جاڭاقالا اۋدانىندا مەكتەپتى تامامداعانىنا 30 جانە 40 جىل تولعان تۇلەكتەر ءوز قاراجاتىنا اۋدان ورتالىعىنىڭ كىرەبەرىس قاقپاسى ماڭىنا «كيىز ءۇي جوباسى» اللەياسىن جاسادى. ال 20 جىلدىق تۇلەكتەرى تۋعان جەرگە تاعزىم رەتىندە اۋدان ورتالىعىنىڭ وڭتۇستىك باعىتىنداعى كىرەبەرىس جول بويىنا سيمۆوليكالىق قاقپا ورناتتى. جاڭاقالا ورتا مەكتەبىنىڭ 1985 جانە 1995 جىلعى تۇلەكتەرى مەكتەپكە COWORKING ورتالىعىن جاساقتاپ, وزدەرىنىڭ ءىزىن باسقان شاكىرتتەرگە سىيلىق جاسادى.
وسىناۋ ادەمى داستۇرگە اۋدان ورتالىعى عانا ەمەس, شالعايداعى اۋىل مەكتەپتەرىنىڭ تۇلەكتەرى دە ءۇن قوسىپ جاتىر. مىسالى جاڭاجول اۋىلىنىڭ ايدارحان ورتا مەكتەبىن 40 جىل بۇرىن بىتىرگەن تۇلەكتەر مەكتەپكە مەملەكەتتىك رامىزدەر سىيلاسا, 30 جىل بۇرىنعى تۇلەكتەر COWORKING ورتالىعىن, 20 جىل تولعان تۇلەكتەر كيىز ءۇي تارتۋ ەتكەن. بۇلاردان كەيىنگى بۋىن – 15 جىل بۇرىنعى تۇلەكتەر دە قالىس قالماي, 10 وقۋشىعا ۇلتتىق كيىم سىيلاپتى.
جاڭاقازان اۋىلىندا كەڭەس وداعىنىڭ باتىرى ءماجيت ءجۇنىسوۆ اتىنداعى تاريحي مەكتەپ بار. وسى مەكتەپتىڭ 2005 جىلعى تۇلەكتەرى «مەنىڭ جۇرەگىم جاڭاقازان» اتتى ادەمى ينستالياتسيانى ورناتتى. ال 30 جىلدىق تۇلەكتەر مەكتەپكە LED ەكران الىپ بەرسە, 35 جىلدىق تۇلەكتەر مەكتەپكە ساحنا كيىمىن تارتۋ ەتكەن.
پياتيمار اۋىلىنىڭ 1985 جىلعى مەكتەپ تۇلەكتەرى – سەگىز قانات كيىز ءۇي سىيلاسا, 1975 جىلى مەكتەپ بىتىرگەندەر مەكتەپ اۋلاسىنا تەرەك ەكتى. ال, 1995 جىلى بىتىرگەندەر اۋىل زيراتىن رەتكە كەلتىرىپ, قۇرال-سايمان قوياتىن شاعىن عيمارات سالىپ تاستادى. جاقسىلىق جاساۋعا جارىسقان تۇلەكتەردىڭ قيالىندا شەك جوق: وسىدان شيرەك عاسىر بۇرىن مەكتەپ بىتىرگەندەر ويلاسا كەلە اۋىلعا قازاق راديوسىن ورناتىپ قويىپتى.
بىرلىك اۋىلىندا سوتسياليستىك ەڭبەك ەرى م.ميرمانوۆ اتىنداعى مەكتەپتىڭ 10 جىل بۇرىنعى تۇلەكتەرى وزدەرى وقىعان ءبىلىم ورداسى وقۋشىلارىنا جازعى سپورت كيىمى مەن جابدىقتارىن الىپ بەرسە, بەس جىلدىق تۇلەكتەر 10 مەتر قىزىل كىلەم مەن مىنبەر سىيلادى.
كوپجاسار اۋىلىنداعى دينا نۇرپەيىسوۆا مەكتەبىنىڭ عيماراتى بيىل كۇردەلى جوندەۋدەن ءوتىپ جاتىر. وسى مەكتەپتىڭ بەس جىل بۇرىنعى تۇلەكتەرى مەكتەپ وقۋشىلارىنا سپورت فورماسىن, 2015 جىلعى تۇلەكتەر ۇزدىك وقۋشىلارعا ءبىر رەتتىك شاكىرتاقى سىيلادى. ال قىزىلوبا اۋىلىنىڭ 40 جىلدىق تۇلەكتەرى مەكتەپكە كيىز ءۇي تارتۋ ەتتى. تۇڭعىش توراعا سەيىتقالي مەڭدەشوۆ اۋىلىنىڭ 1968 جىلعى تۇلەكتەرى مەكتەپكە تاتامي ماتراسىن سىيعا تارتسا, 1983 جىلعى تۇلەكتەرى «مەنىڭ جۇرەگىم قىرقوپا» ينستالياتسياسىن جاڭارتتى. 40 جىلعى تۇلەكتەردىڭ ارقاسىندا تاتامي توسەنىشىن جاڭارتىپ العان مەكتەپتەردىڭ قاتارىندا ماستەكساي اۋىلى دا بار.
- بۇل ءداستۇر جاس ۇرپاققا ۇلگى بولارلىقتاي يگى ءىس. قازاقتا «تۋعان جەرگە تۋىڭدى تىك» دەگەن ءسوز بار. كىندىك قانى تامعان توپىراعىن ۇمىتپاي, الىس-جاقىندا جۇرگەن ازاماتتاردىڭ ءوزى وسكەن اۋىلىنا, ءبىلىم العان مەكتەبىنە قولداۋ كورسەتۋى – ازاماتتىق جاۋاپكەرشىلىكتىڭ ايقىن كورىنىسى, - دەيدى جاڭاقالا اۋدانىنىڭ اكىمى الپامىس كوشكىنباەۆ.
باتىس قازاقستان وبلىسى
