جاڭا ماماندىقتار پيلوتتىق نەگىزدە الماتى مەن قوستانايدا ەنگىزىلەدى. سونىمەن قاتار جاساندى ينتەللەكت تەحنولوگيالارىن پايدالانۋمەن 60 كاسىبي ستاندارت ازىرلەنىپ جاتىر. ولار ەكونوميكانىڭ نەگىزگى سالالارىندا, سونىڭ ىشىندە ماشينا جاساۋدا 336 كاسىپتى قامتيدى. 2024-2026 جىلدارعا ارنالعان ۇزاق مەرزىمدى جوسپارعا سايكەس, بارلىعى 1371 كاسىپتى قامتيتىن 250 كاسىبي ستاندارت ازىرلەنەتىن بولادى.
قازىر ينجەنەرلىك-تەحنيكالىق پەرسونالدىڭ بىلىكتىلىگىن ارتتىرۋ ءۇشىن شەتەلدىك كاسىپورىنداردا تاعىلىمدامادان ءوتۋدىڭ يننوۆاتسيالىق باعدارلاماسى ەنگىزىلىپ جاتىر. ونىڭ ەرەكشەلىگى – بىرلەسكەن قارجىلاندىرۋ تەتىگى ارقىلى شىعىستار رەسپۋبليكالىق بيۋدجەت پەن كاسىپورىندار اراسىندا تەڭ بولىنەدى. ياعني مامانداردىڭ وزىق حالىقارالىق تاجىريبەنى قابىلداپ, ءوز ونەركاسىبىمىزدىڭ ەرەكشەلىكتەرىنە ءتيىمدى بەيىمدەلۋگە كومەكتەسەتىن بۇل ءتاسىل بويىنشا شەتەلدە وقىتۋ اقىسىنىڭ 50%-ىن مەملەكەت تولەسە, قالعانى كاسىپورىن قاراجاتى ەسەبىنەن جابىلادى.
بىلىكتى كادرلاردى دايارلاۋ ماسەلەلەرىندە حيميا ونەركاسىبى دە باسىمدىققا يە بولدى. حيميا سالاسىنداعى كادر تاپشىلىعىن كەشەندى شەشۋ ءۇشىن جەتەكشى جوعارى وقۋ ورىندارىندا – Satbayev University, قازۇۋ, قازۇتزۋ, سونداي-اق تاراز حيميا-تەحنولوگيالىق كوللەدجى سەكىلدى بەيىندى وقۋ ورىندارىندا مەملەكەتتىك ءبىلىم بەرۋ گرانتتارى ەداۋىر كەڭەيتىلدى. 536 كوللەدجدە دۋالدى ءبىلىم بەرۋ باعدارلامالارى ەنگىزىلدى. بۇل باستامالاردىڭ تۇپكى ماقساتى – وندىرىستىك كاسىپورىندارمەن تىعىز سەرىكتەستىكتى جولعا قويىپ, ستۋدەنتتەردىڭ وندىرىستىك تاجىريبەدەن وتۋىنە, سودان كەيىن ناقتى جۇمىسقا ورنالاسۋىنا جاعداي جاساۋ. بىرقاتار كاسىپورىندار وزدەرىنىڭ بولاشاق ماماندارىن وقىتۋدى تولىعىمەن ءوز موينىنا العان. «بولاشاق» حالىقارالىق باعدارلاماسى جانە شەتەلدىك وقۋ ورىندارىمەن تىكەلەي ارىپتەستىك ءوندىرىستى اۆتوماتتاندىرۋدى, حيميالىق قاۋىپسىزدىكتى جانە ەكولوگيالىق مونيتورينگتى قوسا العاندا, جوعارى تەحنولوگيالىق باعىتتار ءۇشىن ينجەنەرلىك كادرلاردى دايارلاۋدى قامتاماسىز ەتەدى.
سول سەكىلدى جاستار اراسىندا گەولوگ ماماندىعىنىڭ تانىمالدىعىن ارتتىرۋ دا ماڭىزدى. بۇل ماقساتتاعى جۇمىستاردىڭ ەلەۋلى ناتيجەسىن ءتيىستى دەرەكتەردەن كورەمىز: ەگەر 2022 جىلى گەولوگيالىق ماماندىق بويىنشا 1224 تۇلەك ديپلوم السا, 2024 جىلعا قاراي ولاردىڭ سانى 3000-نان استقان. ساتباەۆ تەحنيكالىق ۋنيۆەرسيتەتىنىڭ مالىمەتىنشە, تۇلەكتەردىڭ 98%-ى وقىعان ماماندىعى بويىنشا جۇمىسقا ورنالاسادى.
وسىنداي جۇيەلى شارالاردىڭ جاڭا كاسىبي بۋىندى قالىپتاستىرىپ, ەل ەكونوميكاسىن تەحنولوگيالىق جاڭعىرتۋ, حالىقارالىق نارىقتا باسەكەگە قابىلەتتىلىكتى ارتتىرۋ مىندەتتەرىن تابىستى شەشۋگە سەپتىگىن تيگىزەرىنە سەنىم مول.
