– الەمدىك كينووندىرىستە انيماتسيالىق فيلمدەرگە جۇزدەگەن ميلليون دوللار جۇمسالادى. بۇل شىعىن قىسقا مەرزىمدە الدەنەشە ەسە ارتىعىمەن تازا تابىس بولىپ قۇيىلادى. بىزدەگى جاعداي قالاي؟
جانىبەك ورازالى,
قازاقستان انيماتسيالىق كينوستۋديالار قاۋىمداستىعىنىڭ باسشىسى:
– شىنىمەن دە, الەمدىك كينووندىرىس انيماتسيالىق جوبالارعا جۇزدەگەن ميلليون دوللار جۇمسايدى. ءبىر عانا تولىقمەتراجدى ءمۋلتفيلمدى جاساۋعا ءۇش-ءتورت جىل ۋاقىت كەتەدى. مۇنداي ساپالى تۋىندىلار ءوز شىعىنىن ەسەلەپ قايتارىپ, ميللياردتاعان تابىس اكەلەدى. ال ەلىمىزدە بۇل سالا ەندى دامىپ كەلە جاتىر. بىزدە ءبىر تولىقمەتراجدى مۋلتفيلمگە بار بولعانى ءبىرجارىم-ەكى جىل ۋاقىت پەن شەكتەۋلى عانا قارجى بولىنەدى. وسىعان قاراماستان, وتاندىق ماماندار بار كۇش-جىگەرىن سالىپ, ساپالى دۇنيە جاساۋعا تىرىسىپ ءجۇر. بىراق تۇراقتى ءارى جۇيەلى قولداۋ بولماسا, بۇل سالا ءوز مۇمكىندىگىن تولىقتاي كورسەتە الماۋى مۇمكىن.
تىلەك تولەۋعازى,
رەجيسسەر-انيماتور:
– باسقا مەملەكەتتەردە ونەرگە, اسىرەسە شىعارماشىلىققا دەگەن كوزقاراس مۇلدە بولەك. ولار ونەر ادامدارىنىڭ ەڭبەگىن باعالاپ, شىعارماشىلىق ءونىمنىڭ ءمانىن, ماڭىزىن جاقسى تۇسىنەدى. مىسالى, «Disney» مەن «Pixar» ستۋديالارى ءوز ونىمدەرىنە اسا جاۋاپكەرشىلىكپەن قاراپ, ۇزاق ۋاقىت بويى ساپالى دۇنيە جاساۋعا تىرىسادى. ءبىر ءفيلمنىڭ وزىنە 500-دەن 1000 ادامعا دەيىن جۇمىس ىستەيدى. ماسەلەن, «باتىل جۇرەك» اتتى فيلمگە 185 ميلليون دوللار قارجى جۇمسالعان. ال بىزدە فيلم ءتۇسىرۋ ۋاقىتى تىم قىسقا. كوبىنە بيۋدجەت تەز يگەرىلۋى كەرەك بولعان سوڭ, شىعارماشىلىققا ۋاقىت از بولىنەدى. بالالار مەن جاسوسپىرىمدەرگە ارنالعان كونتەنتكە دەگەن سالعىرتتىق پەن تۇسىنىسپەۋشىلىك وتاندىق انيماتسيانىڭ دامۋىن تەجەپ وتىر. ال شەتەلدىك كومپانيالار ءوز سالاسىندا بىلىكتى ماماندارمەن بىرلەسىپ, ۇزاق زەرتتەپ, تالداپ بارىپ, ساپالى تۋىندى جاسايدى. سونىڭ ارقاسىندا جۇمسالعان قاراجات بىرنەشە ەسە پايدا بولىپ قايتادى. نەگىزى, بىزدە دە تالانتتى جاستار كوپ. مۇنداي جەتىستىككە جەتۋ ءۇشىن ەلىمىزدە دە ءتيىستى جۇيەنى وزگەرتىپ, ناقتى قولداۋ تەتىگىن ەنگىزۋ قاجەت.
تۇردىبەك مايدان,
رەجيسسەر-انيماتور:
– ارينە, «Walt Disney», «DreamWorks Animation», جاپونيادا انيماتسيا جاقسى دامىعان. «Walt Disney»-ءدىڭ جىلدىق اينالىمى – 60 ملرد دوللار. بىرىنشىدەن, «Walt Disney» الەمدىك دەڭگەيدە بولعاننان كەيىن, الەمدەگى بارلىق مىقتى مامانداردى وزدەرىنە جۇمىسقا الادى. ەكىنشىدەن, شەتەلدىك انيماتسيادا فيلمگە بايلانىستى, ءفيلمنىڭ سيۋجەتىنە بايلانىستى باعدارلامالار ويلاستىرىلادى. ودان كەيىن فيلمگە جارناما جاساۋ جۇمىسى جۇرگىزىلەدى. جارناما جاساۋ كوپ قارجىنى تالاپ ەتەدى. ال ءبىزدىڭ ەلدە بۇل سالا شەتەلدەن سالىستىرمالى تۇردە قاراعاندا قالىس قالىپ جاتىر. انيماتسياعا قولداۋ جوق ەمەس, قولداۋ بار, بىراق جۇيەلى ەمەس. ونى بەلگىلى ءبىر دەڭگەيدە جۇيەلەۋ كەرەك.
– قازىر بالالار قازاقشا مۋلتفيلم كورە مە؟
جانىبەك ورازالى:
– ءيا, كورەرمەن بار. قازاقتىلدى انيماتسياعا دەگەن سۇرانىس كۇن ساناپ ارتىپ كەلەدى. مۇنى YouTube پلاتفورماسىنداعى كورسەتكىشتەر ايقىن دالەلدەيدى. ماسەلەن, «بەسىك جىرى» ءمۋلتفيلمى 80 ميلليوننان استام قارالىم جيناسا, «مۇزبالاق» تۋىندىسى 10 ميلليوننان اسىپ تۇسكەن. بالالار بۇل مۋلتفيلمدەرگە پىكىر قالدىرىپ, ءوز اسەرلەرىمەن بەلسەندى تۇردە ءبولىسىپ جاتىر. دەمەك قازاق تىلىندەگى كونتەنت – اسا سۇرانىسقا يە. بۇل سۇرانىس ەسكەرىلمەسە, ونىڭ ورنىن سىرتقى, وزگە تىلدەگى ونىمدەر باسادى. ال «بالاپان» تەلەارناسىنىڭ بۇگىنگى كۇنگە دەيىن ۇزدىكسىز جۇمىس ىستەۋى – قازاقشا كونتەنتتىڭ ومىرشەڭدىگىنىڭ ناقتى دالەلى. ەگەر كورەرمەن بولماعاندا, بۇل ارنا باياعىدا جابىلىپ قالاتىن ەدى. ەندى وسى سۇرانىستى ەسكەرىپ, جۇيەلى قولداۋ مەن ساپالى ءونىم ارقىلى وتاندىق انيماتسيانى دامىتۋ – ۋاقىت تالابى.
تىلەك تولەۋعازى:
– ءيا, قازىرگى تاڭدا بالالار قازاق تىلىندە مۋلتفيلمدەر كورەدى. بىراق قازاق تىلىندەگى انيماتسيالىق كونتەنتتىڭ سانى وتە از. ماسەلەن, ءبىر ءماجىلىس دەپۋتاتى بالاسىنىڭ «بالاپان» تەلەارناسىنان قازاقشا مۋلتفيلمدەر كورىپ, ءتىلى قازاقشا شىققانىن ايتىپ ەدى. جاقىندا تۇساۋى كەسىلگەن «التىن ادام» ءمۋلتفيلمىن تاماشالاۋعا كەلگەن بالدىرعاندار ۇلكەن قىزىعۋشىلىق تانىتتى. كەيىپكەرلەرمەن بىرگە كۇيزەلىپ, شىن نيەتپەن سوڭىنا دەيىن قاراپ شىقتى. دەگەنمەن بالالار كوپ ۋاقىت وتكىزەتىن الەۋمەتتىك جەلىلەردە قازاقشا كونتەنت جەتىسپەيدى. ايتپەسە, بالالاردىڭ انا تىلىنە دەگەن قىزىعۋشىلىعى بار. مۇنداعى باستى ءرول اتا-انالارعا تيەسىلى. ەگەر ولار بالالارىنا قازاقشا مۋلتفيلم كورىپ, انا تىلىندە سويلەۋگە مۇمكىندىك جاساپ وتىرسا, بۇل بالالاردىڭ تىلدىك ورتادا ءوسىپ-جەتىلۋىنە ۇلكەن سەپ بولادى.
– مۋلتفيلمدەردى تاربيەلىك-تانىمدىق ءارى نارىققا بەيىمدەپ شىعارۋ ءۇشىن نە ىستەۋ قاجەت؟
جانىبەك ورازالى:
– تاربيەلىك ءمانى بار, تانىمدىق مازمۇندى مۋلتفيلمدەر جاساۋ – بۇگىنگى كۇننىڭ باستى تالابى. الايدا ونى نارىققا بەيىمدەمەي جاساۋ مۇمكىن ەمەس. ول ءۇشىن بىرنەشە نەگىزگى شارت ورىندالۋعا ءتيىس. بىرىنشىدەن, كاسىبي ماماندار قاجەت. انيماتسيا – كۇردەلى شىعارماشىلىق پەن تەحنولوگيانىڭ قوسىندىسى. قوزعالعاننىڭ ءبارى مۋلتفيلم بولا بەرمەيدى. ەكىنشىدەن, مەملەكەتتىك قولداۋ جۇيەلى تۇردە جۇرگىزىلۋى كەرەك. قارجىلاندىرۋ ءبىر جولعى ەمەس, ۇزاقمەرزىمدى باعدارلاما نەگىزىندە جۇزەگە اسۋى شارت. ۇشىنشىدەن, قازىرگى بالالار نەگە قىزىعادى, قانداي كەيىپكەرلەرگە ەلىكتەيدى – وسى سۇرانىستى ناقتى زەرتتەۋ قاجەت. سونىمەن قاتار زاماناۋي تەحنولوگيانى مەڭگەرۋ – باستى تالاپ. 3D سياقتى انيماتسيالىق ادىستەردى يگەرۋ ءۇشىن ينفراقۇرىلىم عانا ەمەس, ماماندىقتى ۇيرەتەتىن ۇستازدار مەن كۋرستار قاجەت. ەگەر وسى تەتىكتەر ىسكە قوسىلسا, قازاق مۋلتفيلمدەرى تاربيە مەن تابىستى قاتار الىپ جۇرە الادى.
تۇردىبەك مايدان:
– كەز كەلگەن كوركەم فيلم بولسىن, مۋلتفيلم بولسىن, ەڭ باستىسى, تۋىندىنىڭ وزەگى مەن يدەياسى. سول ارقىلى بالاعا نە ايتقىڭ كەلەدى, كورەرمەنگە نە ايتقىڭ كەلەدى دەگەن دۇنيە وتە ماڭىزدى. بىزدە كوتەرەتىن يدەيا وتە كوپ. مىسالى, تانىمدىق دەڭگەيدە تاربيەلىك يدەولوگيانى ناسيحاتتايتىن ءارى نارىقتىق دەڭگەيدە بەيىمدەۋ ءۇشىن, بىرىنشىدەن, تاجىريبەلى مامان بولۋى قاجەت. تاجىريبەلى ستسەناريست, تاجىريبەلى كوماندا جۇمىس جاساۋ كەرەك. كولەمدى تەحنيكا مەن اۋقىمدى ەسەپتەرگە بايلانىستى رەجيسسەردىڭ يدەياسىندا ۇلكەن ساحنالاردى شىعارۋ ءۇشىن سىرتتان ماماندار تارتا الاتىن دەڭگەيدە مۇمكىندىك بولسا, ارينە, نارىققا بەيىمدەلىپ, ۇلكەن شىعارماشىلىقتا دا ساپا بولادى. قازاق بالالارىنىڭ وعان ساناسى دا, مۇمكىندىگى دە جەتەدى. وسى ورايدا توكيو فەستيۆالىنەن جۇلدە العان «شاڭىراقتىڭ يەسى كىم؟» دەگەن ءمۋلتفيلمدى ايتامىز. دەمەك بۇل قازاق رەجيسسەرلەرىنىڭ قولىنان ساپالى مۋلتفيلم جاساۋ كەلەدى دەگەن ءسوز. ەندى تەك جۇيەلى جۇمىس بولسا, ءبىز دە الەمدىك نارىققا شىعاتىن تۋىندىلار جاساي الامىز.
تىلەك تولەۋعازى:
– ەڭ الدىمەن, مۋلتفيلم جاسايتىن ادام بالالاردىڭ قىزىعۋشىلىعىن, كوزقاراسىن جانە تالعامىن ەسكەرۋى قاجەت. سونىمەن قاتار الەمدىك ءىرى ستۋديالاردىڭ شىعارماشىلىق تاجىريبەسىن زەرتتەپ, ودان تىڭ يدەيالار الۋ كەرەك. مۋلتفيلم جاساۋ – ۇلكەن ەڭبەك پەن ءبىلىمدى قاجەت ەتەتىن سالا. بۇل جۇمىستى ءوز ءىسىنىڭ شەبەرى, بىلىكتى مامان اتقارا الادى. ەگەر مەملەكەت تاراپىنان قولداۋ بولىپ, مامان دا كاسىبي تۇرعىدا مىقتى بولسا, وندا ساپالى ءارى نارىقتا سۇرانىسقا يە ءونىم شىعارۋ ابدەن مۇمكىن. دەمەك تابىستى مۋلتفيلم جاساۋ ءۇشىن ەكى نەگىزگى نارسە كەرەك: ءبىلىمدى مامان جانە تۇراقتى قولداۋ.
– انيماتسيالىق ءفيلمنىڭ ساپاسى سىن كوتەرۋى ءۇشىن قانداي تالاپتارعا جاۋاپ بەرۋ كەرەك؟
جانىبەك ورازالى:
– انيماتسيالىق ءفيلمنىڭ ساپالى شىعۋى ءۇشىن بىرنەشە ماڭىزدى تالاپ ورىندالۋى كەرەك. بىرىنشىدەن, بۇل – ۋاقىت پەن قارجىنىڭ جەتكىلىكتى ءبولىنۋى. ەڭ الدىمەن, ۋاقىت كەرەك. ءبىر قىسقامەتراجدى مۋلتفيلمگە كەمىندە 9-12 اي, ال تولىقمەتراجدى مۋلتفيلمگە 2-3 جىل ۋاقىت قاجەت. اسىعىس جاسالعان جۇمىس – ساپاسىز ءونىمنىڭ باستاۋى. مەملەكەتتىك قولداۋ ءبىر جىل بەرىلىپ, كەلەسى جىلى توقتاپ قالماۋى كەرەك. مىسالى, «التىن ادام» ءمۋلتفيلمى بەس جىلدان اسا ۋاقىت جاسالدى, بىراق سونىڭ تەك ءبىر جىلى عانا ءتيىمدى جۇمىسقا جۇمسالدى. بۇل جۇيەسىزدىك پەن تۇراقسىز قارجىلاندىرۋدىڭ سالدارى. كەلەسى تالاپ – قارجى. قارجى تۇراقتى ءارى جەتكىلىكتى بولعانى ءجون. مىسالى, الەمگە تانىمال «ماشا مەن ايۋ» ءمۋلتفيلمىنىڭ 15 مينۋتتىق ءبىر سەرياسىن جاساۋعا جۇمسالاتىن قارجى كولەمى – «بالاپان» ارناسىنىڭ بىرجىلدىق بيۋدجەتىنەن اسىپ تۇسەدى. وسى دەرەكتىڭ ءوزى ءبىزدىڭ جاعدايدىڭ قانداي ەكەنىن كورسەتەدى. سونداي-اق كاسىبي شىعارماشىلىق توپ, ساپالى ستسەناري, كوركەمدىك رەداكتسيا جانە زاماناۋي تەحنيكالىق بازا قاجەت. ەگەر بۇل تالاپتار ساقتالسا, ساپالى ءونىم شىعارۋعا تولىق مۇمكىندىك بار.
تىلەك تولەۋعازى:
– انيماتسيالىق ءفيلمنىڭ ساپالى بولۋى ءۇشىن, ەڭ الدىمەن, تەحنيكالىق تالاپ تولىق ورىندالۋى كەرەك. جۇمىس جۇيەلى تۇردە جۇرگىزىلىپ, مەملەكەت تاراپىنان تۇراقتى قولداۋ كورسەتىلۋى ماڭىزدى. ارنايى باعدارلامالاردا سۋرەت سالۋدىڭ ءوز ولشەمى, ءتارتىبى بار. مىسالى, بيىل «بالاپان» تەلەارناسىنا قارجى بولىنبەگەندىكتەن, بىرقاتار ستۋديا مەن كومپانيا ۋاقىتشا جۇمىسىن توقتاتۋعا ءماجبۇر بولدى. مۇنداي جاعداي بولماۋى ءۇشىن سالادا تۇراقتىلىق پەن جوسپارلى قارجىلاندىرۋ جۇيەسى ورناۋى كەرەك. سوندا عانا انيماتسيا ءوندىرىسى توقتاۋسىز جۇرەدى, ساپالى تۋىندىلار پايدا بولادى.
ءيا, ساپا – تەحنيكانىڭ مۇمكىندىكتەرىنەن تۋاتىن دۇنيە. ساپا بولۋ ءۇشىن كومپيۋتەرلىك بازا كەرەك. وسىعان وراي رەجيسسەردىڭ ويى دا شەكتەلە بەرەدى. قارجىنىڭ جەتپەۋى, ۋاقىتتىڭ جەتپەۋى, وسى ايتىلعان تەحنيكالىق مۇمكىندىككە بايلانىستى. ونىڭ بارلىعى ءبىلىم ساپاسىنا اسەر ەتەدى. رەجيسسەردىڭ بىلىكتىلىگى ءفيلمنىڭ ساپاسىنا عانا ەمەس, ستسەناري جازۋدان باستاپ, ءفيلمدى اياقتاپ, مونتاج جۇمىستارى مەن مۋزىكاسىنا بايلانىستى بولادى.
– قازىرگى زاماناۋي قوعامنىڭ بالالارىن قىزىقتىراتىن كەيىپكەر قانداي بولۋى كەرەك؟
جانىبەك ورازالى:
– زاماناۋي بالانى قىزىقتىراتىن كەيىپكەر – بىرىنشىدەن, ەموتسيونالدى تۇرعىدا جاقىن بولۋى كەرەك. «Disney»-ءدىڭ ەلزاسى, «Pixar»-دىڭ كەيىپكەرلەرى بالالاردىڭ قيالىنا, ارمانىنا ساي جاسالعان. ولار تەك ەرلىكپەن ەمەس, سۇلۋلىقپەن, نازىكتىكپەن, وزىندىك دارالىعىمەن باۋراپ الادى. سوندىقتان دا قازىرگى بالالارعا ءبىر عانا قاھارمان وبرازى ەمەس, ءتۇرلى مىنەز, ءتۇرلى بەينە قاجەت. بۇعان بايلانىستى ىزدەنىس كوپ.
تىلەك تولەۋعازى:
– مۋلتفيلمدەگى كەيىپكەرلەر قاتارىندا قىز بالا دا, ەر بالا دا بولۋى شارت. ماسەلەن, «Disney» ستۋدياسىنىڭ سوڭعى تۋىندىلارىندا قىز بالالاردىڭ ءرولى باسىمىراق. بىراق بىزدە, اسىرەسە ۇلتتىق تانىمىمىزدا, ۇل مەن قىزدىڭ وزىندىك ەرەكشەلىگى بار. سول قاسيەتتەردى ەكراندا ۇيلەسىمدى, ءساتتى بەرە بىلسەك, ءاربىر بالا ءوزىن سول كەيىپكەر ارقىلى تابا الادى. شەتەلدىك كەيىپكەرلەرگە ەلىكتەپ جۇرگەن بالالارعا بالاما رەتىندە ءوز ەرتەگىلەرىمىزدەگى باتىرلاردى, اڭىز كەيىپكەرلەرىمىزدى زاماناۋي فورماتتا ۇسىنىپ كورسەتۋگە بولادى. بۇل ارقىلى ۇلتتىق قۇندىلىقتاردى دارىپتەپ, ادامگەرشىلىك, ىزگىلىك سىندى قاسيەتتەردى بالا ساناسىنا سىڭىرۋگە جول اشىلادى. كەيىپكەر زاماناۋي, تارتىمدى بولا تۇرا, ۇلتتىق رۋحانيات پەن تاربيەگە نەگىزدەلۋگە ءتيىس. سوندا عانا بالالار وعان ەلىكتەپ وسەدى.
– بۇگىنگى قازاق انيماتسياسىندا باسەكە بار ما؟
تۇردىبەك مايدان:
– ارينە, بار. باسەكەسىز بۇل سالا دامىمايدى. كەيىنگى جىلدارى بىرقاتار ستۋديا قۇرىلدى. استانا, الماتى, شىمكەنت قالالارىندا انيماتسيالىق كوماندالار كوپ. ولاردىڭ بەلگىلەنگەن جىلدىق جوسپارى بار. سول ارقىلى جۇمىس ىستەپ, دامىپ جاتىر. بىراق باسەكە قاي دەڭگەيدە ەكەنىن ايتۋ قيىن. ءبارى الەمدىك دەڭگەيدەگى فەستيۆالدارعا قاتىسىپ, باق سىناپ ءجۇر. الىس-جاقىن شەتەلدەردىڭ كوزقاراسىندا دا قازاق انيماتسياسى جاقسى كوتەرىلىپ كەلەدى.
جانىبەك ورازالى:
– ءيا, قازىرگى قازاق انيماتسياسىندا باسەكە بار. ەلىمىزدە 40-تان استام انيماتسيالىق ستۋديا جۇمىس ىستەيدى. نەگىزگى قارجىلاندىرۋ كوزدەرى – «بالاپان» تەلەارناسى مەن ۇلتتىق كينونى قولداۋ ورتالىعى. بۇل مەكەمەلەرگە جۇزدەگەن ءوتىنىم ءتۇسىپ, جوبالار ىرىكتەۋدەن وتەدى. مۇنداي باسەكەلەستىك ساپانىڭ ارتۋىنا, مازمۇنى مەن ءستيلى ءارتۇرلى انيماتسيالىق جوبالاردىڭ كوبەيۋىنە مۇمكىندىك بەرەدى.
تىلەك تولەۋعازى:
– شىعارماشىلىق تۇرعىدان باسەكە بار. قازىرگى تاڭدا ەلىمىزدە جۇمىس ىستەپ جاتقان انيماتسيالىق ستۋديالاردىڭ كوپشىلىگىندە جاستار ەڭبەك ەتەدى. ولار جاڭا تەحنولوگيالاردى, زاماناۋي باعدارلامالاردى جەتىك مەڭگەرگەن. ءبىر-ءبىرىنىڭ جۇمىسىن كورىپ, تاجىريبە الماسىپ, شىعارماشىلىق تۇرعىدا جارىسىپ ءجۇر. سوڭعى كەزدەرى مەملەكەت قارجىسىنا تاۋەلسىز, جەكە قارجىلاندىرۋمەن جۇمىس ىستەيتىن ستۋديالار كوبەيىپ كەلەدى. بۇل – وتە جاقسى ءۇردىس. الايدا مەملەكەت تاراپىنان تولىققاندى جۇيەلى قولداۋ بولماسا, مۇنداي شىعارماشىلىقتىڭ تۇراقتىلىعى تومەندەۋى مۇمكىن. سوندىقتان جاس ستۋديالارعا مۇمكىندىك بەرىپ, قولداۋ كورسەتۋ ماڭىزدى.
– ەلىمىزدە ەندى دامىپ كەلە جاتقان قازاق انيماتسياسىندا بىلىكتى ماماندار قانشالىقتى جەتكىلىكتى؟ كادر دايارلاۋ ماسەلەسى قالاي شەشىلىپ جاتىر؟
جانىبەك ورازالى:
– انيماتسيا سالاسىنداعى كادر تاپشىلىعى – بۇگىنگى كۇننىڭ ەڭ وزەكتى ماسەلەلەرىنىڭ ءبىرى. قازىر بۇل باعىتتا قازاق ۇلتتىق ونەر ۋنيۆەرسيتەتى, ت.جۇرگەنوۆ اتىنداعى ونەر اكادەمياسى جانە ءا.قاستەەۆ اتىنداعى شىمكەنت قالالىق ونەر جانە ديزاين كوللەدجى ماماندار دايارلاپ كەلەدى. دەگەنمەن مەملەكەت بولەتىن گرانت سانى از, ال 3D انيماتسيانى وقىتاتىن كاسىبي ماماندار تاپشى. انيماتسيا – تەك سۋرەتشى ەمەس, انيماتور, ستسەناريست, رەجيسسەر, دىبىس مامانى, 3D مودەلدەۋشى سياقتى كوپتەگەن ماماندىقتى بىرىكتىرەتىن كۇردەلى سالا. سوندىقتان بۇل باعىتتا قىسقامەرزىمدى كۋرستار اشۋ, شەتەلدىك تاجىريبەلى مامانداردى تارتۋ نەمەسە وتاندىق كادرلاردى شەتەلگە وقۋعا جىبەرۋ اسا قاجەت.
تىلەك تولەۋعازى:
– انيماتسيا سالاسىندا بىلىكتى مامانداردىڭ جەتىسپەۋشىلىگى – ۇلكەن ماسەلە. ەگەر جىلىنا ءۇش-ءتورت تولىقمەتراجدى فيلم تۇسىرىلسە, كادر تاپشىلىعى قاتتى بايقالادى. ءبىلىم جۇيەسىندە ءالسىز تۇستار كوپ. بۇرىن ساباق بەرگەن بىلىكتى ۇستازدار زەينەتكە كەتىپ, ورنىنا كەلگەن جاستاردىڭ ىشىندە كاسىبي ماماندار از. سوندىقتان انيماتسيا سالاسىندا تاجىريبەسى مول, تەحنيكانى مەڭگەرگەن مامانداردى وقۋ ورىندارىنا تارتۋ قاجەت. سونىمەن قاتار ستۋدەنتتەردى ناقتى جوبالارعا قاتىستىرۋ, وندىرىستىك تاجىريبەدەن ءجيى وتكىزۋ ماڭىزدى. وقۋ باعدارلامالارىن جاڭارتىپ, زاماناۋي تەحنولوگيالاردى مەڭگەرگەن بىلىكتى ۇستازداردى شاقىرۋ كەرەك. وقۋعا قابىلداناتىن ستۋدەنتتەردى ىرىكتەۋدە دە تالاپ كۇشەيتىلىپ, بولاشاعىنان ءۇمىت كۇتتىرەتىن تالانتتى جاستاردى قابىلداۋ قاجەت.
– تولىمدى ويلارىڭىزعا راحمەت.
دايىنداعان –
مارجان ءابىش,
«Egemen Qazaqstan»
