سەرىكتەستىك ماماندارى بىردەن مال تۇقىمىن اسىلداندىرۋعا ءمان بەرگەن. جەرگىلىكتى جەردىڭ تۇقىمى ازعان مالىنان الار تابىس جارىتىمسىز بولۋى ابدەن مۇمكىن. اسىل تۇقىمنىڭ اسا بەرەتىندىگى اقيقات. وسىلايشا, قابىرعالارىمەن كەڭەسىپ بارىپ تاڭداۋ قازاقتىڭ اقباسى مەن قالماق سيىرىنا تۇسكەن. اقباس – ءتول مالىمىز, ال قالماق سيىرىنىڭ سىرى توسىنداۋ. مال باققان قاۋىمنىڭ قاپەرىندە ءجۇرسىن دەپ سيپاتتاماسىن ايتا كەتكەن دە دۇرىس بولار. بۇل – ءىرى قارانىڭ ەتتى تۇقىمى. تابيعي سۇرىپتاۋ ارقىلى كەزىندە موڭعوليا جەرىندە وسىرىلگەن. قىسى-جازى جايىلىمدا باعىلعان. تۇزى بەتىنە شىعىپ جاتاتىن قۋاڭ دالانىڭ اۋا رايىنا ابدەن بەيىمدەلگەن, كۇي تاڭدامايدى. سوم دەنەلى, اياقتارى مىقتى, بۇلشىق ەتتەرى وتە جاقسى دامىعان. تەرىسى قالىڭ بولعاندىقتان, قارا قارعانىڭ ميى قاينايتىن ىستىقتا مالدىڭ مازاسىن الاتىن ماسا-سونانى, شىبىن-شىركەيدى ەلەي بەرمەيدى. شوقتىعى بيىك. بۇقاسىنىڭ تىرىدەي سالماعى 800 كيلودان اسىپ جىعىلادى. جاقسىلاپ كۇتسە تانا تورپاعى 18 ايدا 500 كيلوعا جەتەدى. سيىرىنىڭ ءسۇتى دە مايلى.
اسىل تۇقىمدى مالدىڭ دارۋمەندەرى دە ۇزىلگەن ەمەس. جۇمىسىن ءبىر جولعا قويعاننان كەيىن سەرىكتەستىك حالىقارالىق سەرتيفيكاتقا يە بولدى. مال ءوز ءتولى ەسەبىنەن وسىرىلەدى. جىلىگىنە ماي ءبىتىپ, سالماعى تولىسقان سوڭ قاساپحاناعا توعىتىلىپ, ءدامى ءتىل ۇيىرەتىن سەمىز ەت وڭدەۋ كەشەنىنە وتكىزىلەدى. «جاڭا بەرەكەنىڭ» بورداقىلاۋ الاڭىندا 10 مىڭ باسقا جۋىق قوي سەمىرتىلەدى. مال ازىعىن سەرىكتەستىكتىڭ وزدەرى دايىندايدى. قىسى-جازى ساقتايتىن قويمالارى دايىن. باياعىداي ايىر ۇستاپ جۇرگەن ەشكىم جوق. مال ازىعىن دايىندايتىن تسەحتا سان قيلى دارۋمەنى قوسىلىپ ءازىر بولعان ازىقتى تەحنيكامەن تاراتادى. مالساق قاۋىمنىڭ ايتۋىنا قاراعاندا, ىسىنە بەرەكە ءبىتۋ ءۇشىن مال ازىعىن وزدەرى دايىنداۋى مەيلىنشە ماڭىزدى. سوندىقتان سەرىكتەستىك جۇگەرىدەن باستاپ بىرنەشە داقىل ءتۇرىن ءوسىرىپ, قىسقا قامدانۋدى قاپىسىز جولعا قويعان.
2023 جىلى رەسپۋبليكالىق «التىن ساپا» سىيلىعىنا يە بولدى. ەت ونىمدەرىن ساقتايتىن مۇزداتقىشتارىنا 26 توننا ءونىم سىيادى. كەشەن زاماناۋي قۇرىلعىلارمەن تولىق جابدىقتالعان. ونىڭ ىشىندە اۋستريالىق «Laska» قۇرىلعىسى دا بار. سەرىكتەستىك قوي شارۋاشىلىعىن وركەندەتۋگە بەت بۇرىپ وتىر. وعان بارلىق جاعداي بار. بابىن تاپقان سوڭ باعىمى جاقسى مالدىڭ باسى دا كوبەيمەي مە؟ «ستوليچنايا تراپەزا» برەندىمەن ساتىلاتىن شۇجىقتىڭ بىرنەشە ءتۇرى جانە وڭدەلگەن ەت ەلىمىزدەگى 70 ساۋدا ورنىندا ساتىلادى ەكەن.
كومپانيادا جۇزگە جۋىق ادام جۇمىس ىستەيدى. ورتاشا تابىستارى 200 مىڭ تەڭگە توڭىرەگىندە. شۇجىق تسەحى جىلىنا 270 توننا ءونىم شىعارادى. ەت وڭدەيتىن تسەحتىڭ ءونىمى 900 توننا توڭىرەگىندە. بۇل جەردە كولەم عانا ەمەس, ساپانىڭ جوعارى ەكەنىن دە ايتا كەتۋىمىز كەرەك.
«بولاشاقتاعى ماقساتىمىز – شەتەلدەردىڭ ساۋدا ورىندارىنا ءوز ءونىمىمىزدى جەتكىزۋ. ءباا, ساۋد ارابياسىنداعى حالىقارالىق كورمەگە قاتىسۋعا نيەتتەنىپ وتىرمىز», دەيدى «التىن قازىق» كومپانياسى ديرەكتورلار توبىنىڭ ورىنباسارى قونىسبەك نۇرعازين.
اقمولا وبلىسى,
ەرەيمەنتاۋ اۋدانى
