فوتو: gov.kz
تەكسەرۋ ناتيجەسىندە 66 مەكتەپتىڭ 65-ءى سانيتاريالىق-ەپيدەميولوگيالىق تالاپتاردى ورەسكەل بۇزعانى بەلگىلى بولدى. ولارعا 18 ملن تەڭگەدەن استام سوماعا 57 ايىپپۇل سالىنىپ, 60 ۇيعارىم بەرىلدى. 62 قىزمەتكەر جۇمىستان شەتتەتىلىپ, 1 ماتەريال سوتقا جىبەرىلدى.
انىقتالعان نەگىزگى زاڭبۇزۋشىلىقتار:
- سانيتاريالىق-ەپيدەميولوگيالىق قورىتىندىسىز جۇمىس ىستەۋ;
- قۇجاتسىز نەمەسە مەرزىمى وتكەن ونىمدەردى پايدالانۋ;
- ىستىق سۋدىڭ بولماۋى;
- سانيتاريالىق رەجيمنىڭ ساقتالماۋى;
- مەديتسينالىق تەكسەرۋدەن وتپەگەن جانە دەنساۋلىعى كۇندەلىكتى باقىلاۋعا الىنباعان قىزمەتكەرلەردىڭ جۇمىسقا جىبەرىلۋى;
- باكتەريا تاسىمالداۋشىلاردىڭ (ديزەنتەريا, ستافيلوكوكك) انىقتالۋى;
- ىدىس-اياق پەن قۇرال-سايمانداردى دۇرىس جۋماۋ (شايىندىلاردىڭ 7,2%-ىنان ىشەك باكتەريالارى تابىلعان).
وبلىستىڭ سانيتاريالىق-ەپيدەميولوگيالىق باقىلاۋ دەپارتامەنتىنە پروفيلاكتيكالىق جانە ءتۇسىندىرۋ جۇمىستارىن كۇشەيتۋ, ال ءبىلىم باسقارماسىنا مەكتەپ اسحانالارىن سانيتاريالىق تالاپتارعا سايكەستەندىرۋ, سونداي-اق تاماقتانۋ قىزمەتتەرىن جەتكىزۋشىلەرگە قويىلاتىن تالاپتاردىڭ ورىندالۋىن تۇراقتى تەكسەرۋدى قامتاماسىز ەتۋ تاپسىرىلدى. سونىمەن قاتار مەكتەپتەردىڭ براكەراجدىق كوميسسيالارىنىڭ جۇمىسىن جانداندىرۋ ۇسىنىلدى.
دەنساۋلىق ساقتاۋ باسقارماسىنا قىزمەتكەرلەردىڭ جەكە مەديتسينالىق كىتاپشالارىنىڭ زاڭناما تالاپتارىنا سايكەس بەرىلۋىن جانە مەديتسينالىق تەكسەرۋلەردىڭ تولىق كولەمدە جۇرگىزىلۋىن قاتاڭ باقىلاۋ جۇكتەلدى.
بۇگىن سانيتاريالىق-ەپيدەميولوگيالىق باقىلاۋ كوميتەتى توراعاسىنىڭ ورىنباسارى روزا قوجاپوۆا ماڭعىستاۋ وبلىسىنىڭ اكتيۆى الدىنداعى كەڭەستە سويلەگەن سوزىندە:
«تەكسەرۋ قورىتىندىلارى مەكتەپتەگى تاماقتانۋدى ۇيىمداستىرۋدىڭ ساپاسى مەن جەرگىلىكتى اتقارۋشى ورگانداردىڭ تاراپىنان باقىلاۋدىڭ جەتكىلىكسىزدىگىن كورسەتەدى. مۇنايلى اۋدانىندا وتكەن جىلى 459 وقۋشىنىڭ جاپپاي ۋلانعانىنا قاراماستان زاڭ بۇزۋشىلىقتار ءالى دە قايتالانىپ وتىر. بۇل مەكتەپ اكىمشىلىگى مەن ءبىلىم بەرۋ ورگاندارىنىڭ بالالاردىڭ قاۋىپسىزدىگىنە فورمالدى قارايتىنىن بىلدىرەدى», دەپ اتاپ ءوتتى.
قازىر ماڭعىستاۋ وبلىسىندا ەپيدەميولوگيالىق جاعداي تۇراقتى. 2024 جىلدىڭ ناۋرىز ايىنان باستاپ 18 جاسقا دەيىنگى بالالاردى قىزىلشاعا, قىزامىققا جانە ەپيدەميالىق پاروتيتكە (ققپ) قارسى يممۋنداۋ كورسەتكىشى 83,9%-دى قۇراعان.
الينا قايراتقىزى, ەۇۋ ستۋدەنتى
