2016 جىلدان باستاپ اكتسيا رەسپۋبليكالىق دەڭگەيگە كوتەرىلىپ, ەلىمىزدىڭ بارلىق ءىرى قالاسىندا جىل سايىن وتكىزىلىپ كەلەدى. استانا قالاسىندا العاش 2016 جىلى ءوتىپ, بۇگىنگە دەيىن 9 رەت ۇيىمداستىرىلدى. جاقىندا كەزەكتى اكتسيا ءساتتى ءوتتى.
ءىس-شاراعا 30-عا جۋىق مەملەكەتتىك ورگان وكىلدەرى, كاسىبي زاڭگەرلەر, ادۆوكاتتار مەن نوتاريۋستار, سونداي-اق تاجىريبەلى قۇقىق قورعاۋشىلار قاتىستى. جيىننىڭ باستى ماقساتى – تۇرعىندارعا قۇقىقتىق كەڭەس بەرۋ, ءوز ماسەلەسىن شەشۋگە جول كورسەتۋ, قۇجاتتارىن ءتۇسىندىرۋ جانە زاڭدى تۇرعىدا دۇرىس باعىت كورسەتۋ.
قاتىسۋشىلارعا ەرەكشە كوڭىل كۇي سىيلاۋ ماقساتىندا كىرەبەرىستە كەلۋشىلەردى «Aliya Bulat» ونەر ورتالىعىنىڭ جارقىن كوستيۋم كيگەن انيماتورلارى قارسى الدى. بۇل اسىرەسە بالالاردىڭ كوڭىلىن كوتەرىپ, ءىس-شاراعا جىلى اتموسفەرا سىيلاعانداي بولدى. كەلۋشىلەر قاتارىندا زەينەتكەرلەر, مۇگەدەكتىگى بار ازاماتتار, جۇمىسسىزدار جانە كوپبالالى انالار دا از ەمەس. كەڭەس بەرۋ ايماقتارى جەر ماسەلەلەرى, وتباسى قۇقىعى, الەۋمەتتىك ماسەلەلەر, تۇرعىن ءۇي زاڭناماسى, ەڭبەك جانە كاسىپكەرلىك قۇقىعى بويىنشا بىرنەشە سەكتورعا بولىنگەن.
«مەن بىرنەشە اي بويى جەر تەلىمىن زاڭداستىرا الماي ءجۇر ەدىم. بۇگىن كەڭەس الىپ, ناقتى قاي مەكەمەگە, قانداي قۇجاتپەن بارۋ كەرەكتىگىن ءتۇسىندىم. وسىنداي تەگىن كومەككە قول جەتكىزگەنىمە وتە قۋانىشتىمىن», دەيدى قالا تۇرعىنى ايدىن مانات.
مەملەكەتتىك ورگان وكىلدەرى ازاماتتاردى قابىلداپ, ناقتى ۇسىنىستار بەردى. زاڭگەرلەر كەز كەلگەن قۇقىقتىق سۇراققا شىنايى ءارى كاسىبي جاۋاپ بەرۋگە تىرىستى. كەلۋشىلەردىڭ كوبى العاش رەت زاڭگەرگە جۇگىنگەنىن ايتىپ, مۇنداي ءىس-شارانىڭ ءجيى ءوتۋىن سۇرادى. بۇل اكتسيا – حالىق پەن بيلىك اراسىنداعى سەنىمدى ارتتىراتىن, زاڭدى ءتۇسىندىرۋدى جەڭىلدەتەتىن, قۇقىقتىق كومەككە قولجەتىمدىلىكتى قامتاماسىز ەتەتىن ماڭىزدى باستاما.
«حالىق زاڭگەرى» اكتسياسى قوعامداعى قۇقىقتىق مادەنيەتتىڭ قالىپتاسۋىنا زور ىقپال ەتەدى دەگەن سەنىمدەمىز.
«ەڭ الدىمەن ايتارىمىز: زاڭ كومەگىنە جۇگىنۋ – جاۋاپتى ازاماتتىڭ پاراساتتى قادامى. وكىنىشكە قاراي, كوپشىلىك زاڭگەرلەردى تەك سوتتا نەمەسە باسقا دا قيىن جاعدايدا عانا كەرەك دەپ سانايدى. ال شىن مانىندە, ۋاقتىلى الىنعان كەڭەس كۇردەلى ماسەلەلەردىڭ الدىن الۋى مۇمكىن. ءبىز «حالىق زاڭگەرى» سياقتى اكتسيالاردى ءدال وسى حالىق پەن قۇقىقتىق جۇيە اراسىنداعى كەدەرگىلەردى جويۋ ءۇشىن وتكىزەمىز. ەگەر سىزدە سۇراق, كۇمان نەمەسە جاي عانا كەڭەس قاجەت بولسا, كەلىڭىز. ءبىز ارقاشان كومەكتەسۋگە دايىنبىز», دەيدى اكتسيانى ۇيىمداستىرۋشىلار.
ءدىلدانا ءنۇردىلدا,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
