فوتو: gov.kz
قازىرگى ۋاقىتتا بايقوڭىر اۋدانىنداعى «تۇلپار» ساۋدا ورتالىعىنىڭ الدىندا ەسكى ۇيلەر مەن ساۋدا نىساندارىن بۇزۋ جۇمىسى ءجۇرىپ جاتىر. بيىلدىڭ وزىندە بۇل اۋماق قايتا جاڭارىپ, ورنىنا جاڭا قوعامدىق كەڭىستىك اشىلادى. تۇرعىندار ءۇشىن جاياۋ جۇرگىنشىلەر ايماعى, دەمالىس ورىندارى اشىلىپ, كوگالداندىرۋ جانە جارىقتاندىرۋ جۇمىسى جۇرگىزىلەدى. اتالعان جۇمىستى كەزەڭ-كەزەڭىمەن جۇزەگە اسىرىپ, وسى جىلدىڭ سوڭىنا دەيىن اياقتاۋ جوسپارلانعان.
تاعى ءبىر قوعامدىق كەڭىستىك جۇبانوۆ كوشەسىندە (تارحان كوشەسىنەن پۋشكين كوشەسىنە دەيىنگى ارالىقتا) اشىلادى.
گۇلزاردىڭ جالپى اۋدانى 4,5 مىڭ شارشى مەتردى قۇرايدى. اباتتاندىرۋ اياسىندا اۋقىمدى كوگالداندىرۋ جۇمىسى جۇرگىزىلىپ, كوپجىلدىق بۇتالار مەن ءىرى كوشەتتەر وتىرعىزىلادى.
اباي داڭعىلىنىڭ رەسپۋبليكا داڭعىلىنان باستاپ ءۋاليحانوۆ كوشەسىنە دەيىنگى ارالىعى ەكى جاعىنان تولىق اباتتاندىرىلادى. اباتتاندىرىلاتىن اۋماقتىڭ جالپى كولەمى 1,1 گەكتاردى قۇرايدى. جوبا اياسىندا كوشە جيھازدارى ورناتىلىپ, جارىقتاندىرۋ جۇمىسى قوسا اتقارىلادى.
«سارايشىق شاعىن اۋدانىندا (جۇرگەنوۆ گۇلزارى) ەڭبەك پەن جۇمىسشى ماماندىقتاردىڭ ماڭىزىنا ارنالعان ارنايى تاقىرىپتاعى گۇلزار جوباسىن ىسكە اسىرۋ باستالعان. جوبا اياسىندا كوشەگە ارنالعان جيھازدار ورناتىلادى, كوگالداندىرۋ جۇمىسى جۇرگىزىلەدى جانە باسقا دا اباتتاندىرۋ شارالارى ىسكە اسىرىلادى. گۇلزار تەك تۇرعىنداردىڭ دەمالىس ورنى عانا ەمەس, سونىمەن قاتار قوعام تاراپىنان ەڭبەككە دەگەن قۇرمەتتى ارتتىرۋعا باعىتتالعان قالالىق ورتانىڭ ماڭىزدى ەلەمەنتىنە اينالادى», دەپ جازدى ج.قاسىمبەك.
سونداي-اق, تاشەنەۆ كوشەسىنىڭ بويىندا كوگالدى ورىن اشىلىپ, 500-دەن استام اعاش وتىرعىزىلعان. اۋماعى تولىقتاي اۆتوماتتى سۋارۋ جۇيەسىمەن جابدىقتالعان.
