ماسەلە, «Siri» داۋىستىق كومەكشىسىندە. بۇل كومەكشى قولدانۋشى پارمەن بەرگەندە عانا ىسكە قوسىلۋى كەرەك. بىراق 2019 جىلى «The Guardian» باسىلىمى جاريالاعان اقپاراتقا سايكەس, «Siri» كەيدە كەزدەيسوق قوسىلىپ, ادامنىڭ جەكە اڭگىمەسىن جازىپ وتىرعان. مىسالى, نايزاعايدىڭ دىبىسى, سىدىرما ءۇنى سياقتى جاي عانا فوندىق دىبىستار «Siri»-ءدى ىسكە قوسۋعا سەبەپ بولعان. «Apple» قىزمەتكەرى جازبالاردى ارنايى ادامدار تىڭداپ, كومەكشىنىڭ دۇرىس جۇمىس ىستەپ جاتقانىن تەكسەرەتىنى تۋرالى اقپارات بەرگەن. جازبالاردا قولدانۋشىنىڭ ورنالاسقان جەرى مەن بايلانىس اقپاراتى دا بولعان. وسى جاعدايدان كەيىن «لوپەس Apple»-گە قارسى دەگەن ۇجىمدىق سوت ءىسى قوزعالدى. تالاپ بىلدىرگەندەر «Siri» تىڭداعان اڭگىمەلەر مەن كەيىننەن شىققان جارنامالاردىڭ اراسىندا سايكەستىك بار ەكەنىن ايتىپ وتىر. مىسالى, «Air Jordan» اياقكيىمى تۋرالى سويلەسكەننەن كەيىن ءدال سول اياقكيىمنىڭ جارناماسى شىققان. نەمەسە دارىگەرمەن وپەراتسيا تۋرالى سويلەسكەننەن كەيىن – سول قىزمەتتىڭ جارناماسى پايدا بولعان. «Apple» بۇل ايىپتى رەسمي تۇردە مويىنداماسا دا, 95 ميلليون دوللار وتەماقى تولەۋگە كەلىسىپ وتىر. وتەماقىنى 2014 جىلدىڭ قىركۇيەگى مەن 2024 جىلدىڭ جەلتوقسانى ارالىعىندا «Siri» بار قۇرىلعىنى ساتىپ العان اقش ازاماتتارى الا الادى. ءار قۇرىلعى ءۇشىن 20 دوللارعا دەيىن تولەنۋى مۇمكىن.
كومپانيا بۇل جاعدايدان كەيىن «Siri» جۇيەسىنە وزگەرىس ەنگىزگەنىن ايتتى. ەندى قولدانۋشى رۇقسات بەرگەندە عانا قىزمەتكەرلەر جۇيەنىڭ جۇمىس ىستەپ تۇرعانىن تەكسەرە الادى. ال دىبىستار وزىنەن-ءوزى جازىلمايدى. ايتا كەتۋ كەرەك, مۇنداي جاعداي تەك «Apple»-دە ەمەس. 2018 جىلى «Amazon» كومپانياسىنىڭ «Alexa» اتتى كومەكشىسى ەرلى-زايىپتىنىڭ سويلەسكەنىن جازىپ الىپ, جازبانى كۇيەۋىنىڭ ارىپتەسىنە جىبەرىپ قويعان. كەيىن «Bloomberg», «Amazon» مىڭداعان جۇمىسشىنى قولدانۋشىلاردىڭ جازبالارىن تىڭداۋعا جۇمىلدىرعانىن جازعان. «Google» مەن «Samsung» تا وسىنداي ايىپتاۋلارعا ۇشىراعان.
2019 جىلى جۇرگىزىلگەن ساۋالنامادا ازاماتتاردىڭ 55 پايىزى, ال 2023 جىلى 60 پايىزدان استامى تەلەفوندارىنىڭ ولاردى تىڭدايتىنىن ايتقان. سونداي-اق كوبى جاقىندا سويلەسكەن تاقىرىپپەن بايلانىستى جارنامانى كورگەنىن جەتكىزگەن. الايدا پسيحولوگتەر بۇل قۇبىلىستى «راستاۋ قاتەلىگى» دەپ تۇسىندىرەدى. ياعني ادام كەيبىر اقپاراتتى ەسىندە ساقتاپ, وعان ەرەكشە ءمان بەرەدى. سول سەبەپتى ءبىر رەت ايتقان سوزىمەن بايلانىستى جارنامانى كورىپ قالسا, مۇنى كەزدەيسوق ەمەس دەپ ويلايدى.
قازىر ادامدار تەلەفون ميكروفونىن سكوتچپەن جاۋىپ قوياتىن بولعان. «TikTok»-تا كەي قولدانۋشىلار «Siri»-دەن ءوزىن تىڭداماۋدى وتىنەدى. بۇل – ادامداردىڭ قۇپيا دەرەكتەرىنىڭ تارالىپ كەتپەۋىنە الاڭداي باستاعانىن كورسەتەدى. تەحنولوگيا بىزگە كوپ پايدا اكەلىپ جاتىر. بىراق ونىڭ ءبىز تۋرالى قانشالىق اقپارات جيناپ جاتقانىن دا ۇمىتپاۋىمىز كەرەك. سمارت قۇرىلعىلار تەك تىڭداپ قانا قويماي, ونى ەستە ساقتاپ, جارناما ارقىلى جاۋاپ تا قايتارادى. سوندىقتان ءاربىر قولدانۋشى سانالى ءارى ساق بولۋى كەرەك.
