سۋرەت: astanatv.kz
«ورتالىق ازيا – قىتاي» ءسامميتى مەملەكەت باسشىلارىنىڭ باستامالارىن جۇزەگە اسىرۋعا, ايماقتاعى تۇراقتىلىقتى ساقتاۋعا, مەملەكەتتەر اراسىنداعى ساياسي-ەكونوميكالىق ىقپالداستىقتى دامىتۋعا نەگىز بولارى ءسوزسىز. قازاقستان ءۇشىن بۇل كەزدەسۋلەر ەل بەدەلىن ارتتىرىپ قانا قويماي, ەلىمىزدىڭ ىلگەرى دامۋىنا جول اشادى. ىرىسىمىزدى ەسەلەيتىن, ىقپالداستىقتى كۇشەيتەتىن وسىنداي سالماقتى كەزدەسۋلەر ارقىلى ەلىمىزدىڭ ايماقتاعى, سونداي-اق الەمدەگى بەدەلى ارتا تۇسەتىنى انىق.
سي ءتسزينپيننىڭ قازاقستانعا جاساعان ساپارى ەكى مەملەكەت اراسىنداعى ەرەكشە سەنىم بەلگىسى بولدى. كەيىنگى جىلدارى استانا ايماقتا باستاماشىل الاڭعا اينالدى. بۇل رەتتە «ورتالىق ازيا – 2040» تۇجىرىمداماسىنىڭ بەرەرى كوپ.
2024 جىلدىڭ ءبىرىنشى جارتىسىندا قىتاي وزگە مەملەكەتتەرگە تىكەلەي 58,6 ملرد دوللار ينۆەستيتسيا قۇيدى, سونىڭ تەڭ جارتىسىنا جۋىعى (47%) ورتالىق ازيا مەملەكەتتەرىنە باعىتتالىپ وتىر. ماسەلەن, قازاقستان (10,4 ملرد), تۇرىكمەنستان (9,5 ملرد) جانە وزبەكستان (4,3 ملرد) دوللار ينۆەستيتسيا الىپ, ارىپتەستەر قاتارىنا قوسىلعان. سونداي-اق قىتاي مەملەكەتى ءوندىرىس جانە ەنەرگەتيكاعا باسىمدىق بەرەدى. ەنەرگەتيكاداعى ينۆەستيتسياسىن ەكى ەسەگە ارتتىرىپ (4,1 ملرد), وندىرىستەگى كورسەتكىشىن 8 پايىزعا (11,8 ملرد) جەتكىزۋى – سونىڭ ايعاعى.
سوندىقتان دا «ورتالىق ازيا – قىتاي» سامميتىنە ايماقتاعى تۇراقتىلىق پەن دامۋدىڭ ىرگەتاسىن قالايتىن جيىن رەتىندە ۇمىتپەن قارايمىز. بۇل ورايدا قازاقستاننىڭ باستاماشىل مەملەكەت رەتىندە بەدەلىنىڭ ارتۋى وتانداستارىمىزدى قۋانتادى دەپ ويلايمىز. ايماقتىڭ اۋىزبىرلىگىن نىعايتاتىن قادامداردىڭ وڭىنان بولۋىنا تىلەكشىمىز.
ەلنۇر بەيسەنباەۆ,
ءماجىلىس دەپۋتاتى
