– مەملەكەت باسشىسىنىڭ باستاماسىمەن جۇزەگە اسىپ جاتقان «كەلەشەك مەكتەپتەرى» جوباسىنىڭ نەگىزگى ماقسات-مىندەتتەرى ورىندالىپ جاتىر ما؟ وسى ارقىلى قانداي تۇيتكىلدى ماسەلەلەر شەشىمىن تابادى؟
– «كەلەشەك مەكتەپتەرى» جوباسى – قالا مەن اۋىل مەكتەپتەرى اراسىنداعى الشاقتىقتى جويۋعا باعىتتالعان ستراتەگيالىق باستاما. جوبانىڭ ماقساتى – ەلىمىزدىڭ بارلىق وڭىرىندە كەز كەلگەن بالاعا قولجەتىمدى جاڭا فورماتتاعى ءبىلىم ۇيىمدارىن قۇرۋ. جوعارى ساپالى ءبىلىم ستاندارتتارىن جاپپاي ەنگىزۋ ارقىلى ءار بالانىڭ جان-جاقتى دامۋىنا جانە ءوز الەۋەتىن تولىق اشۋعا تەڭ مۇمكىندىك جاساۋ. ۇلتتىق جوبا بالالاردىڭ تۇرعىلىقتى جەرىنە قاراماستان, زامان تالابىنا ساي جاعدايدا ساپالى ءبىلىم الۋ مۇمكىندىگىن قامتاماسىز ەتۋگە باعىتتالعان. «كەلەشەك مەكتەپتەرىنىڭ» 40%-ى اۋىلدىق ەلدى مەكەندەردە سالىنىپ جاتىر. وسىلايشا, 200 مىڭنان استام اۋىل بالاسىن زامان تالابىنا ساي جايلى ءبىلىم بەرۋ ورتاسىمەن قامتاماسىز ەتۋ جوسپارلانعان. «كەلەشەك مەكتەپتەرىنىڭ» باستى ارتىقشىلىعى – وندا وقۋشىلارعا قولايلى, ەرگونوميكالىق ءبىلىم كەڭىستىگى جاسالعان. بۇل مەكتەپتەردىڭ كولەمى تيپتىك جوبالارعا قاراعاندا 15–20%-عا ۇلكەن, ال تەحنيكالىق جاراقتانۋى جاعىنان 4 ەسەگە ارتىق. سوندىقتان مەكتەپتەگى ورىن تاپشىلىق ماسەلەسى بىرتىندەپ شەشىلەتىن بولادى.
– زاماناۋي تەحنولوگيامەن جابدىقتاۋ جانە قاۋىپسىزدىك جۇيەسىنە توقتالىپ وتسەڭىز؟
– مەكتەپتەردە روبوتتەحنيكا كابينەتتەرى, STEM-زەرتحانالار, حورەوگرافيا زالدارى, كوۆوركينگ ايماقتارى, 4 سپورت زالى بار, زاماناۋي پاندىك كابينەتتەر, العاشقى اسكەري دايىندىق ءۇشىن ارنايى اشىق الاڭدار قاراستىرىلعان. بارلىق مەكتەپ زاماناۋي جيھازدارمەن جانە وقۋ قۇرال-جابدىقتارىمەن جابدىقتالىپ, ءاربىر وقۋ كابينەتى ءۇشىن قاجەتتى تەحنيكالىق قۇرالدار جيىنتىعى قامتاماسىز ەتىلگەن. بۇنىڭ بارلىعى ۇستازداردىڭ جۇمىسىن جەڭىلدەتىپ, وقۋشىلاردىڭ ءبىلىم ساپاسىن كوتەرۋگە مۇمكىندىك بەرەدى. سونداي-اق ۇلتتىق جوبا اياسىندا سالىنعان مەكتەپتەردە قاۋىپسىزدىك جۇيەلەرى كۇشەيتىلگەن.
– «كەلەشەك مەكتەپتەرىنىڭ» قانداي ارتىقشىلىعى بار؟
– قارىم-قابىلەتىنە قاراماستان كەز كەلگەن بالاعا جاعداي جاسالعان, ونىڭ ىشىندە ەرەكشە ءبىلىم بەرۋ قاجەتتىلىكتەرى بار جەتكىنشەكتەر ءۇشىن دە جەكە سانيتارلىق بولمەلەر, كەڭ كابينەتتەر, جەدەلساتى, پاندۋستار, ارنايى بەلگىلەر, پسيحولوگ, لوگوپەد جانە دەفەكتولوگ كابينەتتەرى قاراستىرىلعان. سونداي-اق مۇعالىمدەر ينتەراكتيۆتى تەحنولوگيالار مەن پاندىك زەرتحانالاردى قولدانا وتىرىپ, ءار وقۋشىنىڭ قىزىعۋشىلىعى مەن قابىلەتىنە قاراي تۇلعالىق دامۋىنا جول اشادى. ءبىلىم بارىسىندا پرەزيدەنت بەلگىلەگەن «ادال ازامات» تۇجىرىمداماسىنىڭ نەگىزىندە وقۋشىلاردى ادىلدىككە, ەڭبەكقورلىققا جانە ادامگەرشىلىككە باۋليتىن قۇندىلىقتار جۇيەسى قالىپتاسقان. مەكتەپتەگى ءبىلىم ۇدەرىسى تەك وقىتۋ ەمەس, ومىرگە بەيىمدەۋ, جاۋاپكەرشىلىك سەزىمىن وياتۋ جانە قوعامدىق سانانى دامىتۋعا باعىتتالعان. بۇل مەكتەپتەردە بالالاردىڭ بويىندا ەكولوگيالىق مادەنيەتتى قالىپتاستىرۋ, قورشاعان ورتانى قورعاۋ, رەسۋرستاردى ۇنەمدى پايدالانۋ سياقتى جاۋاپكەرشىلىكتى سەزىنۋ داعدىلارىن دامىتۋعا ەرەكشە ءمان بەرىلەدى. وسى قاعيدالار مەملەكەت باسشىسىنىڭ «تازا قازاقستان» يدەياسىن بالالارعا مەكتەپتەن باستاپ بويىنا ءسىڭىرۋدى كوزدەيدى.
جوبانىڭ نەگىزگى باسىمدىقتارىنىڭ ءبىرى – وقۋشىلارعا ەرتە جاستان كاسىبي باعدار بەرۋ. باستاۋىش سىنىپتاردا ءتۇرلى ماماندىق يەلەرىمەن كەزدەسۋلەر, ارنايى اپتالىقتار ۇيىمداستىرىلادى. 7-سىنىپتان باستاپ تەرەڭدەتىلگەن بەيىندىك وقىتۋ, تالىمگەرلىك جۇيەسى جانە جەكە ءبىلىم كۋرستارى ەنگىزىلەدى. بۇل ۇدەرىستى ءتيىمدى ۇيلەستىرۋ جانە باسقارۋ ماقساتىندا «مانساپ كومپاسى» اتتى ارنايى تسيفرلىق پلاتفورما ازىرلەنىپ وتىر.
– جوبا بويىنشا كادر ساياساتى قالاي جۇرگىزىلەدى؟
– جوبانىڭ باستى مىندەتتەرىنىڭ ءبىرى – جاڭا تەحنولوگيالار مەن ادىستەردى ءتيىمدى قولدانا الاتىن بىلىكتى مۇعالىمدەرمەن قامتاماسىز ەتۋ. «كەلەشەك مەكتەپتەرىندە» پەداگوگتەردىڭ كاسىبي دامۋ ۇدەرىسى ۇزدىكسىز جۇرگىزىلۋگە ءتيىس. وسى ماقساتتا مۇعالىمدەرگە ارنالعان جاڭا پەداگوگيكالىق تاسىلدەر, زاماناۋي ادىستەمەلەر مەن تسيفرلىق قۇرالداردى مەڭگەرۋگە باعىتتالعان باعدارلاما ازىرلەندى. بۇگىنگى كۇنى 3000-نان استام مۇعالىم بىلىكتىلىكتى ارتتىرۋ كۋرسىنان ءوتتى.
«كەلەشەك مەكتەپتەرى» مودەلى ەلىمىزدەگى بارلىق جالپى ءبىلىم بەرەتىن مەكتەپتىڭ دامۋىنا نەگىز بولماق. پىسىقتالعان ستاندارتتار, ادىستەمەلەر, جانە باسقارۋ شەشىمدەرى بۇكىل رەسپۋبليكا بويىنشا تاراتىلادى.
اڭگىمەلەسكەن –
ايتولعان ءجۇنىسحان,
«Egemen Qazaqstan»
