دەنيس تەن «ءتورت قۇرلىق ءتۋرنيرىنىڭ» جەڭىمپازى

استانا. 14 اقپان. دەنيس تەن وڭتۇستىك كورەيانىڭ استاناسى سەۋلدە وتكەن «ءتورت قۇرلىق تۋرنيرىندە» توپ جارىپ, جارىس جەڭىمپازى اتاندى. بۇل تۋرالى egemen.kz حابارلادى. قىسقا باعدارلامادا 97,61 ۇپايمەن كوش باستاعان دەنيس ەركىن باعدارلاما بويىنشا سايىستا دا وتە جوعارى دەڭگەيدە ونەر كورسەتتى. بارلىق جاتتىعۋىن تاماشا ورىنداعان قازاقستاندىق سپورتشى تورەشىلەر تاراپىنان 191,85 ۇپاي الىپ, قوس جاتتىعۋ قورىتىندىسى بويىنشا 289,46 ۇپايعا يە بولدى. بۇل ماۋسىمداعى ەڭ ۇزدىك ناتيجە ەكەنىن ايتا كەتەيىك. وسىلايشا, دەنيس تەن «ءتورت قۇرلىق تۋرنيرىندە» توپ جارعان العاشقى وتانداسىمىز رەتىندە قازاق سپورتىنىڭ تاريحىنا قاتتالدى. اقش سەنىم ارتقان دجوشۋا فارريس جارىس بارىسىندا 260,01 ۇپايمەن ەكىنشى ورىن السا, قىتايلىق يان حان قولا جۇلدەگە قول جەتكىزدى. ونىڭ ەكى باعدارلاما بويىنشا جيعان ۇپايى 259,47-گە تەڭ. ال تاعى ءبىر وتانداسىمىز ابزال راحىمعاليەۆ 168,10 ۇپاي جيناپ, جارىستى 20-ورىنمەن اياقتادى. دەنيس تەن ەندى ناۋرىز ايىندا قىتايدىڭ شانحاي قالاسىندا وتەتىن الەم چەمپيوناتىنا قاتىسادى. ەلامان قوڭىر. دەرەك: egemen.kz. سۋرەت: 4conti2015.com.