جوبانى ۇكىمەت قارجى مينيسترلىگى ارقىلى ىسكە اسىرادى جانە ۇلتتىق قوردىڭ جىل سايىنعى ينۆەستيتسيالىق تابىسىنىڭ 50%-ىن بالالاردىڭ 18 جاسقا تولعانعا دەيىنگى ارنايى جيناقتاۋشى شوتتارىنا مەرزىمىنەن بۇرىن الۋ قۇقىعىنسىز اۋدارۋدى كوزدەيدى. جيناقتالعان قارجىنى تۇرعىن ءۇي ساتىپ الۋعا جانە ءبىلىم الۋعا پايدالانۋعا بولادى.
باعدارلاما رەسمي تۇردە 2024 جىلدىڭ 1 قاڭتارىندا باستالدى. ونىڭ شەڭبەرىندە 2006 جىلدان باستاپ تۋىلعان ءاربىر بالاعا ۇلتتىق قوردان جىل سايىن قاراجات اۋدارۋ كوزدەلگەن.
قارجى مينيسترلىگىنىڭ مالىمەتىنشە, وتكەن جىلى باعدارلاماعا 6 919 131 ادام – 2006 جىلدان 2023 جىلعا دەيىن قوسا العاندا تۋىلعان بالالار قاتىستى. ولاردىڭ ارقايسىسىنا $100,52 ەسەپتەلدى.
ەسەپتەۋدىڭ جالپى سوماسى $695,5 ملن-دى قۇرادى. ۇلتتىق قوردان اقشا ەسەپتەلگەن بالالاردىڭ جالپى سانىنان 2024 جىلى 304 815 ادام 18 جاسقا جەتتى, ولارعا جالپى سوماسى $30,6 ملن اۋدارىلدى.
2025 جىلى قاتىسۋشىلار سانى 6 921 035 بالاعا دەيىن ءوستى, ونىڭ 324 430-ى بيىل 18 جاسقا تولادى, ال ەسەپتەۋلەر $129,38 قۇرادى.
باعدارلاماعا ەكى جىلدان بەرى قاتىسىپ كەلە جاتقان بالالاردا ينۆەستيتسيالىق كىرىستى قوسا ەسەپتەگەندە, جيناقتاردىڭ جالپى سوماسى – $232,94. ۇلتتىق قوردان بەرىلگەن جالپى سوما $1,5 ملرد-تى قۇرادى.
قاراجات بالا 18 جاسقا تولعانعا دەيىن جيناقتالادى, سودان كەيىن ولاردى تۇرعىن ءۇي جاعدايلارىن جاقسارتۋعا نەمەسە وقۋ اقىسىن تولەۋگە پايدالانۋعا بولادى. وسى ماقساتتارعا 118 مىڭنان استام ءوتىنىم بەرىلدى, ونىڭ 97 مىڭى ورىندالدى. جالپى سوماسى $11 ملن 399,1 مىڭ. اتاپ ايتقاندا, تۇرعىن ءۇي جاعدايلارىن جاقسارتۋعا 63 871 ءوتىنىم بەرىلدى, ونىڭ ىشىندە 56 591 ءوتىنىم ورىندالدى جانە $6, 647,9 ملن تولەندى. وقۋ اقىسىن تولەۋگە 54 270 ءوتىنىم بەرىلدى, ونىڭ ىشىندە 40 466 ءوتىنىم ورىندالدى جانە $4,751,2 ملن تولەندى.
بۇگىنگى تاڭدا «ۇلتتىق قور – بالالارعا» باستاماسى ءاربىر بالانىڭ بولاشاعى ءۇشىن قارجىلىق بازا قۇرۋعا باعىتتالعان ۇزاقمەرزىمدى مەملەكەتتىك قولداۋ نىسانى بولىپ سانالادى.
