بيىلعى ماۋسىمداعى ءتۇرلى باعىتتا اشىلعان جازعى لاگەرگە 370 وقۋشى قاتىستى. ولاردىڭ بوس ۋاقىتىن ءونىمدى وتكىزۋىنە جان-جاقتى جاعداي جاسالعان. بۇل ىسكە 42 پەداگوگ تارتىلىپ, ولاردىڭ ارقايسىسى بالالاردىڭ تانىمدىق, شىعارماشىلىق, ۇلتتىق-رۋحاني جانە زياتكەرلىك قابىلەتىن دامىتادى.
اسىرەسە وسى ماۋسىمداعى «كىتاپLIKE» وقۋ لاگەرىن ەرەكشە ايتۋعا بولادى. بۇل جوبا 2-13 ماۋسىم ارالىعىندا ۇيىمداستىرىلدى. وعان 25 وقۋشى قاتىستى. لاگەرگە بارعان بالالارعا ا.جاقسىلىقوۆا, ق.دۇيسەنوۆا, ج.پەرنەباەۆا سەكىلدى تاجىريبەلى ۇستازدار جەتەكشىلىك ەتتى. ولار جەتكىنشەكتەردىڭ كىتاپقا سۇيىسپەنشىلىگىن ارتتىرۋ ماقساتىندا ءتۇرلى تانىمدىق ءارى قىزىقتى ءىس-شارالار وتكىزدى.
اتالعان مەكتەپ-ليتسەي ديرەكتورىنىڭ تاربيە ءىسى جونىندەگى ورىنباسارى گ.الدابەرگەنوۆانىڭ ايتۋىنشا, لاگەر جۇمىسىنىڭ ماقساتى – وقۋشىلاردىڭ جازعى دەمالىسىن ءتيىمدى وتكىزىپ, كىتاپ وقۋعا دەگەن ىنتاسىن ارتتىرۋ, ادەبيەت ارقىلى ۇلتتىق قۇندىلىقتاردى ناسيحاتتاۋ جانە شىعارماشىلىق قابىلەتتەرىن دامىتۋ.
شىنىندا دا, جازعى لاگەرگە كەلگەن بالالار كۇن سايىن وقىعان كىتاپتارى تۋرالى پىكىر ءبولىسىپ, ادەبي كەيىپكەرلەرمەن سىرلاستى, ءتۇرلى ادەبي-تانىمدىق تاپسىرمالاردى ورىندادى. مەكتەپ كىتاپحاناسىندا ءداستۇرلى «وي مەن ويىن» تانىمدىق سايىسىن ۇيىمداستىردى. وندا 5-سىنىپ وقۋشىلارى بىلىمدەرىن ورتاعا سالىپ, لوگيكالىق ويلاۋ قابىلەتتەرىن كورسەتتى. سايىس بارىسىندا ەرەكشە بەلسەندىلىك تانىتقان ء«بىلىمپاز» توبى جەڭىمپاز اتاندى. توپ مۇشەلەرىنىڭ ۇيىمشىلدىعى مەن تاپقىر جاۋاپتارى كورەرمەنگە ەرەكشە اسەر قالدىردى.
جالپى العاندا, مەكتەپ جانىنداعى جازعى لاگەرلەر – بالالار ءۇشىن تەك دەمالىس ەمەس, جاڭا دۇنيەلەردى تانۋ, دوستار تابۋ جانە قىزىقتى ۋاقىت وتكىزۋ ورتاسى ەكەنىن تاعى ءبىر مارتە دالەلدەدى. مۇنداي ءىس-شارالار وقۋشىلاردىڭ ءبىلىمىن تولىقتىرىپ قانا قويماي, ولاردىڭ شىعارماشىلىق الەۋەتىن اشۋعا دا زور مۇمكىندىك بەرەدى.
رامازان ورىنباسار,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
