فورۋمدى جوعارعى سوتتىڭ قىلمىستىق ىستەر جونىندەگى سوت القاسىنىڭ توراعاسى نازگۇل راحمەتۋللينا اشىپ, بيزنەستى جۇرگىزۋگە قولايلى ورتا قالىپتاستىرۋ جانە كاسىپكەرلەردى نەگىزسىز قىلمىستىق قۋدالاۋدان قورعاۋ ماقساتىندا مەملەكەت تاراپىنان قابىلدانىپ جاتقان جۇيەلى شارالاردى اتاپ ءوتتى. ول مەملەكەت باسشىسىنىڭ تاپسىرماسى اياسىندا قۇقىق قورعاۋ سالاسىنداعى شەكتەن شىعۋشىلىقتاردى جويۋ مەن ناقتى قۇقىقتىق ۇستانىمداردى قالىپتاستىرۋدىڭ ماڭىزىن جەتكىزدى.
رەسپۋبليكالىق ادۆوكاتتار القاسىنىڭ توراعاسى ايدىن بىكەباەۆ كاسساتسيالىق ساتىنىڭ ەنگىزىلۋىن, سوت تورەلىگى ساپاسىن ارتتىرۋدى, تەرگەۋ سوتتارىنىڭ جۇمىسىن جاقسارتۋدى جانە ەلەكتروندى بىلەزىكتەردى كەڭىنەن قولدانۋ باستامالارىن وڭ باعالادى. سونداي-اق ادۆوكاتتاردىڭ مارتەبەسىن كوتەرۋ مەن ولاردىڭ كاسىبي قىزمەتىنە كەدەرگى كەلتىرمەۋ ماسەلەلەرى قوزعالدى.
جوعارعى سوتتىڭ سۋدياسى اسقارجان كەنجەعارين سالىق تولەۋدەن جالتارۋعا قاتىستى قىلمىستاردا باستاپقى ەسەپ قۇجاتتارىنىڭ, ونىڭ ىشىندە تولەنگەن سالىق سومالارىن انىقتاۋداعى ماڭىزىن اتاپ ءوتتى. ول تەرگەۋ ورگاندارىنىڭ وسى قۇجاتتارعا ەرەكشە نازار اۋدارۋ قاجەتتىگىن ەسكە سالدى.
ىشكى ىستەر ءمينيسترىنىڭ ورىنباسارى سانجار ءادىلوۆ ەلدە ۇرلىقتىڭ 53 پايىزعا ازايعانىن ايتتى. سونىمەن قاتار الاياقتىق, كيبەرقىلمىس, نەسيە جانە بانك سالاسىنداعى قىلمىستار سانى ارتقانىن حابارلاپ, ولاردى تىركەۋ ءتارتىبىن ناقتىلاۋ قاجەتتىگىن اتاپ ءوتتى. مۇنداي ىستەر ازاماتتىق-قۇقىقتىق قاتىناستار رەتىندە ءجيى قاراستىرىلمايتىنىن دا جەتكىزدى.
قارجى مونيتورينگى اگەنتتىگى توراعاسىنىڭ ورىنباسارى جەڭىس ەلەمەسوۆ قارجى پيراميدالارىنا قاتىستى جانە قىلمىستىق جولمەن تابىلعان م ۇلىكتى زاڭداستىرۋ بويىنشا ناقتى نورماتيۆتىك قاۋلىلار قابىلداۋ قاجەتتىگىنە توقتالدى.
راا توراعاسىنىڭ ورىنباسارى يگور ۆرانچەۆ تەرگەۋ سۋديالارىنىڭ قۇزىرەتى مەن ساراپتامالاردىڭ كەيبىر سايكەسسىزدىكتەرى تۋرالى ماسەلە كوتەردى.
فورۋم بارىسىندا باس پروكۋراتۋرانىڭ باسقارما باستىعى دۋلات اۋباكىروۆ, «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى, قر كاسىپكەرلەر قۇقىعىن قورعاۋ جونىندەگى ۋاكىلى قانات نۇروۆ تا ءسوز سويلەپ, ءوز ۇسىنىستارىن ءبىلدىردى.
قاتىسۋشىلار اراسىندا سىندارلى پىكىرتالاس ءوتىپ, ايتىلعان ۇسىنىستار جوعارعى سوتتىڭ الداعى نورماتيۆتىك قاۋلى جوباسىندا ەسكەرىلەتىن بولدى.
