ايرىقشا جوبانى ۇيىمداستىرۋعا «سەرپىندى دامۋ اليانسى» مەن وڭتۇستىك ورال مەملەكەتتىك تاريحي مۋزەيى دە ءۇن قوسقان. «اناتولي بۋكرەەۆ: شىڭعا ورلەۋ» دەپ اتالعان كورمە – بىرنەشە اۋقىمدى تاقىرىپتى قامتىدى. اتى اڭىزعا اينالعان الپينيست – ەلبرۋس شىڭىن 1 ساعات 47 مينۋتتا باعىندىرعان (1990 ج.) جانە قازاقستاننىڭ تۇڭعىش پرەزيدەنتىن اباي شىڭىنا الىپ شىققان (1995 ج.) تاريحتاعى جالعىز الپينيست.
تاعىلىمدى شارادا كورەرمەن نازارىنا اناتولي بۋكرەەۆتىڭ جەكە مۇراعاتىنان الىنعان 100-گە جۋىق سيرەك فوتوسۋرەت, قۇجاتتار, ماراپاتتار مەن جەكە كۇندەلىكتەر ۇسىنىلدى. بۇل ماتەريالدار ونىڭ سپورتشى, الپينيزم شەبەرى رەتىندە قالىپتاسۋىن, وتباسىن, وقۋ جىلدارىن, حالىقارالىق دارەجەدەگى سپورت شەبەرى رەتىندەگى مۇراسىن جانە جەتىستىكتەرىن ايقىن كورسەتەدى. ول – جەر شارىنداعى 14 سەگىزمىڭدىق شىڭنىڭ 11-ءىن باعىندىرعان تۇلعا.
كورمەدە سونىمەن قاتار سۋرەتشى ءارى ساۋلەتشى اندرەي ستاركوۆتىڭ اناتولي بۋكرەەۆكە ارنالعان 18 ونەر تۋىندىسى قويىلدى. ولاردىڭ قاتارىندا «تيانگبوچە موناستىرىنەن قاراعانداعى ەۆەرەست كورىنىسى», «حان-ءتاڭىرى – رۋحتار ءامىرشىسى», «اباي شىڭى – كەشكى تۇمان ىشىندە», «امانگەلدى شىڭى» جانە باسقا دا كارتينالار بار.
كورمەنى اشقان مەملەكەتتىك ورتالىق مۋزەي ديرەكتورىنىڭ مىندەتىن اتقارۋشى سەرجان ساروۆ, ارتىنا وشپەس ءىز قالدىرعان دارىندى سپورتشىنىڭ ءومىر-بەلەستەرى وسى سالاعا قىزىققان جاستارعا جارقىن ۇلگى ەكەنىن ايتتى. ءىس-شارا بارىسىندا قازاقستاندىق الپينيست, جۋرناليست گالينا مۋلەنكوۆا ءسوز سويلەپ, كورمە كەيىپكەرى تۋرالى ءوزى تۇسىرگەن فيلمدەردى تىلگە تيەك ەتتى. ال كورمە ۇيىمداستىرۋشىسى اندرەي بۋكرەەۆ پەن سۋرەتشى, بۋكرەەۆتىڭ سوڭعى ەكسپەديتسياسىنا قاتىسقان اندرەي ستاركوۆ ءالپينيستتىڭ قاھارماندىق جولىن باياندادى.
شاراعا تاۋ ءتۋريزمى سالاسىنىڭ وكىلدەرى, اناتولي بۋكرەەۆتىڭ ۇزەڭگىلەس دوستارى مەن ونىڭ جارقىن بەينەسىن قۇرمەتتەيتىن ازاماتتار قاتىستى.
