باۋىرجان مومىش ۇلىنىڭ كەلىنى, جازۋشى, قوعام قايراتكەرى زەينەپ احمەتوۆا, «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەەۆ, ارداگەرلەر مەن وفيتسەرلەر, اسكەري قىزمەتشىلەر جانە «حالىق بانكى» اق الماتى قالالىق فيلالىنىڭ وكىلدەرى باس قوسقان جيىندا ەرلىك پەن ەلدىككە تاعزىم ەتىلىپ, جاۋىنگەرلەردىڭ ەسىمى ۇلىقتالدى.
تاعىلىمدى ءىس-شارا اياسىندا داڭقتى قولباسشى باۋىرجان مومىش ۇلىنىڭ جانە ءار جىلدارى قازا بولعان ۇلتتىق ۇلان جاۋىنگەرلەرىنىڭ قۇرمەتىنە مونۋمەنت اشىلدى. ەڭسەلى مونۋمەنت باۋىرجان مومىش ۇلىنىڭ 115 جىلدىق مەرەيتويىنا وراي بوي كوتەردى. راسىمدە قىزىل لەنتانى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور ت.امىرەەۆ پەن باتىردىڭ كەلىنى ز.احمەتوۆا قيىپ, ەسكەرتكىشكە گۇل شوقتارىن قويدى. ارتىنشا جينالعاندار ەرلىك پەن ەلدىكتىڭ سيمۆولىنا اينالعان باتىرلاردىڭ رۋحىنا تاعزىم ەتىپ, ءبىر مينۋت ۇنسىزدىكپەن ەسكە الدى.
ءىس-شارادا العاش بولىپ ءسوز العان گەنەرال-مايور ت.امىرەەۆ جاۋىنگەرلەردىڭ ەسىمى ءاردايىم قۇرمەتپەن اتالاتىنىن, ولاردىڭ ەرلىگى جاس ساربازدارعا ۇلگى ەكەنىن اتاپ ءوتتى.
«ەل ءۇشىن جان بەرگەن ەرلەردىڭ رۋحى – ماڭگىلىك شىراق» دەگەن قاناتتى ءسوز بار. وسىعان وراي سوعىس جىلدارىندا بەيبىت ءومىر ءۇشىن سوعىسقان ارداگەرلەردىڭ جانە اسكەري بورىشىن ورىنداۋ كەزىندە قازا تاپقان ۇلاندىقتاردىڭ ەسىمدەرى بۇگىنگى ەسكەرتكىشكە ويىپ جازىلعان. كوپكە ۇلگى بولارلىق ونەگەلى ءىس كەلەشەك ۇرپاققا تاريح دەپ بىلەمىن. ويتكەنى بۇگىنگى ەسكەرتكىشكە جازىلعان اسىل ازاماتتاردىڭ جانقيارلىق ەرلىگى مەن ەسىل ەڭبەگى جاس ۇرپاق ءۇشىن ونەگە», دەدى گەنەرال-مايور.
ءبولىم اۋماعىندا ورىن تەپكەن ەڭسەلى ەسكەرتكىشتىڭ قاق ورتاسىندا باۋىرجان مومىش ۇلىنىڭ ءمۇسىنى بەينەلەنىپ, ءوزىنىڭ ناقىل سوزدەرى قاشالىپ جازىلعان. وڭ قاناتىندا 1995 جىلى تاجىك-اۋعان شەكاراسىنداعى بىتىمگەرلىك ميسسيادا قازا تاپقان 17 جاۋىنگەردىڭ, سول قاناتىندا اقتوبەدەگى تەراكتىدە جانە قاڭتار وقيعاسىندا ەرلىكپەن كوز جۇمعان اسكەري قىزمەتشىلەردىڭ ەسىمدەرى جازىلعان.
«حالىق «وتكەنىن ەسكەرگەن – وسكەندىكتىڭ بەلگىسى, وتكەنىن ۇمىتقان – وشكەندىكتىڭ بەلگىسى» دەيدى. قۇدايعا شۇكىر, ءوسىپ-ءونىپ جوعىمىزدى تاۋىپ جاتىرمىز. مىنە, بۇگىن دە – سول تاريحتىڭ ءبىر ايتۋلى كۇنى. بۇل – ۇرپاق ءۇشىن, ءوسىپ جاتقان قازاقتىڭ ۇلاندارى ءۇشىن كەرەك دۇنيە», دەدى قوعام قايراتكەرى ز.احمەتوۆا.
بۇل مەموريال – ەل قورعاۋ جولىندا قازا تاپقان ەرلەردىڭ ەرلىگىن ۇرپاق جادىندا ماڭگى قالدىرۋعا باعىتتالعان تاعزىم بەلگىسى. جوبانى جۇزەگە اسىرۋعا «حالىق بانكى» اق الماتى قالالىق فيلالى دەمەۋشىلىك كورسەتتى.
«وسىنداي ماڭىزدى وقيعاعا ءوز ۇلەسىمىزدى قوسقانىمىزدى ماقتانىشپەن ايتقىمىز كەلەدى. بۇل مونۋمەنت – ۇلت قاھارمانى باۋىرجان مومىش ۇلى مەن بارشا باتىردىڭ ەرلىگىنە دەگەن تاعزىمنىڭ بەلگىسى. ەندى وسى ەسكەرتكىشتىڭ الدىندا ۇلتتىق ۇلان ساربازدارى رۋحتى بويىنا ءسىڭىرىپ, ەلگە قىزمەت ەتۋگە سەرت بەرەتىن بولادى دەپ سەنەمىز», دەدى قارجى ۇيىمىنىڭ وكىلى ەرگەن مارات.
ءىس-شارا بارىسىندا بىرقاتار قوناقتارعا باۋىرجان مومىش ۇلى اتىنداعى «باتىر شاپاعاتى» مەدالى مەن بريگادا كومانديرىنىڭ العىس حاتتارى تابىستالدى. ماراپات ەڭ الدىمەن ز.احمەتوۆاعا بەرىلدى. سونىمەن قاتار ەرلىك مۇراسىن ۇلىقتاۋعا ۇلەس قوسقان ارداگەرلەر مەن ەسكەرتكىش جوباسىنا دەمەۋشىلىك جاساعان قارجى ۇيىمىنىڭ قىزمەتكەرلەرى دە وسى قۇرمەتكە يە بولدى.
