فوتولار: اقوردا
ء«بىز رۋاندانى افريكاداعى سەنىمدى سەرىكتەسىمىزدىڭ ءبىرى رەتىندە قاراستىرامىز. سونداي-اق ءوزارا ارىپتەستىكتى ودان ءارى نىعايتۋعا مۇددەلىمىز. بۇگىنگى كەزدەسۋ مازمۇندى ءارى ماعىنالى بولدى. ءبىز ەكىجاقتى ىنتىماقتاستىقتى كۇشەيتۋ جولدارىن تالقىلادىق. ناقتى كەلىسىمدەرگە قول جەتكىزدىك. ەكى ەل اراسىنداعى ساياسي ديالوگتى دامىتۋعا ۋاعدالاستىق. الداعى ۋاقىتتا سىرتقى ىستەر مينيسترلىكتەرى جوعارى دەڭگەيدەگى كەزدەسۋلەر وتكىزەتىن بولدى», دەدى قاسىم-جومارت توقاەۆ.
مەملەكەت باسشىسى بيىل قازاقستان مەن رۋاندا ديپلوماتيالىق جانە قىزمەتتىك تولقۇجات يەلەرىن ۆيزالىق تالاپتاردان بوساتۋعا كەلىسكەنىنە توقتالدى.
بۇدان بولەك, مەملەكەتتەر باسشىلارى پارلامەنتارالىق ديپلوماتيا ماسەلەسىن پىسىقتاعانىن جەتكىزدى سونداي-اق كولىك-لوگيستيكا جانە ساۋدا سالالارىندا بىرلەسكەن جۇمىس توپتارىن قۇرۋ تۋرالى كەلىسىم جاسادى. قازاقستان پرەزيدەنتى مۇنى ساۋدا-ەكونوميكالىق قاتىناستاردى ودان ءارى دامىتۋدىڭ تەتىگى سانايدى.
«بۇل رەتتە حالىقارالىق دالىزدەردىڭ مۇمكىندىگىن تالقىلادىق. كەلىسسوز بارىسىندا ازىق-ت ۇلىك قاۋىپسىزدىگىن قامتاماسىز ەتۋ ماسەلەسىن پىسىقتادىق. قازاقستاننىڭ اۋىل شارۋاشىلىعى ونىمدەرىن افريكا قۇرلىعىنا تاسىمالداۋ جولدارىن قاراستىردىق. ەلدەرىمىز وزىق تەحنولوگيا, جاساندى ينتەللەكت جانە عارىش سالاسىندا ايتارلىقتاي تاجىريبە جيناقتادى. ءبىز تسيفرلاندىرۋ جانە كيبەرقاۋىپسىزدىك ماسەلەلەرىنە قاتىستى ورتاق جوبالاردى قولعا الامىز دەپ كەلىستىك. عارىش كەڭىستىگىن بىرلەسىپ يگەرۋ جونىندە ۋاعدالاستىققا قول جەتكىزدىك. مۇنداي قادام مەملەكەتتىك قىزمەت پەن بيزنەستىڭ تيىمدىلىگىن ارتتىرۋعا سەپتىگىن تيگىزەدى. اقپاراتتىق قاۋىپسىزدىكتى كۇشەيتۋگە مۇمكىندىك بەرەدى», دەدى پرەزيدەنت.
قاسىم-جومارت توقاەۆ قازاقستان مەن رۋاندا جاسىل ەنەرگەتيكا سالاسىن وركەندەتىپ, تابيعي رەسۋرستاردى ءتيىمدى پايدالانۋعا مۇددەلى ەكەنىن ايتتى. وسىعان وراي قوس مەملەكەت بىرلەسكەن جوبالاردى جۇزەگە اسىرۋعا نيەتتى. بۇل ۋاعدالاستىقتار ساۋدا-ساتتىق كولەمىن ارتتىرۋعا جول اشادى. سونىمەن قاتار ەكى ەلدىڭ ينۆەستيتسيالىق ىقپالداستىعىنا تىڭ سەرپىن بەرەدى.
«بۇگىندە استانا مەن كيگاليدىڭ حالىقارالىق قارجى ورتالىقتارى اراسىندا تىعىز بايلانىس بار. ءبىز جاھاندىق قارجى نارىعىنداعى وسى بايلانىستى ودان ءارى نىعايتۋعا كەلىستىك. كليماتتىڭ وزگەرۋىنە قارسى كۇرەس جانە قورشاعان ورتانى قورعاۋ ماسەلەلەرى دە نازاردان تىس قالعان جوق. رۋاندانىڭ كليماتتى ساقتاۋ باعىتىندا مول تاجىريبەسى بار. سونىڭ ارقاسىندا جاھاندىق جوبالارعا زور ۇلەس قوسىپ كەلەدى. وسى رەتتە تاجىريبە الماسۋدىڭ وزەكتى ەكەنىن اتاپ وتتىك. حالىقارالىق كونۆەنتسيالار مەن كەلىسىمدەر اياسىندا ەكولوگيا ماسەلەلەرىن شەشۋ ءۇشىن كۇش بىرىكتىرۋ جولدارىن تالقىلادىق», دەدى مەملەكەت باسشىسى.
بۇگىنگى كەلىسسوزدەر كەزىندە مادەنيەت, ءبىلىم-عىلىم سالالارىنداعى ىنتىماقتاستىققا دا ەرەكشە نازار اۋدارىلدى. اتاپ ايتقاندا, پرەزيدەنتتەر اكادەميالىق بايلانىستى دامىتۋعا, ستۋدەنت الماسۋعا, سونداي-اق, بىرلەسكەن عىلىمي زەرتتەۋلەر جۇرگىزۋگە كەلىستى.
قاسىم-جومارت توقاەۆ پول كاگامەنى الەمدىك ساياساتتا مول تاجىريبەسى, بەدەلى بار پرەزيدەنت رەتىندە اتاپ ءوتىپ, جاھاندىق ماسەلەلەر جونىندە پىكىر الماسقانىنا توقتالدى.
«ەكى ەلدىڭ حالىقارالىق تۇيتكىلدەرگە قاتىستى ۇستانىمدارى ورتاق دەپ ايتۋعا بولادى. ءبىز جاھاندىق داعدارىستىڭ ءبارىن تەك ديپلوماتيالىق جولمەن شەشۋ كەرەك دەپ ەسەپتەيمىز. بەيبىت كەلىسسوزدەر جۇرگىزۋدى قولدايمىز. بۇعان قوسا, حالىقارالىق ۇيىمدار اياسىندا ءوزارا ىقپالداستىقتى كۇشەيتۋگە ۋاعدالاستىق. باستامالارىمىز بويىنشا ءبىر-بىرىمىزگە قولداۋ كورسەتۋگە كەلىستىك. پرەزيدەنت كاگامە مىرزانىڭ ەلىمىزگە رەسمي ساپارىنىڭ تاريحي ماڭىزى بار. ءبىز ەكىجاقتى بايلانىستى دامىتۋعا, ءتۇرلى سالاداعى ىنتىماقتاستىقتى كەڭەيتۋگە مۇددەلى ەكەنىمىزدى راستادىق. بۇگىنگى كەلىسسوزدىڭ ناتيجەسى – سونىڭ ايقىن دالەلى. ەندى وسى كەلىسىمدەردى ساپالى جۇزەگە اسىرۋىمىز كەرەك», دەدى مەملەكەت باسشىسى.
ءوز كەزەگىندە پول كاگامە بۇگىنگى كەلىسسوزدەردىڭ قورىتىندىسىن جوعارى باعالادى.
«قازاقستان پرەزيدەنتىمەن وتە ناتيجەلى كەلىسسوز جۇرگىزدىك. ەلدەرىمىز اراسىنداعى بەرىك دوستىق ءوزارا سەرىكتەستىگىمىزدى ودان ءارى نىعايتۋعا نەگىز بولادى. كەلىسىمدەرگە قول قويۋ ارقىلى ىنتىماقتاستىق مۇمكىندىكتەرىن ارتتىرۋعا نيەتتىمىز. ەكى مەملەكەتتىڭ ساۋدا, تەحنولوگيا جانە اۋىل شارۋاشىلىعى سالالارىندا ءبىر-بىرىنەن ۇيرەنەرى كوپ. ءبىز «سامۇرىق-قازىنا» اق مەن Rwanda Mines, Petroleum and Gas Board اراسىندا كەلىسىم جاسالۋىن قۇپتايمىز. رۋاندا قازاقستاننىڭ ەنەرگەتيكا, تاۋ-كەن ونەركاسىبى جانە مينەرالداردى وڭدەۋ سالالارىنداعى يننوۆاتسيالارىن يگەرۋ ارقىلى ايتارلىقتاي پايداعا كەنەلە الادى», دەدى رۋاندا پرەزيدەنتى.
