بىرىنشىدەن, ەكونوميكالىق نەمەسە ينۆەستيتسيالىق جوسپار جاسالعاندا, ونىڭ ەڭبەك نارىعىنا قالاي اسەر ەتەتىنىن مىندەتتى تۇردە الدىن الا باعالاۋ كەرەك. ول ءۇشىن باعالاۋ تەتىگىن ەنگىزۋ قاجەت. ينفراقۇرىلىمدىق جوبالاردان باستاپ ساۋدا كەلىسىمدەرىنە دەيىنگى كەز كەلگەن اۋقىمدى باستاما قابىلداناردا ونىڭ لايىقتى ەڭبەككە تيگىزەر اسەرى جان-جاقتى سارالانۋى ءتيىس. ەكىنشىسى – جاساندى ينتەللەكت جانە پلاتفورمالىق جۇمىسپەن قامتۋ سالاسىنا ارنالعان حالىقارالىق ەڭبەك ستاندارتتارىن ازىرلەۋ. بۇل تەك دەكلاراتسيا دەڭگەيىندە قالماي, №190 نەمەسە №102 كونۆەنتسيالارىنا ۇقساس تولىققاندى نورماتيۆتىك قۇجات بولۋى كەرەك. ءۇشىنشىسى – كاسىپوداقتاردىڭ ترانسفورماتسياسىن قولداۋ. ول ءۇشىن حالىقارالىق ەڭبەك ۇيىمىنان ورتالىق ازياداعى كاسىپوداقتارعا ارنالعان تسيفرلاندىرۋ جانە جاڭا ساناتتاعى جۇمىسكەرلەرمەن جۇمىس ىستەۋگە باعىتتالعان ايماقتىق يننوۆاتسيالىق ورتالىقتى قازاقستاندا قۇرۋ مۇمكىندىگىن قاراستىرۋ سۇرالىپ وتىر.
كاسىپوداقتار فەدەراتسياسى مەديا ورتالىعىنىڭ حابارلاۋىنشا, سەسسيانىڭ پلەنارلىق وتىرىسىندا كونفەرەنتسيا قاتىسۋشىلارى حالىقارالىق ەڭبەك ۇيىمىنىڭ باس ديرەكتورى جيلبەر ۋنگبونىڭ بايانداماسىن تالقىلادى.
«جۇمىس ورىندارى, قۇقىقتار جانە ءوسىم: ءوزارا بايلانىستى نىعايتۋ» اتتى ءداستۇرلى جىل سايىنعى بايانداماسىندا حەۇ باس ديرەكتورى جاھاندىق وزگەرىستەر مەن سىن-قاتەرلەرگە بايلانىستى ەڭبەك سالاسىنداعى وزەكتى ماسەلەلەرگە: كليماتتىڭ وزگەرۋى, جاڭا تەحنولوگيالاردىڭ ەنۋى, ەكونوميكالىق تۇراقسىزدىق جايىنا توقتالدى. بۇل ماسەلەلەردى تەك الەۋمەتتىك ارىپتەستىكتىڭ بارلىق تاراپتارى – ۇكىمەت, جۇمىسشىلار مەن جۇمىس بەرۋشىلەر تەڭ دارەجەدە قاتىساتىن الەۋمەتتىك ديالوگ ارقىلى شەشۋگە بولادى.
«تەز وزگەرىپ جاتقان ءارى بەلگىسىزدىككە تولى قازىرگى كەزەڭدە الەۋمەتتىك ديالوگ – ينكليۋزيۆتى ەكونوميكالىق وسىمگە, ادىلەتتى ەڭبەك جاعدايلارىن قالىپتاستىرۋعا جانە جاۋاپتى ينستيتۋتتار قۇرۋعا باستايتىن ەڭ ءتيىمدى جول. الەۋمەتتىك ادىلەتتىلىككە جەتۋ – ءاربىر ادامنىڭ جەكە, ۇلتتىق جانە جاھاندىق دەڭگەيدەگى مىندەتى. جاھاندىق تۇرعىدا سەرىكتەستىك دەموكراتيالىق قۇندىلىقتارعا نەگىزدەلۋى كەرەك», دەلىنگەن حەۇ باس ديرەكتورىنىڭ بايانداماسىندا.
