراسىم ودان ءارى كوكجيەگىم كەڭەيىپ كەلەدى.
P.S. بايقاعانىمىزداي, جاۋاپتارى سان قيلى, بىراق بارىنە ورتاق ءبىر نارسە بار: ۋاقىتتى ۇتىمدى پايدالانۋ. دەمەك بۇگىنگى بۋىن ءار ساتىنەن ماعىنا ىزدەيدى, بۇل ولاردىڭ جاۋاپكەرشىلىگى مەن ومىرگە دەگەن سەرگەك كوزقاراسىن بايقاتادى.
دايىنداعان –
زەيىن ەرعالي,
«Egemen Qazaqstan»
