فوتو: "قازاۆتوجول"
قازاق جول عىلىمي-زەرتتەۋ ينستيتۋتى (قازجولعزي) كوپىرلەردىڭ تەحنيكالىق جاي-كۇيىن دياگنوستيكالاۋ, باقىلاۋ جانە بولجاۋ بويىنشا مالىمەتتەردى قامتيتىن كوپىرلەردى پايدالانۋ جانە باسقارۋ جۇيەسىن – بىرىڭعاي تسيفرلىق پلاتفورمانى ىسكە اسىرىپ جاتىر. جوبا اياسىندا پاۆلودار, ورال مەن استانا اينالما جولدارى سىندى كۇردەلى قۇرىلىمداردى قوسا العاندا, 100-دەن استام كوپىر تەكسەرىلدى. بۇگىندە ولاردىڭ ءۇش ولشەمدى تسيفرلىق كوشىرمەسى ازىرلەنىپ, ول قۇرىلىمداردىڭ جاي-كۇيىن قاشىقتان باقىلاۋعا جانە تاۋەكەلدەرگە جەدەل دەن قويۋعا مۇمكىندىك بەرىپ وتىر.
بيىل تاعى 60 كوپىردى تەكسەرىپ, ولارعا تسيفرلىق كوشىرمە جاساۋ جوسپارلانعان.
«جۇيە رەاكتيۆتى قىزمەت كورسەتۋدەن پرواكتيۆتى باسقارۋعا كوشۋگە جول اشادى. ءبىز ەل اۋماعىندا بىرىڭعاي تسيفرلىق بازا قۇرىپ, تەكسەرۋ ناتيجەسىن بىرىكتىرىپ جاتىرمىز. باقىلاۋدىڭ اۆتوماتتاندىرىلعان ادىستەرىن دە ەنگىزىپ وتىرمىز. بۇل كوپىردىڭ قاۋىپسىزدىگى مەن كۇتىمىنە دەگەن كوزقاراستى تۇبەگەيلى وزگەرتەدى», دەيدى «قازجولعزي» كوپىر جانە جول قۇرىلىستارى باسقارماسىنىڭ باسشىسى شالقار قايسار.
بۇگىندە ەلىمىزدە 3 500-دەن استام كوپىر پايدالانىلادى. ولاردىڭ كوبى وڭىرلىك جانە جەرگىلىكتى جولداردا ورنالاسقان. ءبىرازى پايدالانۋ مەرزىمىنىڭ شەگىنە جەتكەن جانە تۇراقتى تەكسەرۋ مەن تەحنيكالىق باقىلاۋدى قاجەت ەتەدى.
