«قازاق اۋىلىنىڭ» اشىلۋ ءراسىمى امانكەلدى كەنتىنىڭ ىرگەسىندەگى ء«تاج-تورعاي» تۋريستىك كەشەنىندە ءوتتى. سالتاناتتى ءىس-شاراعا جەرگىلىكتى تۇرعىندار, مۇعالىمدەر, وقۋشىلار, الىس-جاقىننان كەلگەن مەيماندار قاتىستى.
كوپشىلىك 50 قوبىزشى مەن 50 دومبىراشى قوسىلىپ ورىنداعان كۇي شەرۋىن تامسانا تىڭداپ, ونەرپازدارعا قوشەمەت كورسەتتى.
جوبا اۆتورلارىنىڭ ايتۋىنشا, مۇندا بالالار مەن جاسوسپىرىمدەر اسىق اتىپ, اتقا ءمىنىپ, تاي ۇيرەتۋگە جاتتىعادى. ۇستالىققا, قولونەرگە ۇيرەنەدى. قىز بالالار ءجۇن ءتۇتىپ, ءجىپ ءيىرىپ, قۇراق قۇراپ, كۇبى ءپىسىپ, ماي شايقاپ, قۇرت سىعىپ نەشە ءتۇرلى ۇلتتىق تاعامداردى ازىرلەۋگە ماشىقتانادى.
جەرگىلىكتى تۇرعىنداردىڭ ۇلكەن مەرەكەسىنە اينالعان ءىس-شارا بارىسىندا اق شاڭقان كيىز ۇيلەر بوي تۇزەپ, ەتنوگرافيالىق جادىگەرلەردىڭ كورمەسى اشىلدى. ۇلكەن-كىشى قوسىلىپ اسىق اتىپ وينادى.
اۋىل ىرگەسىندەگى مەرەكەگە تالاي جىلدان بەرى وسى ء«تاج-تورعاي» تۋريستىك كەشەنىن باستان-اياق سالىپ بىتىرەمىن دەپ شاپقىلاپ جۇرگەن بەلگىلى مەتسەنات ساپار ىسقاقوۆ اعامىز دا ارنايى كەلىپتى.
«قازاقتىڭ باي رۋحاني مۇراسىن ۇرپاق جادىندا ساقتاپ قالۋدىڭ ءبىر جولى – وسىنداي جوبالار. اۋىلدىڭ بولمىسىن, سالتتىڭ ءسانىن كوزىمەن كورگەن بالا – ەل مەن جەردىڭ قادىرىن بىلەتىن ازامات بولىپ وسەدى», دەيدى ساپار ىسقاق ۇلى.
قوستاناي وبلىسى
