تەگىن ۇيىرمەنىڭ تۇيتكىلى شەشىلەدى

وسى ماسەلەلەردى زەر­دەلەپ, قوعام­نىڭ نازارىن اۋدارۋ ماقساتىندا 2025 جىل­دىڭ 28 اقپانىندا «Egemen Qazaqstan» گازەتىندە «تەگىن ۇيىرمەنىڭ تۇيتكىلى» اتتى ما­­قالا جارىق كورگەن ەدى. وندا ۇيىرمەلەردىڭ اتقارىلۋ بارى­سىنداعى كەمشىلىك­تەر, ەسەپ پەن شىنايى جاع­داي­دىڭ الشاقتىعى, بالالار­دىڭ قاۋىپ­سىزدىگى مەن ۇيىرمە ساپاسىنا قاتىستى ماسەلە­لەر جان-جاقتى تالدانعان. وسىدان كەيىن پرەزيدەنت اكىم­شىلىگىنىڭ تاپسىرماسىمەن جاڭا قاناتقاقتى جوبا – بىرىڭعاي ۆاۋچەرلىك جۇيە ەنگىزىلەتىن بولدى.

وقۋ-اعارتۋ مينيسترلىگى­نىڭ مالى­مەتىنشە, جۇرگىزىل­گەن تەكسەرىس بارىسىندا بىرقا­تار كۇردەلى زاڭبۇزۋ­شىلىقتار انىقتالعان. كەيبىر وڭىر­لەر­دە بالالار­دى تىزىمگە جالعان قوسۋ ار­قىلى كورسەتكىشتەردى قول­دان كوبەيتۋ دەرەكتەرى تىركەل­سە, 164 سەكتسيادا ساباق­تار سانيتارلىق تالاپتارعا مۇلدە ساي كەلمەيتىن پاتەر­لەردە, جەرتولەلەر مەن تۇرعىن ۇيلەردە وتكىزىلگەن. تاعى ءبىر الاڭداتاتىن جايت – التى وڭىردە بۇرىن سوتتالعان ازا­مات­تاردىڭ بالالاردى وقىتۋى بويىنشا 20-عا جۋىق جاعداي انىقتالعان. سونىمەن قاتار جۇيەدە تىركەۋدە تۇرعانىمەن, شىن مانىندە ساباققا قاتىس­پاعان 8000-نان استام بالا­نىڭ دەرەگى تىركەلىپ وتىر. بۇل فاك­تىلەر الاياقتىق پەن جال­عان ەسەپ بەرۋدىڭ, بيۋدجەت قاراجاتىن ماقساتسىز پايدالانۋ مەن جىمقىرۋدىڭ بار ەكەنىن كورسەتەدى.

قاناتقاقتى جوبا 2025 جىلدىڭ 1 ماۋ­­سى­­مى­نان باس­تاپ استانا, شىمكەنت, قارا­عاندى, قىزىلوردا, اتى­راۋ, اقتوبە قالالارىندا ىسكە قوسىلادى. ماقسات – بالا­لاردىڭ شىعارماشىلىق, سپورت­­تىق, قوسىمشا ءبىلىم الۋ با­عىتتارىنداعى قىزمەت­تەر­دى ءبىرتۇتاس, ءادىل ءارى اشىق جۇيەگە بىرىكتىرۋ. جۇيەنىڭ باس­تى جاڭالىعى – ۆاۋچەر ۇيىمعا ەمەس, تىكەلەي بالا­عا بەرىلەدى. بۇل بالاعا سپورت پەن ونەر اراسىنداعى تاڭ­داۋ ەركىندىگىن بەرىپ قانا قويماي, بۇرىنعى كەزەككە تۇرۋ, قارجىلاندىرۋ توقتاپ قالۋ نەمەسە باعىت اۋىس­تىرۋ بارىسىنداعى قيىن­دىقتاردى جويادى. سونداي-اق اتا-انا بالاسى بارعىسى كەلگەن ۇيىرمەنى eGov.kz پورتالى ارقىلى ءوزى تاڭداي الادى. وقۋ-اعارتۋ ۆيتسە-ءمي­نيسترى ەدىل وسپاننىڭ ايتۋىن­شا, جاڭا جۇيە­دە ەكى ءتۇرلى ۆاۋچەر ءتۇرى قاراس­تىرىلعان. ءبىرىنشىسى, نىسانالى ۆاۋچەر – مەملەكەتتىك مەكەمەلەرگە ارنالعان, كەزەكسىز بەرىلەدى. ەكىنشىسى, امبەباپ ۆاۋ­چەر – جەكەمەنشىك ۇيىمدارعا بارۋعا مۇمكىندىك بەرەدى جانە بالانىڭ جاسى مەن الەۋمەتتىك مارتەبەسىنە قاراي ءادىل كەزەك قالىپتاسادى.

ۆيتسە-مينيستر كاسىپكەر­لەر­دىڭ ارىز-شاعىمىن تىڭداۋ كەزىندە بالا قاۋىپسىزدىگى باس­تى ورىندا ەكەنىن باسا ايتتى. سونداي-اق مەملەكەت قار­جىسىنىڭ ءتيىستى ماقساتتا جۇمسالۋى قاداعالاناتىنىن اتاپ ءوتتى.

«بارلىق ۇيىرمە مەن سەكتسيا ءۇشىن بىرقاتار مىندەتتى تالاپتار قويىلادى. قاۋىپسىز ينفراقۇرىلىم, سانيتارلىق-گيگيەنالىق, ءورت قاۋىپسىزدىگى نورمالارىن ساقتاۋ, بەكىتىل­گەن ءبىلىم باعدارلامالارى مەن كاسىبي, بىلىكتى پەداگوگ­تەردىڭ بولۋى – باستى تالاپتار قاتارىندا. بۇدان بى­لاي قاتىسۋشىلاردىڭ كەلۋى كۇندەلىكتى تسيفرلىق تۇر­دە تىركەلىپ وتىرادى. بۇل قاراجاتتىڭ ناقتى جۇمسا­لۋىن اشىق كورسەتەدى جانە الاياقتىق, سىبايلاس جەمقور­لىق تاۋەكەلدەرىن بارىنشا ازايتادى», دەدى ول.

ايتا كەتەيىك, جوبانى جۇ­زەگە اسىرۋعا ءتورت مي­نيستر­­لىك جاۋاپتى. ما­دە­نيەت جانە اقپارات مينيسترلىگى شى­عار­ماشىلىق باعىتتى ۇيلەس­تىرەدى. تۋريزم جانە سپورت مينيسترلىگى سپورتتىق سەك­تسيالارمەن اينالىسادى. وقۋ-اعارتۋ مينيسترلىگى قو­سىمشا ءبىلىم باعى­تىنا جە­تەك­شىلىك ەتەدى. تسيفر­لىق دامۋ مينيسترلىگى پلات­فور­مانىڭ دۇرىس جۇمىس ىستەۋىن قاداعالايدى.