سۋرەتتى تۇسىرگەن – ەرلان ومار, «EQ»
«Technowomen» كەۇ باسقارما توراعاسى ازيزا شوجەەۆانىڭ ايتۋىنشا, ەلىمىزدەگى جاستاردىڭ 40 پايىزى جەكە قارجىسىن باسقارا المايدى. ال 20 پايىزدان استامىنىڭ مەرزىمى وتكەن قارىزدارى بار. سونىمەن قاتار حالىقتىڭ 40 پايىزىنىڭ تسيفرلىق تەحنولوگيالاردى قولدانۋ داعدىلارى جەتكىلىكسىز. سوندىقتان باعدارلامانىڭ نەگىزگى ماقساتى – جاستاردى قارجىنى ساۋاتتى باسقارۋعا, كيبەرقاۋىپسىزدىك نەگىزدەرىن يگەرۋگە, تسيفرلىق گيگيەنانى ساقتاۋعا جانە جاساندى ينتەللەكت كومەگىمەن تابىس تابۋعا ۇيرەتۋ.
«IT-Aiel» باعدارلاماسى – دەكرەتتەگى, كوپبالالى, جۇمىسسىز وتىرعان, ءوزىن دامىتقىسى كەلەتىن قىز-كەلىنشەكتەرگە ارنالعان. باعدارلاما قاتىسۋشىلاردى تسيفرلىق قۇرالداردى مەڭگەرۋگە, فريلانس پەن ونلاين-بيزنەستى باستاۋعا, جاساندى ينتەللەكتىنى وتباسى ەكونوميكاسىندا قولدانۋعا جانە ينتەرنەت الاياقتارىنان قورعانۋعا ۇيرەتەدى.
«Astana Hub» وكىلى ۆالەريا تيو جوبانىڭ ناقتى ناتيجەلەرگە باعىتتالعانىن اتاپ ءوتتى. ونىڭ ايتۋىنشا, 2023 جىلى باعدارلامانىڭ العاشقى لەگىنە 2634 ايەل قاتىسسا, 2024 جىلى ەكىنشى لەككە 5200-دەن استام ءوتىنىش كەلىپ, 3084 قاتىسۋشى وقۋىن باستاعان. باعدارلاما «No Code», «E-commerce», «AI»-ديزاين, فريلانس, ۆيدەومونتاج سياقتى سالالاردى قامتيدى. بارلىعى قازاق جانە ورىس تىلدەرىندە, ونلاين فورماتتا, مەنتورلىق قولداۋمەن وتكىزىلەدى.
باعدارلاما سەرىكتەستەرىنىڭ ءبىرى «YASSA Education» كومپانياسىنىڭ نەگىزىن قالاۋشى كريستينا ۆەبەر «IT-Aiel» وقۋى اياسىندا مەڭگەرىلەتىن كاسىپتەر تۋرالى ناقتى ءتۇسىندىرىپ ءوتتى. «باعدارلاما قازىرگى نارىقتا جوعارى سۇرانىسقا يە, تەحنيكالىق بازا تالاپ ەتپەيتىن جانە تەز مونەتيزاتسيالاۋعا بولاتىن ماماندىقتار. ولاردىڭ ىشىندە چات-بوت جاساۋشى, «AI»-گرافيكالىق ديزاينەر, ۆيدەومونتاجداۋشى, اۆتوماتتاندىرۋ بويىنشا اسسيستەنت, پرومت-ينجەنەر, باعدارلامالىق قامتاماسىز ەتۋ تەستەرى سەكىلدى كاسىپتەر بار. ءار مودۋل – تاجىريبەلىك باعىتتا, ناقتى تابىسقا جەتكىزەتىن قۇرالدارمەن قۇرىلىمدالعان», دەيدى ول.
باعدارلامانىڭ قارجىلىق ساۋاتتىلىق بلوگىن جۇرگىزىپ وتىرعان مەنتور ءارى كاسىپكەر الۋا كورپەباەۆا قارجىلىق ءبىلىمنىڭ ماڭىزىن ەرەكشە اتاپ ءوتتى. «بۇگىندە جاستار بيزنەس باستاۋعا نيەتتى بولعانىمەن, كىرىس پەن شىعىستى ەسەپتەۋ, سالىق جۇيەسىن ءتۇسىنۋ, ءتيىمدى قارجىلىق مودەل جاساۋ سياقتى نەگىزگى داعدىلاردى مەڭگەرمەگەن. ءبىزدىڭ كۋرس قاتىسۋشىلارعا سانداردان قورىقپاي, ونى باسقارۋعا ۇيرەتەدى», دەيدى ول.
باعدارلاما تۇلەكتەرىنىڭ ءبىرى ءاليا ورازىمبەتوۆا «IT-Aiel» جوباسىنا قاتىسۋ ونىڭ ءومىرىن جاڭا باعىتقا بۇرعانىن ايتادى. «بۇل جوبا مەنى جاڭا سالاعا جەتەلەپ قانا قويماي, «CyberBala» اتتى بالالارعا ارنالعان تسيفرلىق گيگيەنا كلۋبىن قۇرۋىما سەبەپ بولدى. وسى ارقىلى قوعام الدىنداعى جاۋاپكەرشىلىگىمدى سەزىندىم», دەيدى ول. ءاليانىڭ سوزىنشە, «IT» سالاسىندا ايەل ادامداردىڭ كوبەيۋى زامان تالابى.
«AqylTech», «IT-Aiel» باعدارلامالارىنىڭ تاعى ءبىر ەرەكشەلىگى – بارلىق ءوڭىردى قامتۋى. وقۋ ەلىمىزدىڭ 17 وبلىسى مەن استانا, الماتى, شىمكەنت قالالارىندا قولجەتىمدى. باعدارلاما تولىقتاي تەگىن, ونلاين فورماتتا جۇرگىزىلەدى. ماقسات – 10 000-نان استام ادامدى وقىتىپ, 100-دەن استام بىلىكتى ترەنەردى دايارلاۋ.
باعدارلامانى ۇيىمداستىرۋشىلاردىڭ ايتۋىنشا, جاساندى ينتەللەكتىنىڭ 2030 جىلعا قاراي الەمدىك ەكونوميكاعا قوساتىن ۇلەسى 15,7 ترلن دوللاردى قۇراۋى مۇمكىن. سوندىقتان ەلىمىزدە جي-ءدى دامىتۋ تۇجىرىمداماسى جاسالىپ, قازاق تىلىندەگى ۇلگىلەرىن دامىتۋ, وتاندىق ستارتاپتاردى قولداۋ باعىتىندا ناقتى جۇمىس ءجۇرىپ جاتىر. جاساندى ينتەللەكت ەندى تەك تەحنولوگيا ەمەس, وتباسىلىق ەكونوميكاعا ناقتى پايدا اكەلەتىن قۇرالعا اينالۋعا ءتيىس.
اتالعان باعدارلامالار جاي وقىتۋ كۋرستارى ەمەس, تسيفرلىق داۋىرگە بەيىمدەلۋدىڭ, زامانمەن ۇندەسۋدىڭ, جاڭا تابىس كوزىن تابۋدىڭ ناقتى جولىنا اينالىپ وتىر.
