سۋرەت: kaz.inform.kz
جىل بويى بەيجىڭ, شانحاي, سيان, ءۇرىمشى, گونكونگ قالالارىندا قازاقستان وڭىرلەرىنىڭ تۋريزم كۇندەرى, تاقىرىپتىق اپتالىق پەن اۋقىمدى مادەني ءىس-شارالار ۇيىمداستىرىلدى. ەلىمىز حالىقارالىق تۋريزم الاڭدارى – COTTM, ITB China, ITE Hong Kong كورمەلەرىندە لايىقتى دەڭگەيدە تانىستىرىلدى. بۇل ءوز كەزەگىندە شەتەلدىك سەرىكتەستەرمەن جاڭا ىسكەرلىك بايلانىس ورناتۋعا جانە ەلدىڭ تۋريستىك برەندىن ىلگەرىلەتۋگە مۇمكىندىك بەردى.
مادەني باعدارلاما دا مازمۇندى بولدى. شاندۋن جانە حەبەي پروۆينتسيالارىندا قازاق ونەرپازدارىنىڭ قاتىسۋىمەن ۇلكەن كونتسەرتتەر ءوتتى, ال «التىن ادام» جانە « ۇلى دالا» كورمەلەرىندە ۇلتتىق مۋزەيدىڭ بىرەگەي جادىگەرلەرى قىتايلىق كورەرمەنگە ۇسىنىلدى.
ءىرى وقيعالىق جوبالار دا نازاردان تىس قالعان جوق. جىبەك جولى باعىتىنداعى اۆتوكەرۋەندەر, Peking–Paris Motor Challenge ءرالليى جانە موتو-تۋرلارعا 500-گە جۋىق ادام قاتىسىپ, ايماقتىڭ تاريحي-مادەني بايلانىستىڭ وزەكتىلىگىن ايقىنداي ءتۇستى.
اقپاراتتىق ناۋقان اۋقىمدى ناتيجەگە قول جەتكىزدى. رەسمي مالىمەتتەرگە سايكەس, قازاقستان ءتۋريزمىنىڭ قىتايداعى جىلى 1,8 ملرد قارالىم جيناسا, الەۋمەتتىك جەلىلەردە ەل تۋرالى جاريالانىمداردى 160 ملن ادام كورگەن. بۇل – ەلدىڭ حالىقارالىق اقپاراتتىق كەڭىستىكتەگى بەدەلىن ارتتىرۋدا ايتارلىقتاي جەتىستىك.
ناقتى ناتيجەلەر دە بايقالدى: قىتايدان قازاقستانعا كەلەتىن تۋريستەر سانى 50%-عا ءوستى, ال ەلىمىز قىتاي ازاماتتارى ءۇشىن تانىمال تۋريستىك باعىتتار رەيتينگىسىندە 40-ورىننان 29-ورىنعا كوتەرىلدى. بۇعان 2023 جىلعى 10 قاراشادان باستاپ كۇشىنە ەنگەن ۆيزاسىز رەجىم ايتارلىقتاي ۇلەس قوستى. قازاقستان – ورتالىق ازيا ەلدەرى ىشىندە قىتايمەن مۇنداي كەلىسىمگە قول جەتكىزگەن العاشقى مەملەكەت.
2025 جىل قىتاي ءتۋريزمىنىڭ قازاقستانداعى جىلى بولىپ جاريالاندى. بۇل باستاما ەكىجاقتى ىنتىماقتاستىقتى ودان ءارى دامىتۋعا جول اشادى. ەل ازاماتتارىنىڭ قىتاي مادەنيەتى مەن تۋريزم باعىتتارىنا قىزىعۋشىلىعى ارتادى دەپ كۇتىلەدى. سونىمەن قاتار تۋريستىك ينفراقۇرىلىمدى جەتىلدىرۋ مەن مادەني ىقپالداستىقتى تەرەڭدەتۋ ماسەلەلەرى وزەكتى بولا تۇسەدى.
وسىلايشا, قازاقستان مەن قىتاي اراسىنداعى تۋريستىك ىنتىماقتاستىق گۋمانيتارلىق ءارى ەكونوميكالىق ماقساتتاردى ۇشتاستىرا وتىرىپ, ەكى ەل اراسىنداعى ورنىقتى سەرىكتەستىكتىڭ ماڭىزدى قۇرامداس بولىگىنە اينالىپ وتىر.
باۋىرجان اۋكەن,
قزسي ازيالىق زەرتتەۋلەر ءبولىمىنىڭ جەتەكشى ساراپشىسى
