ماڭىزى بار قالالاردى دامىتۋدى كوزدەيتىن زاڭ جوباسى تانىستىرىلدى

اتالعان زاڭ جوباسى استانا مەن رەسپۋبليكالىق ماڭىزى بار قالالاردىڭ الەۋمەتتىك-ەكونوميكالىق دامۋ ماسەلەلەرىن شەشۋگە باعىتتالعان.

اۋەلى ب.ناجمەتدين ۇلى استانانى جانە رەسپۋبليكالىق ماڭىزى بار قالالاردى اباتتاندىرۋ ماسەلەلەرى بويىنشا قولجەتىمدى ورتانى قامتاماسىز ەتۋ, ديزاين-كودتى ەنگىزۋ جانە جەرگىلىكتى وكىلدى جانە اتقارۋشى ورگانداردىڭ قۇزىرەتتەرىن ناقتىلاۋ نورمالاردى جەتىلدىرۋ ەنگىزىلگەنىن اتاپ ءوتتى.

«زاڭ جوباسىندا سونداي-اق جارناما قىزمەتىن رەتتەۋ جانە قوعامدىق ورىنداردا كوشەدەگى اۋديوجارناماعا تىيىم سالۋ جانە دە تروتۋارلاردا, اۆتوجولداردا سىرتقى جارنامانى ورنالاستىرۋعا تىيىم سالۋ كوزدەلگەن. جەردى قالا مۇقتاجى ءۇشىن پايدالانۋ نورمالارىن ناقتىلاۋ دا ۇسىنىلىپ وتىر», دەدى ول.

دەپۋتاتتىڭ ايتۋىنشا, زاڭ جوباسىندا نىسانالى ماقساتى بويىنشا پايدالانىلمايتىن جەر ۋچاسكەسىن ماجبۇرلەپ الىپ قويۋ كەزىندە, بۇرىنعى مەنشىك يەسىنە ونى ساتىپ الۋ قۇنىن عانا وتەي وتىرىپ, جەردى وتكىزۋدەن تۇسكەن تابىستى بيۋدجەتكە ەسەپكە جاتقىزۋ ۇسىنىلادى.

«زاڭ جوباسىندا جەر كودەكسىنە سايكەس جەكەلەگەن مەنشىك يەلەرىنە تيەسىلى بولا المايتىن جەر ۋچاسكەلەرىنە قۇقىقتى قايتا رەسىمدەۋ ءتارتىبىن ايقىنداۋ جونىندەگى ۋاكىلەتتى ورگاننىڭ (اۋىل شارۋاشىلىعى مينيسترلىگى) قۇزىرەتى ەنگىزىلەدى», دەدى ب. ناجمەتدين ۇلى.

دەپۋتات سونىمەن قاتار  استانادا كوشى-قوندى رەتتەۋ تەتىكتەرىن جەتىلدىرۋ كوزدەلگەنىن, اتالعان زاڭ جوباسى بيىل 5 ناۋرىزدا ءبىرىنشى وقىلىمدا ماقۇلدانعانىن اتاپ ءوتتى.

«رەسپۋبليكالىق ماڭىزى بار قالالار مەن استانانىڭ جەرگىلىكتى وكىلدى جانە اتقارۋشى ورگاندارىنىڭ قۇزىرەتتەرىن كەڭەيتۋگە باعىتتالعان  تۇرعىنجاي رەنوۆاتسيالاۋ باعدارلاماسىن بەكىتۋ, اۋماقتاردى اباتتاندىرۋ, سونداي-اق ساۋدا, مەديتسينالىق, قوناق ءۇي جانە وزگە دە قىزمەتتەر كورسەتۋ قاعيدالارىن بەكىتۋ بويىنشا تۇزەتۋلەر ەنگىزىلدى», دەدى ماجىلىسمەن.

سونداي-اق دەپۋتات قالالىق قوعامدىق كولىكتە قولدانىلاتىن تاريفتىك ساياساتتى ازىرلەۋ بويىنشا تۇزەتۋلەر ۇكىمەتتىڭ قورىتىندىسىمەن قولداۋ تاپقانىن مالىمدەدى.

سونداي-اق كوشى-قون سالاسىنداعى نورمالاردى ودان ءارى جەتىلدىرۋ ماقساتىندا «ۋاقىتشا كوشىپ كەلۋشىنى تىركەۋ» ۇعىمىن ەنگىزۋ, سونداي-اق ۋاكىلەتتى ورگاننىڭ قۇزىرەتتەرىن ناقتىلاۋ ۇسىنىلاتىنىن ايتتى.

«ەل اۋماعىندا 30 كۇننەن ارتىق بولاتىن شەتەلدىكتەردىڭ باقىلاۋدا بولۋىن قامتاماسىز ەتۋ جانە  ولاردىڭ مەكەنجاي بويىنشا تۇرۋ قاعيدالارىن ساقتاۋعا باعىتتالعان تۇزەتۋلەر ۇكىمەتتىڭ قورىتىندىسىمەن قولداۋ تاپتى», دەدى دەپۋتات.

بۇعان قوسا  مەملەكەت باسشىسىنىڭ تاپسىرماسىن سايكەس, ەنەرگەتيكالىق جانە كوممۋنالدىق سەكتورلاردى جاڭعىرتۋ ۇلتتىق جوباسىن ىسكە اسىرۋ شەڭبەرىندە   جىلۋ, ەلەكتر ەنەرگەتيكاسى, سۋمەن جابدىقتاۋ جانە سۋ بۇرۋدىڭ ۇزدىكسىز جۇمىس ىستەۋىن قامتاماسىز ەتۋ ءۇشىن ءبىرىنشى كەزەكتەگى ينفراقۇرىلىمدىق پروبلەمالاردى شەشۋگە باعىتتالعان تۇزەتۋلەر ەنگىزىلگەن.

«وسى زاڭ جوباسى بويىنشا ءماجىلىس كوميتەتتەرى وڭ قورىتىندىلار ۇسىندى. جۇمىس توبىنىڭ 19 وتىرىسى جانە كوميتەتتىڭ كەڭەيتىلگەن وتىرىستارى وتكىزىلدى. زاڭ جوباسى بويىنشا دەپۋتاتتاردان 463 تۇزەتۋ ءتۇستى. سالىستىرما كەستە 305 پوزيتسيادان تۇرادى. زاڭ جوباسى 54 زاڭنامالىق اكتىگە, ونىڭ ىشىندە 9 كودەكس جانە 45 زاڭعا وزگەرىستەر مەن تولىقتىرۋلار ەنگىزۋدى كوزدەيدى», دەدى بايانداماشى.

بايانداماسىندا وسىنداي ماسەلەلەردى ايتا كەلە بولاتبەك ناجمەتدين ۇلى وسى زاڭدى قابىلداۋدى جانە ونى سەناتقا جىبەرۋدى ۇسىندى.