اتىراۋ وبلىستىق ءبىلىم باسقارماسىنىڭ وكىلى قادىرجان ساپاروۆتىڭ ايتۋىنشا, مەكتەپتەر جانىنداعى لاگەرلەر سانى 727-گە جەتەدى. وندا 120 مىڭعا جۋىق بالا دەمالادى.
«جاز مەزگىلىندە وقۋشىلاردى 3 ساۋىقتىرۋ لاگەرىنە دەمالۋعا جىبەرۋ كوزدەلىپ وتىر. لاگەردىڭ ءبىرى – رەسەي فەدەراتسياسىنىڭ جەلەزنوۆودسك قالاسىنداعى «قازاقستان گەولوگى» ەمدەۋ پانسيوناتى. وعان ارنايى ساناتقا ەنگەن وتباسىلارداعى 1 530 بالانىڭ دەمالىسى ۇيىمداستىرىلادى. ال يندەر مەن ماحامبەت اۋدانىنداعى لاگەرلەردە دەمالاتىن وقۋشىلاردىڭ سانى 1 500-گە جۋىقتايدى», دەيدى قادىرجان ساپاروۆ.
ونىڭ ايتۋىنا قاراعاندا, الەۋمەتتىك تۇرمىسى تومەن وتباسىلارداعى بالالار ەرەكشە نازارعا الىنادى. اسىرەسە جەتىم, اتا-انا قامقورلىعىنسىز قالعان, ارنايى ساناتتاعى جانە قولايسىز وتباسىلارداعى, قۇقىق قورعاۋ ورگاندارىنىڭ ەسەبىندە تۇرعان بالالار جازعى دەمالىسپەن تولىقتاي قامتىلادى. جاز مەزگىلىندە وبلىستاعى بارلىق مۋزەي ارنايى ساناتتاعى بالالار ءۇشىن تەگىن قىزمەت كورسەتەدى.
«رەسپۋبليكالىق بيۋدجەت ەسەبىنەن 4 لاگەرگە 608 بالانى جىبەرەمىز. ال جەرگىلىكتى بيۋدجەت قارجىسىمەن 100-دەن استام وقۋشى ءۇشىن ەلىمىزدىڭ تاريحي, كورىكتى مەكەندەرىنە ەكسكۋرسيا ۇيىمداستىرۋ جوسپارلانىپ وتىر», دەپ مالىمدەدى ق.ساپاروۆ.
جازعى لاگەردىڭ ءبىرى «جايلى مەكتەپ» جوباسىمەن ىسكە قوسىلعان №50 ءبىلىم ورداسىنىڭ جانىنان اشىلدى. بۇل لاگەرگە «جايلى Camp» اتاۋى بەرىلىپتى. وعان باستاۋىش سىنىپتان 50 وقۋشى قابىلداندى.
«لاگەردىڭ جۇمىسىن ۇيىمداستىرۋ ءۇشىن ۇكىمەتتىڭ №64 قاۋلىسى نەگىزگە الىندى. سوعان سايكەس لاگەرگە كوپبالالى, كۇنكورىس دەڭگەيى تومەن, سونداي-اق اتاۋلى الەۋمەتتىك كومەك الاتىن وتباسىلاردىڭ بالالارى كەلەدى. اس ءمازىرى بالالاردىڭ جاس ەرەكشىلىگىنە قاراي ازىرلەنەدى. بالالاردىڭ قاۋىپسىزدىگى ءۇشىن بارلىق جاعداي جاسالىپ وتىر. لاگەردە جۇمىس ىستەۋگە بىلىكتى ماماندار تاربيەشىلەر وقۋشىلاردىڭ بوس ۋاقىتىن ءتيىمدى ۇيىمداستىرىپ, ءتۇرلى تانىمدىق, سپورتتىق جانە مادەني ءىس-شارانى وتكىزۋدى قولعا الدى», دەيدى لاگەر جەتەكشىسى قۇرمانگۇل احمەدياروۆا.
لاگەرگە العاش كەلگەندىڭ قاتارىندا ايزەرە امانقوس تا بار. ونىڭ اتا-اناسى – كوپبالالى وتباسى.
«جاڭادان اشىلعان لاگەرگە كەلگەنىمە قۋانىپ ءجۇرمىن. ماعان وتە ۇنادى. تاماعى ءدامدى, تاربيەشىلەر مەيىرىمدى ەكەن. كوپ دوس تاپتىم. كۇن سايىن ءتۇرلى كونتسەرت پەن سپورتتىق ويىندار وتكىزىلەدى. ءار كۇنىمىز ەرەكشە ءوتىپ جاتىر», دەيدى ايزەرە امانقوس.
اتىراۋ وبلىسى
