فوتو-جادىگەردى ساقتاعان ادام – الماتى قالاسىندا تۇراتىن ءمارياش نوعايقىزى. بۇل كىسى جاس كەزىندە كاسىبي ءانشى بولعان. وسى اپامىز: «وتكەن عاسىردىڭ الپىسىنشى جىلدارىنىڭ باسىندا باي-ولكە ايماعىنا ءبىر توپ قازاقستاندىق ارتىستەر بارىپ مۋزىكالىق دراما تەاتر ساحناسىندا كونتسەرت بەردى. اسىرەسە سالعان ءانى ءتامام قازاقتىڭ جۇرەگىنە ۇيالاعان اتاقتى ءانشى روزا باعلانوۆا شىرقاعان «اقماندايلىم» كورەرمەندى تەڭىزدەي تولقىتتى» دەپ ەسكە الادى.
ال مىنا فوتوعا توقتالار بولساق, سول جاقتا ءبىرىنشى تۇرعان ادام – جەرگىلىكتى قازاقتاردان شىققان اقىن-جازۋشى جانە موڭعول ەلىنىڭ ونەر قايراتكەرى اقتان بابي ۇلى. بۇل تۇلعا الىستان ات تەرلەتىپ كەلىپ, قوبدا قويناۋىندا بۇيىعىپ جاتقان از قازاقتى ونەرىمەن سۋسىنداتقان اعايىندارعا باي-ولكەلىكتەر اتىنان راحمەت ايتىپ تۇر دەيدى.
ودان كەيىن سول جاقتان ەكىنشى رەتتە تۇرعان قازاقستاننىڭ حالىق ءارتىسى شابال بەيسەكوۆا. وسى كونتسەرتتى كوزى كورگەن ونەر زەرتتەۋشى قازىر ەلوردا ىرگەسىندەگى قوياندى اۋىلىندا تۇراتىن قاريا تايف تاۋكەي, قازاقستاندىقتار قويعان كونتسەرتتى شابال اپامىز جۇرگىزگەن دەيدى. ءۇشىنشى ادام – اتاقتى ءبيشى شارا جيەنقۇلوۆا. بۇل اپامىز «التىن بۇركىت» دەيتىن ءبيدى بيلەپ قانداستارىن قايران قالدىرعان كورىنەدى.
ءارى قاراي تارقاتىپ ايتساق, ءتورتىنشى تۇرعان – روزا جامانوۆا, ودان كەيىن ارتقى جاقتا تۇرعان تۇلعا – كاۋكەن كەنجەتاەۆ, تاپ ورتاسىندا – روزا باعلانوۆا, جەتىنشى ادام – اتاقتى عاريفوللا قۇرمانعاليەۆ, سەگىزىنشى ادام تانىلمادى, توعىزىنشى تۇرعان ەركەعالي راحماديەۆ دەپ تانىدى جۋرناليست قالي سارسەنباي اعامىز. ال وڭ جاق شەتتەگى اتاقتى ءانشى انۋاربەك ۇمبەتباەۆ ەكەن.
