تەمىرجول وتكەلى قۇرىلىسىنا باقىلاۋ قاتاڭ

وسىنداي اۋقىمدى جوبا شاھاردىڭ ەڭبەكشى اۋدانى, مومىنوۆ كوشەسى بويىنداعى تەمىرجول وتكەلىندە دە قولعا الىندى. كۇردەلى نىسان­دى سالۋعا قۇرىلىسشىلار وتكەن جىلدان باستاپ كىرىسكەن. جاۋاپتى سالا وكىلدە­رىنىڭ ايتۋىنشا, مەر­دىگەر كومپانيا قۇرىلىس جۇ­مىستارىنىڭ 30%-ىن ورىنداپ قويدى. ينجەنەرلىك جەلىلەردى قايتا ورناتۋ جۇمىسى تو­لى­عىمەن اياقتالدى. وتكەلدى بيىل­عى جىلدىڭ سوڭىنا قاراي پاي­دالانۋعا بەرۋ جوسپارلانىپ وتىر. جوبانىڭ ناتيجەسىندە كولىك كەپتەلىسى ازايى­پ, جول قوزعالىسى جاقسارا تۇسەدى.

قۇرىلىس بارىسىن زەردەلەۋ, باقىلاۋ ماقساتىندا ارنايى جۇمىسشى توبى قۇرىلدى. ونىڭ قۇرامىندا سىبايلاس جەمقورلىققا قارسى ءىس-قيمىل اگەنتتىگىنىڭ شىم­كەنت قالا­لىق دەپارتامەنتىنىڭ ەرىكتىلەرى, «جول اكتيۆتەرى ساپاسىنىڭ ۇلت­تىق ورتالىعى» شىمكەنت قالالىق فيليالىنىڭ ماماندارى مەن قالالىق جولاۋ­شىلار كولىگى جانە اۆتوموبيل جولدارى باسقارماسىنىڭ وكىلدەرى بار. ەرىكتىلەر مەن سالا مامان­دارى تىكەلەي نىسان باسىنا بارىپ, قۇرىلىستىڭ قالاي ءجۇرىپ جاتقانىن ءوز كوز­دەرىمەن باقىلادى. وتكەلدىڭ ساپاسىن قۇرىلىس نورماسىنا قاتىستى تەكسەرىپ, بەلگىلەنگەن تالاپتارعا سايكەستىگىن مۇقيات زەردەلەدى.

«سالىنىپ جاتقان نىساننىڭ تەمىربەتون كونسترۋكتسيالارى-نىڭ ساپاسىن تەكسەرىپ شىقتىق. سونىمەن قاتار جول-قۇرىلىس ماتەريالدارىنان سىنامالار الىنىپ, ولاردىڭ نورماتيۆتىك تالاپتارعا سايكەستىگىن انىق­تادىق. جول قۇرىلىسى – ما­ڭىزدى جوبا. كۇن سايىن جۇز­دەگەن كولىك وتەتىن وتكەل ساپالى بولۋى شارت. ساپاسىز سا­لىنعان نىسان ەرتەڭگى كۇنى مەملەكەتكە قوسىمشا شىعىن. ودان ءبىرىنشى كەزەكتە قاراپايىم كولىك جۇرگىزۋشىلەرى زارداپ شەگەدى. سوندىقتان جول قۇرىلىسى ساپاسىنا باقىلاۋدى قازىردەن كۇشەيتۋ كەرەك», دەدى «جول اكتيۆتەرى ساپاسىنىڭ ۇلتتىق ورتالىعى» رمك شىمكەنت قالا­لىق فيليالى ساپا جانە ما­لى­مەتتىك ەسەپ ءبولىمىنىڭ باسشىسى لۇتفۋللا كەنجاەۆ.

جۇمىسشى توپ كوپىر قۇرى­لىسىندا قولدانىلىپ جاتقان ماتەريالداردىڭ ساپاسىنا ەرەكشە نازار اۋداردى. سونىمەن قاتار نىسانداعى قۇرىلىس قار­قىنى مەن ەڭبەك قاۋىپسىزدىگى شارالارى قانشالىقتى ساق­تالىپ جاتقانىن دا سارالادى.

«قۇرىلىس جۇمىسىنىڭ سا­پاسى مەن بەلگىلەنگەن تا­لاپ­تار­عا سايكەستىگىن قوعام بولىپ نازارعا الۋ, باقىلاپ-تەكسەرۋ – اشىقتىقتى قامتاماسىز ەتۋدىڭ, سىبايلاس جەمقورلىقتىڭ الدىن الۋدىڭ نەمەسە قاۋپىن ازايتۋدىڭ بىردەن-ءبىر تەتىگى. سىبايلاس جەمقورلىق قۇرىلىس سالاسىندا دا كوپ. سونىڭ سالدارىنان قۇرىلىس ساپاسى ناشارلايدى. وعان ءبىرىنشى سەبەپ – ساپاسىز قۇرىلىس ماتەريالدارىن پاي­دالانۋ, سودان سوڭ قۇرىلىس جۇمىسىنىڭ نورما مەن ەرەجەگە ساي اتقارىلماۋى. قازىردە پرەزيدەنت تاپسىرما­سىمەن ەلىمىزدە سىبايلاس جەم­قورلىققا قارسى كۇرەس كۇ­شەيىپ جاتىر. وتكەل ساپاسىن با­قىلايتىن جۇ­مىسشى توپ قۇ­رۋداعى ماقسات تا وسى. سوندىقتان ەرىك­تىلەر مەن ماماندار نىسان تولىق سالىنىپ بىتكەنشە قۇرىلىس جۇمىستارىنا تۇراق­تى مونيتورينگتى جال­عاس­تىرا بەرەدى», دەدى زەردەلەۋ تو­بىنىڭ ۆولونتەرى جاسمين ءاشىموۆا.

زەردەلەۋ قورىتىندىسى بو­يىنشا ساراپشى توپ نىسان­داعى قۇرىلىس ساپاسىنىڭ بار­لىق تەحنيكالىق تالاپتارعا ساي ەكەنىن انىقتاعان. ياعني ولار قۇرى­لىسقا «وتە جاقسى» دەگەن باعا بەرىپ وتىر.

جاڭا تەمىرجول وتكەلى – قالا­نىڭ شىعىس بولىگىن ورتالىقپەن بايلانىستىراتىن, كولىك قوز­عالىسىن جەڭىلدەتىپ, جول-كولىك كەپ­تە­لىسىن ازايتاتىن ما­ڭىزدى ين­فراقۇرىلىمدىق جوبا. وتكەلدىڭ قۇرىلىس جۇ­مىستارىنا قالالىق جولاۋشى­لار كولىگى جانە اۆتوموبيل جولدارى باسقارماسى دا تۇراقتى باقىلاۋ جۇرگىزەدى. ماماندار قۇرىلىستىڭ ءار­بىر كەزەڭىنىڭ بەلگىلەنگەن تالاپتارعا ساي ورىندالۋىن مۇقيات قادا­عالاپ وتىر. جول قۇرىلىسى مەن ساپا­سىنا جاۋاپتى مەكە­مەنىڭ دەرەك­تەرىنە سۇيەنسەك, بيىل شىم­كەنت قالاسىندا 342 كوشەگە اسفالت توسەۋ جۇمىستارى ءجۇرىپ جاتىر. ونىڭ 43,7 شا­قىرىمى قايتا جاڭعىرتىلىپ, 17,1 شاقى­رىمى كۇردەلى جوندەۋدەن وتەدى. 323 كوشەگە ورتاشا جوندەۋ جۇ­مىستارى جۇرگىزىلەدى. ول شاما­مەن 201 شاقىرىم جولدى قۇ­رايدى.

شىمكەنت