فەستيۆال 6 ماۋسىمدا اقسۋات مادەنيەت ۇيىندە ASSYLTAS تەاترىنىڭ «مەنى تاۋىپ الشى» قويىلىمىمەن باستالدى. جاقىندا عانا الماتىدا پرەمەراسى وتكەن دراما جەتىمدەردىڭ تاعدىرى مەن اناعا دەگەن ماڭگىلىك ساعىنىشتى سۋرەتتەپ, قوعامداعى ماسەلەلەر تۋراسىندا وي قوزعايدى. بۇدان سوڭ ۇيىمداستىرۋشىلار جىلداعى ءۇردىستى جالعاپ, ورتا جۇزگە بەلگىلى حالىق ەمشىسى, XVIII عاسىردا ءومىر سۇرگەن اۋليە ىرعىزباي اتا كەسەنەسىندە قۇرباندىق شالىنىپ, اس بەردى.
7 ماۋسىمدا اقسۋاتتىڭ ورتالىق الاڭىندا Assyl Arlan ءتۋرنيرى باستالدى. 74 كەلىگە دەيىنگى سالماقتا 24 بالۋان, ال +74 كەلىدە (تۇيە بالۋان) 18 بالۋان باق سىناستى. فەستيۆالدىڭ رەسمي اشىلۋ سالتاناتى دا ءىس-شارانىڭ ەكىنشى كۇنىنە جوسپارلانىپتى. اقسۋاتقا ارنايى جۇمىس ساپارىمەن بارعان اباي وبلىسىنىڭ اكىمى بەرىك ءۋالي سالتاناتتى جيىننىڭ اشىلۋىنا قاتىسىپ, فەستيۆالدە سپورت مەن ونەردىڭ ۇيلەسىمىمەن قاتار ەل بىرلىگى مەن تۋعان جەرگە جاناشىرلىقتىڭ كورىنىس تاپقانىن جەتكىزدى.
– اباي ەلىندە تۋعان جەرگە قىزمەت ەتۋ, جومارتتىق پەن ەلدىك رۋح قاشاندا بيىك باعالانعان. وسى جولدا ەرەكشە ەڭبەك ەتىپ جۇرگەن ازاماتتاردىڭ ءبىرى – كاسىپكەر دۋلات تاستەكەەۆ. ونىڭ ەلگە دەگەن سۇيىسپەنشىلىگى تەك سوزبەن ەمەس, ناقتى ىسپەن دالەلدەنىپ كەلەدى. بۇل – تۋعان جەرىن سۇيگەن ازاماتتىڭ جارقىن ۇلگىسى. اۋىل – ۇلتتىڭ التىن دىڭگەگى. وسى ورايدا ءار ازاماتتى ءوڭىرىمىزدى, اسىرەسە شالعاي اۋىلداردى دامىتۋعا شاقىرامىن, – دەپ ايماق باسشىسى تۋعان جەرگە قىزمەت ەتىپ جۇرگەن ازاماتتارعا دا العىسىن جەتكىزە كەلە, 19-20 ماۋسىمدا وتەتىن «تۋعان جەرگە تۋىڭدى تىك» ينۆەستيتسيالىق فورۋمىنا ءوڭىردىڭ قامىن ويلاعان بارشا ازاماتتى شاقىردى. ايماق باسىشسى باسقوسۋدا وبلىستاعى اتقارىلىپ جاتقان جوبالار جايىندا دا ايتا كەتتى.
– وبلىس اكىمى رەتىندە جۇمىسقا كىرىسكەلى بەرى اقسۋات اۋدانىنا ەكىنشى رەت كەلىپ وتىرمىن. العاش كەلگەندە وزەكتى ماسەلەلەرمەن تانىسىپ, اۋداننىڭ قاجەتتىلىكتەرىن جازىپ الىپ, سەسسيانىڭ قاراۋىنا ەنگىزگەن بولاتىنمىن. سونىڭ ناتيجەسىندە بيىل اقسۋات اۋىلىنا كىرە بەرىس ەكى جولاقتى جول ءتورت جولاققا كەڭەيدى. كوكجىرا اۋىلىندا مادەنيەت ءۇيى بوي كوتەرەدى. اقسۋات اۋىلىنداعى ورتالىق اۋرۋحاناعا كۇردەلى جوندەۋ باستالدى. اۋداندا 48 وتباسى جاڭا پاتەرگە يە بولادى, – دەيدى ول.
سونىمەن قاتار ەكپىن جانە ويشىلىك اۋىلدارىندا سپورتتىق كەشەندەر سالىناتىنىن جانە تەبىسكە وزەنى ارقىلى وتەتىن كوپىر دە جاڭارىپ جاتقانىن جەتكىزدى. بۇعان قوسا قۇرىلىسى توقتاپ تۇرعان اقساۋت مەكتەبى (بۇل تۋرالى گازەتىمىزدە ماسەلە كوتەرىلگەن ەدى) مەن ەكپىن اۋىلىنداعى اپاتتى مەكتەپتىڭ جاڭا عيماراتى بيىلدان قالماي سالىناتىن سۇيىنشىلەدى.
فەستيۆالدىڭ ەڭ تارتىستى ساتتەرىنىڭ ءبىرى – ۇلتتىق كۇرەس تۇرىنەن وتكەن «ASSYL ARLAN» رەسپۋبليكالىق ءتۋرنيرى بولدى. 74 كەلىگە دەيىنگى سالماقتا 24 بالۋان «وگىز بالۋان» اتاعى ءۇشىن بەلدەسسە, +74 كەلىدەن جوعارى سالماقتا 18 بالۋان «تۇيە بالۋان» اتاعىن ساراپقا سالدى. 74 كەلىگە دەيىنگى سالماقتا: 1-ورىن – نۇرداۋلەت باقتىباي (شىمكەنت قالاسى) – اۆتوكولىك. 2-ورىن – ەرزات ارعىنوۆ (اباي وبلىسى) – 2 000 000 تەڭگە, 3-ورىن – ديدار تۇقىشەۆ (اباي وبلىسى) – 1 000 000 تەڭگە, 3-ورىن – بەكزات شاكەزاەۆ (قىزىلوردا وبلىسى) – 1 000 000 تەڭگە.
+74 كەلىدەن جوعارى سالماقتا: 1-ورىن – ءادىل ورازباەۆ (اباي وبلىسى) – اۆتوكولىك. 2-ورىن – نۇرداۋلەت جارىلعاپوۆ (ماڭعىستاۋ وبلىسى) – 4 000 000 تەڭگە, 3-ورىن – ماقسات يساقابىلوۆ (قىزىلوردا وبلىسى) – 2 000 000 تەڭگە, 3-ورىن – سايات شامشيەۆ (اباي وبلىسى) – 2 000 000 تەڭگە. بيىل بۋلان بايگەسىنە اۆتوكولىك تىككەن دەمەۋشى مەيىرجان بەرەكەتوۆ دەگەن كاسىپكەر بولدى.
ال كەشكىلىك اۋدان تۇرعىندارى ءانشى, دومبىراشى گۇلدانا نوعايباەۆانىڭ «ەلگە سالەم» كونتسەرتى مەن ءداستۇرلى مۋزىكانى زاماناۋي باعىتتا ايشىقتايتىن «Qazaqsha تەراپيا» تەاترلاندىرىلعان ءان-جىر كەشىن تاماشالادى.
فەستيۆالدىڭ ءۇشىنشى كۇنى دە ايماق حالقى ءۇشىن قۋانىشقا تولى بولدى. جۇرتشىلىقتىڭ اسىعا كۇتكەنى – ەكپىن اۋىلىنداعى اتشاباردا وتكەن Assyl Tulpar الامان بايگەسى. ءدۇبىرلى دوداعا ەلىمىزدىڭ ءار ايماعىنان كەلگەن سايگ ۇلىكتەر ءوزارا الامان باسەكەگە ءتۇستى. قۇنان جارىستا الماتى وبلىسى جامبىل اۋدانى كوزايىمنىڭ بابى مەن باعى قاتار شاۋىپ, ءبىرىنشى كەلسە, توپ بايگەدە اباي وبلىسى اقسۋات اۋدانى كوكتۇبەك اۋىلىنىڭ قالقامان دەگەن سايگ ۇلىگى توپ جاردى. ال الامان بايگەدە جامبىل وبلىسىنان كەلگەن باقتورى دەگەن تۇلپاردىڭ باعى جانىپ, كومبەگە ءبىرىنشى جەتتى. توپ بايگە مەن الامان بايگەدە توپ جارعان ەكى تۇلپاردىڭ يەسىنە دە اۆتوكولىكتىڭ كىلتى تابىس ەتىلدى.
بۇدان سوڭ تانىمال سپورتشىلار ەكپىن اۋىلىنىڭ مادەنيەت ۇيىندە حالىقپەن جۇزدەسسە, سانجار كەرىمبايدىڭ «قانىش جانە عىلىمي مايدان» تاقىرىبىندا وقىرماندارمەن كەزدەسۋى ءوتتى. ال «دالا» تەاترى فەستيۆالدى ىدىرىس دوسقان ۇلى اتىنداعى ستاديوندا «اباي الەمى» قويىلىمىمەن تۇيىندەدى. كەشتە مايرا ءىلياسوۆا, ۇلىقپان جولداس, ءمولدىر اۋەلبەكوۆا, قۋاندىق راحىم, Raim, جاندوس قارجاۋباي, ديدار سەرىكقالي, اينۇر ساعيقىزى سىندى قازاق ەسترادا ونەرىنىڭ انشىلەرى اقسۋاتتىڭ اسپانىن اسەم انگە بولەدى. ءىس-شارانىڭ باس دەمەۋشىسى – دۋلات تاستەكەي نەگىزىن قالاعان TAS GROUP كومپانياسى مەن ASSYLTAS قوعامدىق قورى جانە باسقا دا جەرگىلىكتى كاسىپكەرلەر اتسالىستى. ۇيىمداستىرۋشىلاردىڭ ايتۋىنشا جيىنعا 7-8 مىڭداي ادام قاتىسقان. «اسىل بەسىك – اقسۋات» فەستيۆالى وسىلايشا اقسۋاتتى دۇبىرلەتىپ, اباي جۇرتىنا ۇمىتىلماس ءسات سىيلادى.
اباي وبلىسى
