وسى ىسكە قاتىستى سوت بارىسى 10 ساۋىردەن باستاپ جوعارعى سوتتىڭ رەسمي يۋتۋب ارناسىندا تىكەلەي ەفيردە كورسەتىلدى. جوعارعى سوت كوممۋنيكاتسيا ءبولىمىنىڭ مەڭگەرۋشىسى, سوت پروتسەستەرىنىڭ ونلاين-كورسەتىلىمدەرى بويىنشا جۇمىس توبىنىڭ جەتەكشىسى پەريزات سادۋاقاس وسى پروتسەسىنىڭ ونلاين-كورسەتىلىمىنە قاتىستى مالىمەتتەردى ءبولىستى.
شەرزات پولاتقا قاتىستى سوت پروتسەسى ەكى اي بويى ءوتىپ, وسى ۋاقىت ىشىندە 36 ەفير, 80 ساعاتتان استام تىكەلەي كورسەتىلىم جۇرگىزىلگەن. ال جوعارعى سوتتىڭ ەفيرلەرىن 30-دان استام مەديا-رەسۋرس رەترانسلياتسيا جاساعان.
«بيشىمباەۆ ىسىندەگى سياقتى, ءبىز بۇل جولى دا اشىق ءارى جاريا پروتسەسكە جاعداي جاسادىق, كەز كەلگەن ادام تىكەلەي ەفيردى ەركىن كورە الدى. جوعارعى سوتتىڭ رەسمي YouTube ارناسىندا العاشقى وتىرىستان باستاپ كورسەتىلىمدەردى كورۋ سانى ميلليوننان استى», دەدى پەريزات سادۋاقاس.
پەريزات سادۋاقاستىڭ ايتۋىنشا, شەرزات پولاتقا قاتىستى سوت پروتسەسىن 42 ەل ازاماتتارى كورگەن.
«6 ماۋسىم كۇنگى جيىن وتە اۋىر بولدى. ۇكىم وقىلعان ساتتە كامەرا جانىندا, ايىپتالۋشىلاردىڭ قاسىندا تۇردىم. ارامىزدا نەبارى 3–4 جەدەل قيمىلدايتىن ارنايى جاساق قىزمەتكەرى بولدى. زالداعى قىسىم ءسات سايىن ارتىپ, ۇكىم جاريالانعان ساتتە ەرنەۋىنەن استى» دەيدى ول.
«كوپشىلىك ءۇشىن ساپالى ەفير «YouTube»-تا «play» باتىرماسىن باسۋ سياقتى كورىنەدى. شىن مانىندە, كادر سىرتىندا كوماندانىڭ وراسان ەڭبەگى جاتىر. ءبىز ءار ترانسلياتسيانىڭ ساپالى بولۋىنا كۇش سالدىق. بۇل – كوپشىلىككە كورىنە بەرمەيتىن وتە اۋىر جۇمىس. ماماندارىمىز دايىندىق پەن تەحنيكالىق جۇمىستاردى تاۋلىك بويى جۇرگىزدى. ءتۇسىرىلىم توبىنان بولەك, ۇيىمداستىرۋ-تەحنيكالىق ماسەلەلەرمەن اينالىساتىن ماماندار دا ەڭبەك ەتتى», دەدى جوعارعى سوتى كوممۋنيكاتسيا ءبولىمىنىڭ مەڭگەرۋشىسى, سوت پروتسەستەرىنىڭ ونلاين-كورسەتىلىمدەرى بويىنشا جۇمىس توبىنىڭ جەتەكشىسى.
