تاۋ-كەن وندىرىسىندەگى «رەنتگەنفلۋورەستسەنتتى» نەمەسە EDXRF اسپاپتارى شەتەلدىك بالامالارىنان ارتىق ەكەنىن دالەلدەگەن. ول كەن ۇلگىسىن رەنتگەنمەن ساۋلەلەندىرىپ, كەيىننەن ەلەمەنتتەردىڭ ساۋلە شىعارۋىن تىركەپ, قۇرامىن ءدال انىقتايدى. ەڭ باستىسى – بۇل تەك زەرتحانادا عانا ەمەس, جەر استىندا, شاڭدى, سۋىق جانە قيىن جاعدايلاردا دا جۇمىس ىستەي بەرەدى. قۇرامىندا حيميالىق رەاگەنتتەر دە جوق, ياعني ەكولوگياعا زيان كەلتىرمەيدى. قوسىمشا شىعىندى دا تالاپ ەتپەيدى.
اسپاپتىڭ ىشكى بولىگى جاساندى ينتەللەكت ەلەمەنتتەرىمەن جابدىقتالعان. بۇل SBSWin اتتى اقىلدى الگوريتم كەن قۇرامىن تۇراقتى ءارى جوعارى دالدىكپەن تالدايدى. وسىلايشا بۇرىن ۇزاق ۋاقىت الاتىن ۇدەرىس ەندى سەكۋندتارمەن ولشەنەدى.
«قازاقمىس» كومپانياسىنىڭ ءوندىرىس ورىندارىندا بۇل اسپاپتار كەندى تالداۋ ءتاسىلىن تۇبەگەيلى وزگەرتتى. 2019-2023 جىلدار ارالىعىندا تولەشوۆتىڭ كومانداسى جاساعان رلپ-21 اسپابى ەكى ميلليونعا جۋىق ۇلگىنى وڭدەپ, تاۋلىگىنە مىڭنان استام تالداۋ جۇرگىزگەن. ءار تالداۋ ءبىر ۋاقىتتا وتىزدان استام ەلەمەنتتى انىقتاپ, كەن قۇرامىن ناقتى كورسەتە الاتىن.
كەن قۇرامىن ناقتى ۋاقىت رەجيمىندە باقىلاۋ بۇرىن تەك ارمان بولسا, ەندى شىندىققا اينالدى. جوبالىق ۇجىم جاساعان ركس-21 كەن باقىلاۋ ستانتسياسى كەن قۇرامىنداعى وزگەرىستەردى تىكەلەي كونۆەيەردە باقىلايدى. اتالعان تەحنولوگيا شيكىزات ساپاسىنا جەدەل ارەكەت ەتۋگە جانە بايىتۋ پروتسەسىن ناقتى ۋاقىتتا تۇزەتۋگە مۇمكىندىك بەرەدى. سونىمەن قاتار ميلليونداعان قارجىنى ۇنەمدەيدى.
بۇل اسپاپتار ەلدىڭ ناقتى جاعدايلارىنا بەيىمدەلگەن, باعاسى قولجەتىمدى, ساپاسى جوعارى جانە كۇردەلى تەحنيكالىق قىزمەت كورسەتۋدى قاجەت ەتپەيدى. سونىمەن قاتار ولار سەرتيفيكاتتالىپ, قازىرگى تاڭدا شەتەل نارىعىنا ەكسپورتتالىپ جاتىر.
