فوتو: ۆيدەودان الىنعان كادر
ابزال قۇسپان بۇل ىستە ادام ءولىمى بولعاندىقتان, نەگىزگى كۇدىكتىلەرگە راقىمشىلىق قولدانىلمايتىنىن اتاپ ءوتتى.
«شەرزات پولاتقا قاتىستى ءىستى بارلىعىمىز قارادىق. ول جەردە ادام ولىمىنە اكەلىپ سوققان قىلمىس بولعاندىقتان, بۇل ىسكە قاتىستى راقىمشىلىق اكتىسى قولدانىلمايدى. قالاي بولعان جاعدايدا دا, ابايسىزدا ادام ولىمىنە اكەپ سوققان باپپەن بايلانىستىرىلسا, وعان قاتىستى راقىمشىلىق بولمايدى», دەدى دەپۋتات.
الايدا ول قىلمىستى حابارلاماۋ بويىنشا قىلمىستىق كودەكستىڭ 434-بابىمەن سوتتالعان ادام (دۋمان ىسقاق) راقىمشىلىققا ءىلىنۋى مۇمكىن ەكەنىن اتاپ ءوتتى.
ايتا كەتەيىك, جاقىندا 16 جاستاعى شەرزات پولاتتىڭ ولىمىنە قاتىستى ءىس بويىنشا ۇكىم شىعارعان بولاتىن. بىرنەشە كۇدىكتى بۇزاقىلىق پەن باسقا دا باپتار بويىنشا كىنالى دەپ تانىلىپ, ولارعا ءتۇرلى جازا تاعايىندالدى. ال دۋمان ىسقاق 1 جىل 6 ايعا باس بوستاندىعىنان ايىرىلدى.
